കൊച്ചി : സ്വകാര്യ മെഡിക്കൽ കോളേജുകളിലെ എല്ലാ സീറ്റിലും സർക്കാർ മെരിറ്റ് അടിസ്ഥാനത്തിൽ പ്രവേശനം നടത്തുന്ന സംവിധാനം മാറ്റണമെന്നും മെഡിക്കൽ കോളേജുകളുടെ സീറ്റിന് ആനുപാതികമായി മാനേജ്മെന്റിന് സ്വന്തം നിലയിൽ പ്രവേശനം നടത്താൻ പ്രത്യേക ക്വാട്ട അനുവദിക്കണമെന്ന് ആവശ്യം.
നിലവിലുള്ള പ്രവേശന രീതി ഇന്ത്യൻ ഭരണഘടന ഉറപ്പുനൽകുന്ന മൗലിക സ്വാതന്ത്ര്യമായ സ്വയം സേവനത്തിനുള്ള അവകാശത്തിന് എതിരാണെന്ന് ചൂണ്ടിക്കാട്ടി സൗത്ത് ഇന്ത്യൻ യൂണിയൻ ഓഫ് ചർച്ചസ് (എസ്‌ഐ.യു.സി ), ബിഷപ്പ് ഡോ.ധർമരാജ് റസാലം, ദക്ഷിണ കേരള ഭദ്രാസന മെഡിക്കൽ മിഷൻ എന്നിവർ ചേർന്ന് സമർപ്പിച്ച റിട്ട് ഹർജി കേരള ഹൈക്കോടതി ഫയലിൽ സ്വീകരിച്ചു. കേന്ദ്ര സംസ്ഥാന സർക്കാരുകൾക്ക് നോട്ടീസ് അയക്കുകയും ചെയ്തു.
അഭിഭാഷകരായ ബി.വിനോദ്, ഐ.വി.പ്രമോദ്, എച്ച്.ജോഷ് എന്നിവർ മുഖേന സമർപ്പിച്ച ഹർജിയാണ് ജസ്റ്റിസ് എൻ.നഗരേഷ് ഫയലിൽ സ്വീകരിച്ചത്. ഇന്ത്യൻ ഭരണഘടനയുടെ ആർട്ടിക്കിൾ 26 പ്രകാരം വിദ്യാഭ്യാസ സ്ഥാപനങ്ങളുടെ ഭരണാവകാശത്തിൽ അവരുടെ സമുദായത്തിലെ അംഗങ്ങളിൽ നിന്ന് മെഡിക്കൽ വിദ്യാഭ്യാസ സ്ഥാപനത്തിലേക്ക് വിദ്യാർത്ഥികളെ പ്രവേശിപ്പിക്കാനുള്ള അവകാശം ഉൾപ്പെടുന്നുണ്ടെന്നും അത്തരം അവകാശം പൂർണ്ണമായും നിഷേധിക്കാനാവില്ലെന്നുമുള്ള ഉത്തരവുണ്ടാകണമെന്നും സ്വകാര്യ വിദ്യാഭ്യാസ മേഖലയിൽ കൂടുതൽ സ്ഥാപനങ്ങൾ എത്തുന്നതിന് തടസം നീക്കണമെന്നും ഹർജിയിലുണ്ട്. കാരക്കോണത്ത് ഡോ. സോമർവെൽ മെമോറിയൽ സി.എസ്‌ഐ മെഡിക്കൽ കോളേജ് സ്ഥാപിച്ചെങ്കിലും നിലവിലെ സാഹചര്യത്തിൽ തങ്ങളുടെ സമുദായത്തിലെ കുട്ടികൾക്ക് ഈ സ്ഥാപനത്തിൽ മെഡിക്കൽ പഠനം നടത്താനുള്ള സാഹചര്യം സൃഷ്ടിക്കാനാകുന്നില്ല.
