ഇനി നിങ്ങളുടെ 'സ്റ്റാറ്റസ്' എല്ലാവരും കാണുമെന്ന പേടി വേണ്ട!! ഇൻസ്റ്റഗ്രാമിലേതിന് സമാനമായ ആ ഫീച്ചർ ഇതാ..വാട്സ്ആപ്പിലും; ഒടുവിൽ നീ വന്നുവല്ലേയെന്ന് യൂസേഴ്സ്; കൂടുതൽ വിവരങ്ങൾ അറിയാം...
ലോകമെമ്പാടുമുള്ള കോടിക്കണക്കിന് ഉപയോക്താക്കളുടെ സ്വകാര്യത മെച്ചപ്പെടുത്തുന്നതിനായി വാട്സ്ആപ്പ് 'ക്ലോസ് ഫ്രണ്ട്സ്' എന്ന പുതിയ സ്റ്റാറ്റസ് ഫീച്ചർ അവതരിപ്പിക്കാൻ ഒരുങ്ങുന്നു. ഇൻസ്റ്റഗ്രാമിൽ ഏറെ പ്രചാരമുള്ള ഈ സംവിധാനം, ഉപയോക്താക്കൾക്ക് തങ്ങളുടെ സ്റ്റാറ്റസുകൾ തിരഞ്ഞെടുക്കപ്പെട്ട സുഹൃത്തുക്കൾക്ക് മാത്രമായി പങ്കുവെക്കാൻ അവസരം നൽകും.
ഇൻസ്റ്റഗ്രാമിലേതിന് സമാനമായിരിക്കും ഈ ഫീച്ചറിൻ്റെ പ്രവർത്തന രീതി. സ്റ്റാറ്റസുകൾ പോസ്റ്റ് ചെയ്യുമ്പോൾ 'എല്ലാവർക്കും' അല്ലെങ്കിൽ 'അടുത്ത സുഹൃത്തുക്കൾക്ക് മാത്രം' (Close Friends) എന്ന് തിരഞ്ഞെടുക്കാൻ ഉപയോക്താക്കൾക്ക് ഓപ്ഷൻ ലഭിക്കും. 'ക്ലോസ് ഫ്രണ്ട്സ്' ഓപ്ഷൻ തിരഞ്ഞെടുക്കുന്ന പക്ഷം, മുൻകൂട്ടി തയ്യാറാക്കിയ പട്ടികയിലുള്ളവർക്ക് മാത്രമേ ആ സ്റ്റാറ്റസുകൾ കാണാൻ സാധിക്കൂ. ഇത്തരം സ്റ്റാറ്റസുകൾക്ക് ചുറ്റും ഒരു പച്ച നിറത്തിലുള്ള വളയം പ്രത്യക്ഷപ്പെടുന്നത് സാധാരണ സ്റ്റാറ്റസുകളിൽ നിന്ന് ഇവയെ വേർതിരിച്ചറിയാൻ സഹായിക്കും. ഓഫീസ് സഹപ്രവർത്തകരോ അകന്ന ബന്ധുക്കളോ പോലുള്ളവർ കാണാൻ ഇഷ്ടപ്പെടാത്ത സ്വകാര്യ ചിത്രങ്ങളോ വീഡിയോകളോ പങ്കുവെക്കുന്നവർക്ക് ഈ ഫീച്ചർ ഏറെ പ്രയോജനകരമാകും.
നിലവിൽ ആൻഡ്രോയിഡ് ബീറ്റ പതിപ്പിൽ ഈ ഫീച്ചർ പരീക്ഷണ ഘട്ടത്തിലാണ്. വൈകാതെ എല്ലാ ഉപയോക്താക്കൾക്കും ഇത് സൗജന്യമായി ലഭ്യമാകുമെന്നാണ് പ്രതീക്ഷ.
ഇതുകൂടാതെ, പ്രത്യേക സ്റ്റിക്കറുകൾ, തീമുകൾ, മറ്റ് അധിക സൗകര്യങ്ങൾ എന്നിവ ഉൾപ്പെടുന്ന ഒരു പെയ്ഡ് സബ്സ്ക്രിപ്ഷൻ സേവനവും വാട്സ്ആപ്പ് പരീക്ഷിക്കുന്നതായി റിപ്പോർട്ടുകളുണ്ട്. എന്നാൽ 'ക്ലോസ് ഫ്രണ്ട്സ്' ഫീച്ചർ എല്ലാ ഉപയോക്താക്കൾക്കും സൗജന്യമായി തന്നെയായിരിക്കും ലഭ്യമാക്കുക എന്ന് കമ്പനി വ്യക്തമാക്കിയിട്ടുണ്ട്.
