'ഗബ്ബര്: എന്താ അവളുടെ പേര്; ഹിറ്റ്മാന്: പേര് ഓര്മ ഇല്ല, ആദ്യത്തെ അക്ഷരം സോ, രണ്ടാമത്തെ അക്ഷരം ഫി; എത്ര അക്ഷരം ഉണ്ട്? രണ്ട് അക്ഷരം; സോഫി ന്ന് ആണോ; ആ സോഫി സോഫി'; പങ്കാളിയുമൊത്തുള്ള 'പാണ്ടി ദുരൈ' ശിഖര് ധവാന്റെ പാണ്ടിപ്പട റീല് ഏറ്റെടുത്ത് ആരാധകര്
മുംബൈ: ദിലീപും പ്രകാശ് രാജും നവ്യാ നായരും ഹരീശ്രീ അശോകനും തകര്ത്ത് അഭിനയിച്ച പാണ്ടിപ്പടയിലെ പല സീനുകളും റീലുകളായി പ്രത്യക്ഷപ്പെടാറുണ്ട്. എന്നാല് ഈ സീനുകള് റീലുകളായി ഇന്ത്യന് ക്രിക്കറ്റ് താരം ശിഖര് ധവാനും പങ്കാളി സോഫി ഷൈനും ചേര്ന്ന് അവതരിപ്പിച്ചതോടെ ഏറ്റെടുത്തിരിക്കുകയാണ് ആരാധകര്. പാണ്ടിപ്പട സിനിമയിലെ പ്രകാശ് രാജും നവ്യ നായരും തര്ക്കിക്കുന്ന രംഗമാണ് റീലായി അഭിനയിച്ചത്. സോഫിയുടെ ഇംഗ്ലിഷ് കേട്ട് 'പാണ്ടിദുരൈ' ആയി അഭിനയിക്കുന്ന ധവാന് ഞെട്ടുന്നതും രക്ഷപെടാന് ശ്രമിക്കുന്നതും വിഡിയോയിലുണ്ട്.
ധവാന്റെ വിഡിയോ മലയാളികളുള്പ്പടെയുള്ള ആരാധകര് ഏറ്റെടുത്തുകഴിഞ്ഞു. ബുധനാഴ്ച ഇന്സ്റ്റഗ്രാമില് പോസ്റ്റ് ചെയ്ത വിഡിയോ ഇതിനകം 80 ലക്ഷത്തിലേറെ ആളുകളാണു കണ്ടത്. രസകരമായ കമന്റുകളാണ് ഇന്സ്റ്റഗ്രാമില് പങ്കുവയ്ക്കുന്നത്. ഇതില് ഏറെയും മലയാളികളാണ് എന്നതാണ് കൗതുകം. 'ഞാന് കൊറച്ച് മലയാളികളെ കൂട്ടി വരാം', 'ഗബ്ബര് : എന്താ അവളുടെ പേര് . Hitman : പേര് ഓര്മ ഇല്ല . ആദ്യത്തെ അക്ഷരം സോ , രണ്ടാമത്തെ അക്ഷരം ഫി
എത്ര അക്ഷരം ഉണ്ട് 2 അക്ഷരം സോഫി ന്ന് ആണോ, ആ സോഫി സോഫി.....', 'ഇതിനു പിന്നില് @imsanjusamson ആണോ എന്നാണ് എന്റെ സംശയം' എന്നിങ്ങനെ പോകുന്നു കമന്റുകള്.
ശിഖര് ധവാനും അയര്ലന്ഡ് സ്വദേശിനിയായ സോഫി ഷൈനും ഈ വര്ഷം ആദ്യമാണ് ഡേറ്റിങ്ങിലായത്. ദുബായിലെ ഒരു റസ്റ്ററന്റില് വച്ച് പരിചയപ്പെട്ട ഇരുവരും ഐസിസി ചാംപ്യന്സ് ട്രോഫിയും ഐപിഎല് മത്സരങ്ങളും കാണാന് ഒരുമിച്ചെത്തിയിരുന്നു. ഇരുവരും ഒന്നിച്ചുള്ള ചിത്രം സമൂഹമാധ്യമത്തില് പങ്കുവച്ചുകൊണ്ടാണ് ധവാന് തന്റെ പ്രണയം വെളിപ്പെടുത്തിയത്. . 'എന്റെ പ്രണയം' എന്ന അടിക്കുറിപ്പിനൊപ്പമുള്ള ചിത്രം സോഫിയാണ് ഇന്സ്റ്റഗ്രാമില് പങ്കുവച്ചത്. അത് ധവാനും ഷെയല് ചെയ്തതോടെ പ്രണയം ഔദ്യോഗികമായി സ്ഥിരീകരിക്കപ്പെട്ടു.