കെ.എസ്.ആർ.ടി.സിയിലെ ജീവനക്കാർ സ്ഥാപിച്ച എഞ്ചിനീയറിങ് കോളേജിൽ പ്രവേശനത്തിന്റെ 25% അവരുടെ ബന്ധുക്കൾക്ക് സംവരണം ചെയ്തിരിക്കുന്നു. അതു പോലെ ഫെഡറൽ ബാങ്കിലെ ഉദ്യോഗസ്ഥർ സ്ഥാപിച്ച എഞ്ചിനീയറിങ് കോളേജിൽ അവരുടെ ആശ്രിതർക്ക് 50% സീറ്റാണ് സംവരണം ചെയ്തിരിക്കുന്നത്. എന്നാൽ, സിഎസ്ഐ മെഡിക്കൽ കോളേജുകളിൽ ഇത് നിഷേധിക്കപ്പെടുകയാണ്. മെഡിക്കൽ കോളേജിലെ മുഴുവൻ സീറ്റുകളും നിയന്ത്രിക്കുന്ന സർക്കാർ നയം വ്യക്തികളെയും സംഘടനകളെയും സ്വകാര്യമേഖലയിൽ മെഡിക്കൽ കോളേജ് സ്ഥാപിക്കുന്നതിൽ നിന്ന് തടയുകയും വിദ്യാഭ്യാസത്തിൽ സ്വയം സേവനത്തിനുള്ള അവകാശം നിഷേധിക്കുകയും ചെയ്യുന്നു. കേന്ദ്ര സംസ്ഥാന സർക്കാരുകൾ, കേരള ഹെൽത്ത് യൂണിവേഴ്സിറ്റി, എൻട്രൻസ് എക്സാമിനേഷൻ കമ്മീഷണർ, നാഷണൽ മെഡിക്കൽ കമ്മീഷൻ എന്നിവരെ കേസിൽ പ്രതികളാക്കിയാണ് ഹർജി ഫയൽ ചെയ്തിരിക്കുന്നത്.
ചർച്ച് ഓഫ് സൗത്ത് ഇന്ത്യ (സി.എസ്‌ഐ) ഒരു ക്രിസ്ത്യൻ വിഭാഗവും അതിനുള്ളിലെ വിഭാഗമായ എസ്‌ഐ.യു.സിയെ സംസ്ഥാനത്തെ സാമൂഹികമായും വിദ്യാഭ്യാസപരമായും പിന്നാക്കം നിൽക്കുന്ന ഒരു വിഭാഗമാണ്. ഡോ. സോമർവെൽ മെമോറിയൽ സിഎസ്ഐ മെഡിക്കൽ കോളേജിലെ മുഴുവൻ സീറ്റുകളും ക്രിസ്ത്യൻ സമൂഹത്തിന് സംവരണം ചെയ്യുമ്പോഴും കോളേജിൽ പഠിക്കുന്ന എസ്ഐയുസി വിദ്യാർത്ഥികളുടെ എണ്ണം വളരെ കുറവാണ്. മാനേജ്മെന്റിന് ഓപ്പൺ ക്യാറ്റഗറിയിൽ നിന്നുള്ള ഓപ്പൺ അഡ്‌മിഷൻ വേണ്ടെന്നുവെക്കുവാൻ സാധിക്കും പക്ഷേ കമ്മീഷണർ ഓഫ് എൻട്രൻസ് എക്സാമിനേഷൻസ് ലിസ്റ്റിൽ നിന്ന് എസ്‌ഐ.യു.സി ഉദ്യോഗാർത്ഥികൾക്ക് അഡ്‌മിഷന് നൽകാനുള്ള പ്രത്യേക സംവിധാനം ഒരുക്കണം. 80% ക്രിസ്ത്യൻ സമൂഹവും മുന്നാക്കകാരാണെന്നും അതുകൊണ്ട് എസ്‌ഐ.യു.സി അംഗങ്ങൾ ഈ മുന്നാക്കക്കാരായ ക്രിസ്ത്യാനികൾക്കെതിരെതിരെയാണ് മത്സരിക്കുന്നതെന്നും ഹർജിയിലുണ്ട്. ഇത് ഇന്ത്യൻ ഭരണഘടനയുടെ 14ാം അനുച്ഛേദം വിഭാവനം ചെയ്യുന്ന സമത്വ തത്വത്തിന് എതിരാണ്.
