ഫുൾഹാമിനെതിരെ രണ്ടടിച്ച് ചെൽസി; ഗോൾ നേടിയത് ജാവോ പെഡ്രോയും, എൻസോ ഫെർണാണ്ടസും; സ്റ്റാംഫോർഡ് ബ്രിഡ്ജിൽ തുടർച്ചയായ ഒമ്പതാം മത്സരത്തിലും നീലപ്പടക്ക് ക്ലീൻ ഷീറ്റ്
ലണ്ടൻ: ഇംഗ്ലീഷ് പ്രീമിയർ ലീഗിൽ ഫുൾഹാമിനെ 2-0 ന് പരാജയപ്പെടുത്തി ചെൽസിക്ക് നിർണായക ജയം. ജോവോ പെഡ്രോയും എൻസോ ഫെർണാണ്ടസും നേടിയ ഗോളുകളാണ് നീലപ്പടക്ക് സ്റ്റാംഫോർഡ് ബ്രിഡ്ജിൽ വിജയം സമ്മാനിച്ചത്. ഈ വിജയത്തോടെ മൂന്ന് മത്സരങ്ങളിൽ നിന്ന് ഏഴ് പോയിൻ്റുമായി ചെൽസി ലീഗ് പട്ടികയിൽ ഒന്നാം സ്ഥാനത്തെത്തി.
കളിയുടെ തുടക്കത്തിൽ ഫുൾഹാം ഒരു ഗോൾ നേടിയെങ്കിലും വാർ (VAR) പരിശോധനയിൽ അത് റദ്ദാക്കി. 21-ാം മിനിറ്റിൽ ജോഷ് കിങ് നേടിയ ഗോൾ ഫൗളിൻ്റെ പേരിൽ റഫറി റദ്ദാക്കുകയായിരുന്നു. ആദ്യ പകുതി അവസാനിക്കുന്നതിന് തൊട്ടുമുമ്പ്, ഇഞ്ചുറി ടൈമിൽ എൻസോ ഫെർണാണ്ടസ് എടുത്ത കോർണർ കിക്കിൽ നിന്ന് ജോവോ പെഡ്രോ ഹെഡ്ഡറിലൂടെ ചെൽസിക്കായി ആദ്യ ഗോൾ നേടി. ബ്രൈറ്റണിൽ നിന്ന് 55 ദശലക്ഷം പൗണ്ടിന് ചെൽസിയിലെത്തിയ ശേഷം കളിച്ച അഞ്ച് മത്സരങ്ങളിൽ ഇത് പെഡ്രോയുടെ അഞ്ചാം ഗോളാണ്.
രണ്ടാം പകുതിയിൽ 49-ാം മിനിറ്റിൽ ലഭിച്ച പെനാൽറ്റിയിലൂടെ ക്യാപ്റ്റൻ എൻസോ ഫെർണാണ്ടസ് ചെൽസിയുടെ ലീഡ് രണ്ടാക്കി. ഫുൾഹാം താരം റ്യാൻ സെസെഗ്നോൺ ബോക്സിനുള്ളിൽ പന്ത് കൈകൊണ്ട് തടുത്തതിനെ തുടർന്നാണ് പെനാൽറ്റി അനുവദിച്ചത്. വാർ പരിശോധനക്ക് ശേഷമാണ് റഫറി ഈ തീരുമാനമെടുത്തത്.
സ്വന്തം തട്ടകമായ സ്റ്റാംഫോർഡ് ബ്രിഡ്ജിൽ തുടർച്ചയായ ഒമ്പതാം പ്രീമിയർ ലീഗ് മത്സരത്തിലും ചെൽസിക്ക് ഗോൾ വഴങ്ങാതെ പ്രതിരോധം ശക്തമാക്കാൻ കഴിഞ്ഞു എന്നത് ശ്രദ്ധേയമാണ്. കളിയുടെ പല ഘട്ടങ്ങളിലും റഫറിയുടെ തീരുമാനങ്ങൾ വിവാദങ്ങൾ ഉയർത്തിയെങ്കിലും, അവസാന വിജയം ചെൽസിക്കൊപ്പമായിരുന്നു. നിലവിൽ രണ്ട് കളികൾ ജയിച്ച ആഴ്സനൽ, ടോട്ടൻഹാം, ലിവർപൂൾ ടീമുകൾ ചെൽസിയുടെ തൊട്ടുപിന്നിലുണ്ട്.