ചാംപ്യന്സ് ട്രോഫിക്കിടെ ദുബായ് രാജ്യാന്തര ക്രിക്കറ്റ് സ്റ്റേഡിയത്തിലെ ഗാലറിയില് ശിഖര് ധവാനൊപ്പം ഒരു അജ്ഞാത സുന്ദരിയെത്തിയത് ആരാധകര്ക്കിടയില് ചര്ച്ചയായിരുന്നു. ടൂര്ണമെന്റില് ഇന്ത്യ ബംഗ്ലദേശിനെതിരായ ആദ്യ മത്സരം കളിക്കുമ്പോഴാണ് ഗാലറിയില് ധവാനും ഐറിഷ് യുവതിയും ശ്രദ്ധ കവര്ന്നത്. ഇവരുടെ ചിത്രങ്ങളും വിഡിയോകളും സമൂഹമാധ്യമത്തെ ചൂടുപിടിപ്പിച്ചു. എന്നാല് പ്രണയത്തെക്കുറിച്ച് ധവാനോ സോഫിയയോ തുറന്നുപറഞ്ഞിരുന്നില്ല.
ആദ്യ ഭാര്യയായ അയേഷ മുഖര്ജിയും ധവാനും 2023ല് ഔദ്യോഗികമായി വേര്പിരിഞ്ഞിരുന്നു. 2012ലായിരുന്നു ഇരുവരുടേയും വിവാഹം. ഈ ബന്ധത്തില് ഒരു മകനുമുണ്ട്. മകന് ഇപ്പോള് 11 വയസ്സുണ്ട്. പക്ഷേ രണ്ടര വയസ്സുവരെ മാത്രമാണു താന് അവനെ കണ്ടിട്ടുള്ളതെന്ന് ധവാന് ഒരിക്കല് പ്രതികരിച്ചിരുന്നു. ശിഖര് ധവാന്റെ മകന് സൊറാവര് അയേഷയ്ക്കൊപ്പം ഓസ്ട്രേലിയയിലാണു താമസിക്കുന്നത്. മകനെ കാണാന് മുന് ഭാര്യ അനുവദിക്കുന്നില്ലെന്ന് ധവാന് സമൂഹമാധ്യമങ്ങളില് പല തവണ ആരോപണം ഉന്നയിച്ചിട്ടുണ്ട്. 2025 ഫെബ്രുവരിയിലാണ് ഇങ്ങനെയൊരു പ്രതികരണം ധവാന് നടത്തിയത്.
'മകനെ കണ്ടിട്ട് രണ്ടു വര്ഷത്തോളമായി. ഒരു വര്ഷമായി അവനോട് ഒന്ന് സംസാരിച്ചിട്ട്. ധ്യാനത്തിനിരിക്കുന്ന സമയത്ത് അവന് അടുത്തുള്ളതായും ഞാന് അവനോട് സംസാരിക്കുന്നതായുമൊക്കം ചിന്തിക്കും. മകന് ഇപ്പോള് 11 വയസ്സുണ്ട്. പക്ഷേ രണ്ടര വയസ്സുവരെ മാത്രമാണ് ഞാന് അവനെ കണ്ടിട്ടുള്ളത്. അവന് സന്തോഷത്തോടെയും ആരോഗ്യത്തോടെയും ഇരിക്കണമെന്നാണ് എന്റെ ആഗ്രഹം. മൂന്നോ, നാലോ ദിവസം കൂടുമ്പോള് ഞാന് അവന് സന്ദേശങ്ങള് അയക്കാറുണ്ട്. പക്ഷേ എന്നെ ബ്ലോക്ക് ചെയ്തിരിക്കുകയാണ്. അവന് എന്റെ സന്ദേശങ്ങള് കാണുന്നുണ്ടോയെന്നു പോലും അറിയില്ല. എങ്കിലും ഞാനിത് തുടരും' എന്നാണ് അന്ന് ധവാന് പറഞ്ഞത്.
ഇതിനിടെയാണ് കഴിഞ്ഞ നവംബറില് ധവാനൊപ്പമുള്ള അജ്ഞാത സുന്ദരിയെക്കുറിച്ചുള്ള വാര്ത്തകളെത്തിയത്. പലയിടത്തും ഇരുവരും ഒരുമിച്ചെത്തി. ധനകാര്യ സേവന കമ്പനിയായ നോര്ത്തേണ് ട്രസ്റ്റ് കോര്പ്പറേഷനില് സെക്കന്ഡ് വൈസ് പ്രസിഡന്റ്- പ്രൊഡക്റ്റ് കണ്സള്ട്ടന്റാണ് സോഫി ഷൈന് എന്നാണ് പുറത്തുവരുന്ന വിവരം. യുഎഇയിലാണ് ഇവര് താമസിക്കുന്നത്.