ഒരു വ്യക്തി ഒരു വീട് നിർമ്മിക്കുകയാണെങ്കിൽ, അവന്റെ കുടുംബത്തിൽ അപരിചിതരുടെ കുട്ടികളെ മാത്രം പാർപ്പിക്കാൻ ഒരു നിയമത്തിനും നിർബന്ധിക്കാനാവില്ല. അത്തരമൊരു വീടിന് സർക്കാരിന് പ്രത്യേക മുൻഗണനയും നൽകാനാവില്ല. മാനേജ്മെന്റ് ക്വാട്ടയിൽ മെഡിക്കൽ കോളേജുകളിലെ പ്രവേശന വിഷയങ്ങളിൽ, ന്യൂനപക്ഷങ്ങൾക്കുള്ളിൽ സംവരണത്തിന് അർഹതയുള്ള പ്രത്യേക വിഭാഗമായി എസ്‌ഐ.യു.സിയെ തരംതിരിക്കാതെ, ആർട്ടിക്കിൾ 38(2), ആർട്ടിക്കിൾ 46 എന്നിവയ്ക്ക് കീഴിലുള്ള സംസ്ഥാനത്തിന്റെ കടമയ്ക്ക് അനുമതി നൽകിയിട്ടുണ്ട്. വ്യത്യസ്ത സംസ്‌കാരവും സാമൂഹികവും വിദ്യാഭ്യാസപരവുമായ പശ്ചാത്തലവുമുള്ള ക്രിസ്ത്യൻ സമുദായങ്ങളെ അവരുടെ ആശയപരമായ ചിന്തകൾ സംരക്ഷിക്കുന്നതിനും പ്രചരിപ്പിക്കുന്നതിനും പ്രത്യേക ന്യൂനപക്ഷങ്ങളായി അംഗീകരിക്കണമെന്നും ഹർജിയിൽ പറയുന്നു.
കൂടുതൽ സ്ഥാപനങ്ങൾ വരണം, കുട്ടികൾക്ക് സ്വന്തം നാട്ടിൽ പഠിക്കണം
സ്വകാര്യ മെഡിക്കൽ കോളേജുകൾ ആരംഭിക്കാൻ മാനേജ്മെന്റുകളെ പിന്നോട്ടടിക്കുന്ന പ്രധാന പ്രശ്നം നിലവിലുള്ള തെറ്റായ ഈ പ്രവേശന രീതിയാണ്. സ്ഥാപനങ്ങളുടെ കുറവ് കാരണം കുട്ടികൾക്ക് സ്വന്തം നാട്ടിൽ പഠിക്കാനും കഴിയുന്നില്ല. നിലവിൽ സംസ്ഥാനത്തെ മൊത്തം വിദ്യാർത്ഥികളിൽ 6 ശതമാനത്തിൽ താഴെ മാത്രമേ മെഡിക്കൽ ബിരുദ കോഴ്സിന് പ്രവേശനം നേടുന്നുള്ളു. 87,000 മെഡിക്കൽ സീറ്റിനായി വർഷം തോറും 15 ലക്ഷം വിദ്യാർത്ഥികൾ നീറ്റ് പ്രവേശന പരീക്ഷയ്ക്ക് രജിസ്റ്റർ ചെയ്യുന്നു.
