കടുവകളെ അനായാസം കീഴടക്കി പ്രോട്ടീസ്; 85 റൺസ് വിജയലക്ഷ്യം 13.3 ഓവറിൽ മറികടന്നത് നാല് വിക്കറ്റ് നഷ്ടത്തിൽ; മൂന്നാം ജയവുമായി സെമി സാധ്യത സജീവമാക്കി ദക്ഷിണാഫ്രിക്ക; നാല് മത്സരങ്ങളിലും തോറ്റ ബംഗ്ലാദേശ് പുറത്ത്

അബുദാബി: ട്വന്റി-20 ലോകകപ്പ് സൂപ്പർ 12 മത്സരത്തൽ ബംഗ്ലാദേശിനെ ആറു വിക്കറ്റിന് കീഴടക്കിയ ദക്ഷിണാഫ്രിക്ക മൂന്നാം ജയത്തോടെ സെമി സാധ്യത സജീവമാക്കി. ടോസ് നഷ്ടപ്പെട്ട് ആദ്യം ബാറ്റ് ചെയ്ത ബംഗ്ലാദേശ് ഉയർത്തിയ 85 റൺസ് വിജയലക്ഷ്യം 13.3 ഓവറിൽ നാലു വിക്കറ്റ് നഷ്ടത്തിൽ പ്രോട്ടീസ് മറികടന്നു.സ്‌കോർ ബംഗ്ലാദേശ് 18.2 ഓവറിൽ 84ന് ഓൾ ഔട്ട്, ദക്ഷിണാഫ്രിക്ക 13.3 ഓവറിൽ 86-4.

ചെറിയ വിജയലക്ഷ്യത്തിലേക്ക് ബാറ്റുവീശി ദക്ഷിണാഫ്രിക്കയെ ബംഗ്ലാദേശ് തുടക്കത്തിൽ ഞെട്ടിച്ചു. നാലു റൺസെടുത്ത റീസാ ഹെൻഡ്രിക്‌സിനെ ആദ്യ ഓവറിൽ തന്നെ ടസ്‌കിൻ അഹമ്മദ് മടക്കി. ക്വിന്റൺ ഡി കോക്കിനെ(16) മെഹ്ദി ഹസനും ഏയ്ദൻ മാർക്രത്തെ ടസ്‌കിനും വീഴ്‌ത്തിയതോടെ ദക്ഷിണാഫ്രിക്ക പവർ പ്ലേയിൽ 33-3ലേക്ക് കൂപ്പുകുത്തി.

5.5 ഓവറിൽ മൂന്നിന് 33 റൺസെന്ന നിലയിലായിരുന്ന ദക്ഷിണാഫ്രിക്കയെ നാലാം വിക്കറ്റിൽ ഒന്നിച്ച ടെംബ ബവുമ - റസ്സി വാൻഡെർ ദസ്സൻ സഖ്യമാണ് രക്ഷിച്ചെടുത്തത്. ഇരുവരും ചേർന്ന് 47 റൺസാണ് ദക്ഷിണാഫ്രിക്കൻ സ്‌കോറിലേക്ക് ചേർത്തത്. വിജയത്തിനരികെ വാൻഡർ ദസ്സനെ(22) നാസും അഹമ്മദ് വീഴ്‌ത്തിയെങ്കിലും ഡേവിഡ് മില്ലറും(5*) ബാവുമയും(31*) ചേർന്ന് ദക്ഷിണാഫ്രിക്കയെ വിജയവര കടത്തി. കളിച്ച നാലു മത്സരങ്ങളിലും തോറ്റ ബംഗ്ലാദേശ് ടൂർണമെന്റിൽ നിന്ന് പുറത്തായി.

