കൊല്ലം: ആൽബം നടനെന്ന നിലയിൽ ബന്ധം സ്ഥാപിച്ച് സ്ത്രീകളിൽ നിന്ന് സ്വർണവും പണവും തട്ടിയെടുത്ത തട്ടാമല സ്വദേശി സജീവിനെ പൊലീസ് കുടുക്കിയത് തന്ത്രപരമായി.2013മുതൽ ഇയാളെ കുറിച്ച് പൊലീസിന് സംശയമുണ്ട്. എന്നാൽ പരാതിയൊന്നും വ്യക്തതയോടെ കിട്ടിയില്ല. അതു കൊണ്ട് മാത്രമാണ് ഇയാളെ പൊലീസ് അറസ്റ്റ് ചെയ്യതിരുന്നത്.

ഓട്ടോറിക്ഷാ ഡ്രൈവർ കൂടിയാണ് സജീവ്. സ്ത്രീകൾ മാത്രമുള്ള വീടുകൾ കണ്ടെത്തിയായിരുന്നു ഇയാളുടെ മോഷണ രീതിയെന്ന് പൊലീസ് അറിയിച്ചു. ഓട്ടോ റിക്ഷാ ഡ്രൈവറെന്ന നിലയിലാണ് ഇയാൾ സ്ത്രീകളുമായി അടുപ്പം കൂടുന്നത്. ഇതിനിടെ ആൽബം അഭിനയത്തിന്റെ കാര്യവും പറയും. ആൽബം കാണിച്ചു കൊടുക്കുകയും ചെയ്യും. ഇതോടെ ഇയാളിൽ ആർക്കും വിശ്വാസം വരും. ഇത് മുതലെടുത്താണ് തട്ടിപ്പുകൾ.

കിളികൊല്ലൂർ, കടയ്ക്കൽ, അഞ്ചൽ സ്റ്റേഷനുകളിലായി നിരവധി കേസുകളിൽ പ്രതിയാണ് സജീവ്. സ്ത്രീകൾ മാത്രമുള്ള വീടുകളിൽ കയറി അവരുടെ ആഭരണങ്ങൾ വാങ്ങി നോക്കി ആൽബങ്ങളുമായി ബന്ധപ്പെടുത്തി സംസാരിക്കും. കുടിക്കാൻ എന്തെങ്കിലും ആവശ്യപ്പെട്ട ശേഷം സ്ത്രീകൾ അതെടുക്കാൻ പോകുന്ന തക്കം നോക്കി മുങ്ങുന്നതാണ് പതിവ്. ഇതിനിടെ ഒരു വീട്ടിൽ നിന്ന് വിലകൂടിയ മൊബൈലും മോഷ്ടിച്ചു. ഈ ഫോൺ ഉപയോഗിക്കുന്നയാളിനെ പിന്തുടർന്നാണ് പൊലീസ് പ്രതിയിലേക്ക് എത്തിയത്.

ഈ ഫോൺ ഉപയോഗിച്ചയാളെയാണ് പൊലീസ് ആദ്യം കണ്ടെത്തിയത്. ഇതോടെ ഒരു കടയിൽ നിന്ന് വാങ്ങിയതാണെന്ന് തെളിഞ്ഞു. ഈ കടക്കാരനെ ചോദ്യം ചെയ്തപ്പോഴാണ് ആൽബം നടനിലേക്ക് കാര്യങ്ങളെത്തിയത്. ഇതോടെ ഇയാളെ പൊലീസ് വളഞ്ഞു. ഓട്ടോ ഡ്രൈവർ കൂടിയാണ് സജീവൻ. പൊലീസിന് കണ്ടതോടെ ഓട്ടോ ഉപേക്ഷിച്ച് ഓടി രക്ഷപ്പെടാനായി പ്രതിയുടെ ശ്രമം. പൊലീസ് വളഞ്ഞതിനാൽ ഇയാൾക്ക് രക്ഷപ്പെടാനായില്ല. ചോദ്യം ചെയ്യലിൽ കൂടുതൽ മോഷണകാര്യങ്ങൾ വെളിപ്പെടുത്തി.

2013ൽ കൊല്ലം പൊലീസിന് ഇയാൾക്കെതിരെ ഒരു പരാതി ലഭിച്ചിരുന്നു. ആലപ്പുഴയിലെ യുവതിയെ പറ്റിച്ച സംഭവമായിരുന്നു ഇത്. കൊല്ലത്ത് പഠിക്കുകയായിരുന്ന മകനെ കാണാൻ ഇവർ അന്ന് സ്ഥിരമായി കൊല്ലത്ത് വരുമായിരുന്നു. ഓട്ടോ ഡ്രൈവർ എന്ന നിലയിൽ അടുപ്പം കൂടി. ഇതോടെ കൊല്ലത്ത് എത്തുമ്പോൾ ഇവർ സജീവിനെ തന്നെ സ്ഥിരമായി വിളിക്കുമായിരുന്നു. ആ സൗഹൃദം മുതലെടുത്തായിരുന്നു മോഷണം. ചായ കുടിക്കാൻ ഓട്ടോയിൽ ബാഗും മറ്റും വച്ച് യുവതി പുറത്തിറങ്ങി. ഇയാളും അനുഗമിച്ചു. എന്നാൽ തന്ത്രപൂർവ്വം യുവതിയെ ഒഴിവാക്കി ഓട്ടോയുമായി മുങ്ങി.

ഇതു സംബന്ധിച്ച് കാര്യങ്ങൾ യുവതി പൊലീസിനെ അറിയിച്ചിരുന്നു. അന്വേഷണം സജീവിലേക്ക് എത്തുകയും ചെയ്തു. എന്നാൽ പരാതിക്കാരിയുടെ മേൽവിലാസത്തിൽ വ്യക്തത വരാത്തതുകൊണ്ട് തന്നെ പിന്നീട് പൊലീസിന് ഇതുമായി മുന്നോട്ട് പോകാനായില്ല. ഇപ്പോൾ ചോദ്യം ചെയ്യലിൽ സജീവനെ ഇക്കാര്യവും സമ്മതിച്ചിട്ടുണ്ട്. സമാന സ്വാഭവത്തിൽ നിരവധി തട്ടിപ്പുകൾ സജീവൻ നടത്തിയിട്ടുണ്ടെന്നാണ് സൂചന. ആൽബങ്ങളിൽ മുഖം കാണിക്കാൻ തുടങ്ങിയതോടെ അതിന്റെ പേരിൽ സ്ത്രീകളെ വശീകരിക്കാനും തുടങ്ങി.

സജീവ് അഭിനയിച്ചിട്ടുള്ള ഒട്ടുമിക്ക ആൽബങ്ങളും സൂപ്പർ ഹിറ്റാണെന്ന് പൊലീസ് പറഞ്ഞു. ഇയാൾ കൂടുതൽ തട്ടിപ്പുകൾ നടത്തിയതായി സംശയിക്കുന്നുണ്ട്. കമ്മിഷണറുടെ നേതൃത്വത്തിലുള്ള ഷാഡോ സംഘം പിടികൂടിയ പ്രതിയെ കൂടുതൽ അന്വേഷണത്തിനായി കിളികൊല്ലൂർ പൊലീസിന് കൈമാറി. ഷാഡോ പൊലീസിലെ യു. വിപിൻകുമാർ, ഹരിലാൽ, സീനു, സജു, വിനു, റിബു എന്നിവരടങ്ങിയ സംഘമാണ് പ്രതിയെ അറസ്റ്റ് ചെയ്തത്.