ചൈന, റഷ്യ, ബാൾട്ടിക് സംസ്ഥാനങ്ങൾ, ദക്ഷിണേഷ്യൻ രാജ്യങ്ങൾ, വെസ്റ്റ് ഇൻഡീസ്, യു.കെ, യു.എസ്.എ, കാനഡ എന്നിവിടങ്ങളിലേക്കുള്ള എംബിബിഎസ് പഠനത്തിനായി ഓരോ വർഷവും പോകുന്ന വിദ്യാർത്ഥികളുടെ എണ്ണം വർദ്ധിച്ചുകൊണ്ടിരിക്കുകയാണ്. ഏകദേശം 40,000 കോടി രൂപയാണ് ഓരോ വർഷവും ഇന്ത്യയിൽ നിന്നും ഇതിനായി പുറത്തേക്ക് പോകുന്നത്. മെഡിസിൻ പഠിക്കാനുള്ള വിദ്യാർത്ഥികളുടെ പുറത്തേക്കുള്ള പോക്ക് മൂലം ഇന്ത്യൻ സമ്പദ്വ്യവസ്ഥയും മാനവ വിഭവശേഷിയും തകരുന്നു. കഴിഞ്ഞ വർഷം 502 കുട്ടികളാണ് കേരളത്തിൽ പന്ത്രണ്ടാം ക്ലാസ് പരീക്ഷയിൽ 100 ശതമാനം മാർക്ക് നേടിയത്. 47,000ലധികം വിദ്യാർത്ഥികൾ 90% ന് മുകളിൽ മാർക്ക് വാങ്ങി വിജയിച്ചു. അതിൽ ഭൂരിഭാഗവും 95% ന് മുകളിൽ സ്‌കോർ ചെയ്യുകയും ചെയ്തു. ഇതിൽ സിബിഎസ്ഇ വിദ്യാർത്ഥികളുടെ കണക്കുകൾ പെടുന്നില്ല.
ഓരോ വർഷവും 20,000ത്തിലധികം വിദ്യാർത്ഥികൾ വിദേശ സർവകലാശാലകളിലേക്ക് മെഡിസിൻ പഠിക്കാൻ പോകുന്നു എന്നാണ് കണക്ക്. ഇതു പ്രകാരം കുറഞ്ഞത് 40,000 കോടി ഇന്ത്യൻ രൂപ രൂപയുടെ നഷ്ടമാണ് ഉണ്ടാകുന്നത്. വിദേശത്ത് പഠിക്കാൻ പോകുന്ന വിദ്യാർത്ഥികളുടെ എണ്ണത്തിൽ ഏറ്റവും വലിയ രണ്ടാമത്തെ രാജ്യമാണ് ഇന്ത്യ. വിദേശത്തുള്ള ഇന്ത്യൻ വിദ്യാർത്ഥികളുടെ എണ്ണം 1999ൽ 55,000ൽ നിന്ന് 2012ൽ ഏകദേശം 190,000 ആയി ഉയർന്നു.
2010ൽ ഈ സംഖ്യ 210,000 ആയി ഉയർന്നു. 2013 നും 2016 നും ഇടയിൽ വിദേശത്ത് പഠിക്കുന്ന ഇന്ത്യൻ വിദ്യാർത്ഥികളുടെ എണ്ണത്തിൽ 24 ശതമാനം വർധനവാണുണ്ടായത്. ഇതു കൂടാതെ എംബിബിഎസിന്റെ വിദ്യാഭ്യാസ നിലവാരം പല രാജ്യങ്ങളും ഇന്ത്യയേക്കാളും വളരെ പിന്നിലാണ്. ഗാർഹിക ആരോഗ്യ പരിപാലന തൊഴിലാളികളുടെ എണ്ണം ഇന്ത്യയിൽ വളരെ കുറവാണ്. എല്ലാ വൈദഗ്ധ്യമുള്ള ആരോഗ്യ പരിപാലന ഉദ്യോഗസ്ഥരുടെയും കണക്ക് നോക്കുമ്പോൾ, 2016 ൽ 10,000 ത്തിൽ 28.52 എന്നതാണ് ഇന്ത്യയിലെ അനുപാതം. പക്ഷോ ആഗോളതലത്തിൽ ഇത് 52.82 ആണ്.