ബവുമ 28 പന്തിൽ നിന്ന് ഒരു സിക്സും മൂന്ന് ഫോറുമടക്കം 31 റൺസോടെ പുറത്താകാതെ നിന്നു. വാൻഡെർ ദസ്സൻ 27 പന്തിൽ നിന്ന് രണ്ടു ബൗണ്ടറിയടക്കം 22 റൺസെടുത്ത് 13-ാം ഓവറിൽ പുറത്താകുകയായിരുന്നു. ക്വിന്റൺ ഡിക്കോക്ക് (16), റീസ ഹെൻഡ്രിക്സ് (4), ഏയ്ഡൻ മാർക്രം (0) എന്നിവരാണ് പുറത്തായ മറ്റ് ദക്ഷിണാഫ്രിക്കൻ താരങ്ങൾ. ബംഗ്ലാദേശിനായി ടസ്‌കിൻ അഹമ്മദ് രണ്ടു വിക്കറ്റ് വീഴ്‌ത്തി.

ആദ്യം ബാറ്റ് ചെയ്ത ബംഗ്ലാദേശ് 18.2 ഓവറിൽ 84 റൺസിന് ഓൾ ഔട്ടായിരുന്നു. മൂന്നു വിക്കറ്റ് വീതം വീഴ്‌ത്തിയ കാഗിസൊ റബാദയുടേയും ആന്റിച്ച് നോർക്യയുടേയും ബൗളിങ്ങിന് മുന്നിൽ ബംഗ്ലാ ബാറ്റിങ് നിര തകർന്നു. തബ്രിസ് ഷംസി രണ്ടും ഡ്വെയ്ൻ പ്രിട്ടോറിയസ് ഒരു വിക്കറ്റും വീഴ്‌ത്തി.

27 റൺസെടുത്ത മെഹ്ദി ഹസ്സനാണ് ബംഗ്ലാദേശിന്റെ ടോപ്പ് സ്‌കോറർ. ലിറ്റൺ ദാസ് 24 റൺസെടുത്തപ്പോൾ ഷമീം ഹുസൈൻ 11 റൺസെടുത്തു. മറ്റു ബാറ്റ്‌സ്മാന്മാർക്കൊന്നും രണ്ടക്കം കാണാനായില്ല. സ്‌കോർ ബോർഡിൽ 22 റൺസെത്തിയപ്പോഴേക്കും ഓപ്പണർ മുഹമ്മദ് നയീം പുറത്തായി. തൊട്ടടുത്ത പന്തിൽ സൗമ്യ സർക്കാറും ക്രീസ് വിട്ടു. പിന്നീട് ബംഗ്ലാദേശിന് തുടർച്ചയായി വിക്കറ്റുകൾ നഷ്ടപ്പെട്ടു.

സ്‌കോർ ബോർഡിൽ 45 റൺസെത്തിയപ്പോഴേക്കും പൊരുതി നിന്ന ലിറ്റൺ ദാസും(24) മടങ്ങി. പിന്നീട് എട്ടാമനായി ക്രീസിലെത്തിയ മെഹ്ദി ഹസനും(27) ഷമീം ഹൊസൈനും(11) ചേർന്ന് ബംഗ്ലാദേശിന് 50 കടത്തിയെങ്കിലും ബംഗ്ലാ കടുവകളുടെ വാലരിഞ്ഞ ആന്റിച്ച് നോർട്യ 100 കടക്കുന്നതിൽ നിന്ന് അവരെ തടഞ്ഞു.ദക്ഷിണാഫ്രിക്കക്കായി ആന്റിച്ച് നോർട്യയും കാഗിസോ റബാദയും മൂന്നു വിക്കറ്റ് വീതം വീഴ്‌ത്തിയപ്പോൾ തബ്രൈസ് ഷംസി 21 റൺസിന് രണ്ട് വിക്കറ്റെടുത്തു. ഡ്വയിൻ പ്രിട്ടോറിയസ് മൂന്നോവറിൽ 11 റൺസിന് ഒരു വിക്കറ്റ് വീഴ്‌ത്തി.