മംഗളുരു : മംഗളൂരു അന്താരാഷ്ട്ര വിമാനത്താവളം വഴി കടത്താൻ ശ്രമിച്ച 1 കിലോ 116 ഗ്രാം സ്വർണവുമായി കാസർകോട് സ്വദേശിയെ കസ്റ്റംസ് അധികൃതർ അറസ്റ്റ് ചെയ്തു. ബോവിക്കാനം മുളിയാർ പൊവ്വൽ സ്വദേശി അബ്ദുൾ സൽമാൻ (27) ആണ് തിങ്കളാഴ്ച കസ്റ്റംസിന്റെ പിടിയിലായത്. ഇയാളിൽ നിന്ന് പിടികൂടിയ സ്വർണത്തിന് 60,24,340 രൂപ വില വരും.

രാസവസ്തുക്കൾ ചേർത്ത് പേസ്റ്റ് രൂപത്തിലാക്കിയ സ്വർണം ഗോളങ്ങളാക്കി മലദ്വാരത്തിൽ തിരുകി കയറ്റി ഒളിപ്പിച്ച് കടത്താനുള്ള ശ്രമമായിരുന്നു കസ്റ്റംസ് മുന്നിൽ തകർന്നു വീണത്. ഇതേ രീതിയിൽ സ്വർണ്ണ വേട്ട നടത്താറുണ്ടെങ്കിലും മലദ്വാരത്തിൽ നിന്നും ഏറ്റവും കൂടുതൽ സ്വർണം പിടികൂടിയത് കേസ് ഇതാണന്നാണ് മംഗളൂരു കസ്റ്റംസ് പറയുന്നത്. അമിതമായ തിരുകിക്കയറ്റിയ സ്വർണ്ണ ഗോളങ്ങൾ യുവാവിന്റെ ചലനങ്ങളിൽ ഭാവവ്യത്യാസം ഉണ്ടാക്കുകയും ഇത് നടത്തത്തിൽ പ്രതിഫലിക്കുകയും ചെയ്തതോടെയാണ് കസ്റ്റംസിന് സംശയമുണ്ടായത്.

മുസ്ലീഗ് ഉദുമ നിയജക മണ്ഡലം ജനറൽ സെക്രട്ടറിയും പവ്വൽ ജുമാമസ്ജിദ് പ്രസിഡണ്ടും കാസർകോട് ജില്ല എസ് വൈ എസ് ജോയിന്റ് സെക്രട്ടറി സമസ്ത മഹൽ ഫെഡറേഷൻ ഉദുമ വർക്കിങ് പ്രസിഡണ്ടുമായ എ ബി ഷാഫിയുടെ മകനാണ് അബ്ദുൽ സൽമാൻ. പ്രതിയുടെ ഭാര്യയും മക്കളും ദുബായിൽ താമസിച്ചുവരികയാണ്.

നേരത്തെ പാസ്‌പോർട്ടിൽ ഫോട്ടോ മാറ്റി ആളുകളെ വിദേശത്തേക്ക് കയറ്റി വിടുന്ന മാഫിയ സംഘത്തിലും ഇവർ പ്രവർത്തിച്ചിരുന്നതായി പറയപ്പെടുന്നു. സംസ്ഥാന സർക്കാറിനെതിരെ സ്വർണ്ണക്കടത്ത് ആരോപണം ഉന്നയിച്ച് നിയമസഭയിലും പുറത്തും പ്രതിഷേധം ഉയരുമ്പോഴാണ് മുസ്ലിം ലീഗിന്റെ സമുന്നതനായ നേതാവിന്റെ മകൻ മലദ്വാരത്തിൽ ഗോള രൂപത്തിലാക്കി മാറ്റിയ സ്വർണം കടത്തിയത്തിന്ന് കർണാടകയിലെ കസ്റ്റംസിന്റെ പിടിയിലാകുന്നത് .

കടത്തിയ സ്വർണം സ്വീകരിക്കാനായി യുഡിഎഫിന്റെ ചില പ്രാദേശിക നേതാക്കളും എയർപോർട്ടിൽ എത്തിയതായി പറയപ്പെടുന്നു. നടപടിക്രമങ്ങൾ കഴിഞ്ഞ് വിട്ടയച്ച സൽമാന്റെ പാസ്‌പോർട്ട് കസ്റ്റംസ് വിട്ടു നൽകാത്തതിനെ തുടർന്ന് ഇയാൾ ഇപ്പോഴും മംഗലാപുരത്ത് തുടരുകയാണ്. അതേസമയം കള്ളക്കടത്തു നടത്തിയത് മകനായതുകൊണ്ട് പിതാവിനെതിരെ നടപടി എടുക്കേണ്ട കാര്യമില്ലെന്നും ആരാണ് ഇവിടെ കള്ളക്കടുത്ത് നടത്താത്തതെന്നും ഇവരുമായി ബന്ധപെട്ട കേന്ദ്രങ്ങൾ ചോദിക്കുന്നത്. സ്വർണം ഷാഫിയുടെ സഹോദരൻ അയച്ചതാണെന്നും ചിലർ മറുവാദം ഉന്നയിക്കുന്നുണ്ട്. അതേസമയം മകനെ ഇനി മുതൽ വീട്ടിൽ കയറ്റില്ലെന്ന് എ ബി ഷാഫി അവകാശപ്പെട്ടു.

ബുര്‍ഹാന്‍ തളങ്കര

    മറുനാടന്‍ മലയാളി ന്യൂസ് കോണ്‍ട്രിബ്യൂട്ടര്‍