എന്റെ റെക്കോര്‍ഡ് ഞാന്‍ തന്നെ തിരുത്തും! അതും 14 തവണ; പോള്‍വാട്ടിലെ പുതിയ അത്ഭുതം അര്‍മാന്‍ഡ് ഡുപ്ലന്റിസ്; ലോക ചാമ്പ്യന്‍ഷിപ്പില്‍ ഹാട്രിക് സ്വര്‍ണ്ണം നേടിയത് സ്വന്തം റെക്കോര്‍ഡ് തിരുത്തി; അര്‍മാന്‍ഡ് വിസ്മയമാകുന്നത് എങ്ങനെ ?
അര്‍മാന്‍ഡ് വിസ്മയമാകുന്നത് എങ്ങനെ ?
ടോക്കിയോ: എന്നെ തള്ളാന്‍ ഒരാളുടെയും അവിശ്യമില്ല ഞാന്‍ തന്നെ മതി എന്ന് പറഞ്ഞത് പോലെയാണ് സ്വീഡിഷുകാരന്‍ പോള്‍വാള്‍ട്ട് താരം അര്‍മാന്‍ഡ് ഡുപ്ലന്റിസ്.ഒരു വേദിയില്‍ റെക്കോര്‍ഡ് സ്ഥാപിക്കുക, മറ്റൊരു വേദിയില്‍ അതു തിരുത്തുക. ഇതൊരു ഹോബിയായി സ്വീകരിച്ച ഡുപ്ലന്റിസ് ആ പതിവ് ടോക്കിയോയിലും ആവര്‍ത്തിച്ചു. തന്റെ തന്നെ റെക്കോര്‍ഡ് 14 ആം തവണ തിരുത്തിയാണ് ഡുപ്ലന്റീസ് ലോക അത്‌ലറ്റിക് ചാമ്പ്യന്‍ഷിപ്പില്‍ തന്റെ മൂന്നാം സ്വര്‍ണ്ണം നേടിയത്.
പോള്‍വാള്‍ട്ട് ഇതിഹാസം സെര്‍ജി ബൂബ്ക്കയുടെ 17 തവണ സ്വന്തം റെക്കോര്‍ഡ് തിരുത്തിയ നേട്ടത്തിലേക്കാണ് ഡുപ്ലന്റീസ് കുതിക്കുന്നത്. പക്ഷെ താണ്ടിയ ഉയരത്തില്‍ ബൂബ്ക്കയെകാളും ഒരുപടി മുന്നിലാണ് ഡുപ്ലന്റീസ്.1994ല്‍ താണ്ടിയ 6.14 മീറ്റര്‍, 17 തവണ തിരുത്തിയെഴുതിയാണ് ബുബ്ക കളമൊഴിഞ്ഞതെങ്കില്‍ ഇദ്ദേഹം ഇതിനോടകം തന്നെ 6.30 മീറ്റര്‍, 14-ാം തവണ താണ്ടിക്കഴിഞ്ഞു.2020ലാണ് ഡുപ്ലന്റിസ് റെക്കോര്‍ഡ് പുസ്തകത്തിലേക്ക് തന്റെ പേര് ആദ്യം എഴുതിച്ചേര്‍ത്തത്. 6.17 മീറ്റര്‍... ടോക്കിയോയിലെ ലോക അത്ലറ്റിക്ക് ചാമ്പ്യന്‍ഷിപ്പില്‍ സ്വര്‍ണ്ണത്തിലേക്ക് കടക്കുമ്പോള്‍ കുറിച്ച റെക്കോര്‍ഡ് 6.30 മീറ്റര്‍, 14-ാം തവണ. ഇതെങ്ങനെ കഴിയുന്നുവെന്നാണ് കായികലോകം ഉറ്റുനോക്കുന്നത്.
വേഗതയാണ് ഡുപ്ലന്റിസിന്റെ ഏറ്റവും വലിയ കരുത്ത്.ആ വേഗത എങ്ങനെ ഡുപ്ലന്റിസ് കൈവരിക്കുന്നു എന്നത് അതിലേറെ പ്രധാന്യമര്‍ഹിക്കുന്ന കാര്യം. ടേക്ക് ഓഫിന്റെ സമയത്ത് സെക്കന്‍ഡില്‍ 10.3 മീറ്റര്‍ വേഗത കൈവരിക്കും വിധമാണ് സ്വീഡിഷ് താരം തന്റെ റണ്ണപ്പ് പാകപ്പെടുത്തുന്നത്. മറ്റ് അത്‌ലീറ്റുകള്‍ക്ക് ഇത് സെക്കന്‍ഡില്‍ 9.4 മുതല്‍ 9.7 മീറ്റര്‍ വരെയാണ്. ഉയര്‍ന്ന് നില്‍ക്കുന്ന പോള്‍ പോള്‍ വോള്‍ട്ട് ബോക്സില്‍ കുത്തി ഉയരുന്നതിന് മുന്‍പുള്ള നിമിഷം ഡുപ്ലന്റിസിന് അസാധ്യമായ നിയന്ത്രണമുണ്ടെന്നാണ് വിദഗ്ധര്‍ ചൂണ്ടിക്കാണിക്കുന്നത്.
പോള്‍ വോള്‍ട്ട് ബോക്‌സിന്റെ ഏറ്റവും അറ്റത്തായിരിക്കും കൂടുതല്‍ അത്‌ലീറ്റുകളും പോള്‍ ലാന്‍ഡ് ചെയ്യിക്കുക. എന്നാല്‍, ഡുപ്ലന്റിസിന്റെ രീതിയിതല്ല. അതിന് കുറച്ച് മുന്‍പായി ലാന്‍ഡ് ചെയ്യിക്കും. സ്ലൈഡ് ചെയ്തായിരിക്കും ഡുപ്ലന്റിസിന്റെ പോള്‍ അറ്റത്തേക്ക് എത്തുക. അവസാന സ്റ്റെപ്പുകളില്‍ വേഗത നിലനിര്‍ത്താന്‍ സഹായിക്കുന്ന നീക്കമാണിത്. അല്ലാത്ത പക്ഷം, ടേക്ക് ഓഫ് വളരെ പെട്ടെന്ന് സംഭവിക്കുകയും നിയന്ത്രണം നഷ്ടപ്പെടാനുള്ള സാധ്യതയും ചൂണ്ടിക്കാണിക്കപ്പെടുന്നു.
ടേക്ക് ഓഫ് സമയത്ത് ഡുപ്ലന്റിസിന്റെ കൈകളും കാലും തമ്മിലുള്ള അകലം 20 മുതല്‍ 30 സെന്റി മീറ്റര്‍ വരെയായിരിക്കും. ഇത് റണ്ണപ്പില്‍ ലഭിച്ച വേഗത പൂര്‍ണമായും ഉപയോഗിക്കാനും ഇതില്‍ നിന്ന് പോള്‍ തനിക്ക് അനുയോജ്യമായ രീതിയില്‍ ബെന്‍ഡ് ചെയ്‌തെടുക്കാനും പ്രാപ്തമാക്കുന്നു. ഇതിന് ശേഷം പോള്‍ പൂര്‍ണമായും ബെന്‍ഡ് ചെയ്യുന്ന സമയത്ത് പോളിന് പിന്നിലായിരിക്കും ഡുപ്ലന്റിസിന്റെ ശരീരം. പോള്‍ നേരെയാകുന്ന സമയം പോളിന്റെ അതേ ദിശയില്‍ തലകുത്തനെയാണ് ഡുപ്ലന്റിസ് തന്റെ ശരീരം പ്ലേസ് ചെയ്യുക
ഇവിടെയാണ് ആ ഡുപ്ലന്റിസ് മൊമന്റ് സംഭവിക്കുന്നതും. ഇത്രയും നേരത്തെ പ്രോസസ് നിയന്ത്രണത്തോടെ കൃത്യമായി സംഭവിക്കുമ്പോള്‍, പോള്‍ ഗ്രിപ്പില്‍ നിന്ന് കൈ വിടുന്ന സമയം, ഉയര്‍ന്ന് പൊങ്ങാനുള്ള വെര്‍ട്ടിക്കല്‍ വെലോസിറ്റി ഡുപ്ലന്റിസ് കൈവരിക്കും. ഇത് ബാറിനെ അനായാസം മറികടക്കാന്‍ ഡുപ്ലന്റിസിനെ പ്രാപ്തമാക്കുകയും ചെയ്യുന്നു.
ഇതിനെല്ലാം പുറമെ ഡുപ്ലന്റിസ് ലോക റെക്കോര്‍ഡ് കൈവരിക്കാന്‍ ധരിക്കുന്ന ഷൂവിനും ചില പ്രത്യേകതകളുണ്ട്. ടോക്കിയോയില്‍ നടന്ന ലോക അത്ലറ്റിക്ക് ചാമ്പ്യന്‍ഷിപ്പില്‍ 6.30 മീറ്റര്‍ പോള്‍ വോള്‍ട്ട് പൂര്‍ത്തിയാക്കിയപ്പോള്‍ ഡുപ്ലന്റിസ് ധരിച്ച ഷൂ ശ്രദ്ധിക്കുക. പ്യൂമ നിര്‍മ്മിച്ച പ്രത്യേക ഷൂവിന്റെ മുന്‍ ഭാഗത്തായി കൂര്‍ത്ത രൂപത്തിലുള്ള അഗ്രം കാണാനാകും. ഇത് തന്റെ റണ്ണപ്പിലെ ഏറ്റവും മികച്ച വേഗത കൈവരിക്കാന്‍ സഹായിക്കുമെന്നാണ് താരം പറയുന്നത്. റണ്ണപ്പിന്റെ കാര്യത്തില്‍ ഷൂ തനിക്ക് മുന്‍തൂക്കം നേടിത്തരുന്നുണ്ടെന്നും ഡുപ്ലന്റിസ് വ്യക്തമാക്കിയിട്ടുണ്ട്.
