ഡൽഹി: വനിതാ പ്രീമിയർ ലീഗ് 2026-ന്റെ മെഗാ ലേലത്തിൽ മലയാളി ലെഗ് സ്പിന്നർ ആശ ശോഭനയ്ക്ക് റെക്കോർഡ് നേട്ടം. റോയൽ ചലഞ്ചേഴ്സ് ബാംഗ്ലൂർ (ആർ.സി.ബി.) താരമായിരുന്ന ആശയെ 1.1 കോടി രൂപയ്ക്ക് യു.പി. വാരിയേഴ്സ് (യു.പി.ഡബ്ല്യു.) സ്വന്തമാക്കി. 30 ലക്ഷം രൂപ അടിസ്ഥാന വിലയുണ്ടായിരുന്ന താരത്തിന് വേണ്ടി ഡൽഹി ക്യാപിറ്റൽസും യു.പി. വാരിയേഴ്സും തമ്മിലായിരുന്നു പ്രധാനമായും ലേലം നടന്നത്.

ഡൽഹി ക്യാപിറ്റൽസ് ലേലം ആരംഭിച്ചതോടെ തന്നെ താരത്തിന് വേണ്ടിയുള്ള ആവശ്യകത ഉയർന്നു. 30 ലക്ഷത്തിൽ നിന്ന് ആരംഭിച്ച ലേലത്തുക അതിവേഗം 75 ലക്ഷം രൂപ കടന്നു. ഈ ഘട്ടത്തിൽ റോയൽ ചലഞ്ചേഴ്സ് ബാംഗ്ലൂരും ലേലത്തിൽ പങ്കെടുത്തു. തുടർന്ന് വില 1 കോടി രൂപ കടന്ന് കുതിച്ചുയർന്നു. ഒടുവിൽ 1.10 കോടി രൂപയ്ക്ക് ആശയെ സ്വന്തമാക്കി യു.പി. വാരിയേഴ്സ് തങ്ങളുടെ സ്ക്വാഡിലെത്തിക്കുകയായിരുന്നു. 34-കാരിയായ ആശ ശോഭന 2024-ലെ വനിതാ പ്രീമിയർ ലീഗ് സീസണിൽ ആർ.സി.ബി കിരീടം നേടുന്നതിൽ നിർണായക പങ്ക് വഹിച്ചിരുന്നു.

ടൂർണമെന്റിൽ ഏറ്റവും കൂടുതൽ വിക്കറ്റ് നേടിയവരിൽ രണ്ടാമതായിരുന്നു ഈ മലയാളി ലെഗ് സ്പിന്നർ. 12 വിക്കറ്റുകളാണ് ആശ അന്ന് സ്വന്തമാക്കിയത്. കൂടാതെ വനിതാ പ്രീമിയർ ലീഗ് ചരിത്രത്തിൽ ഒരു അഞ്ച് വിക്കറ്റ് നേട്ടം (5/22) സ്വന്തമാക്കിയ ആദ്യ ആർ.സി.ബി. ബൗളർ എന്ന ബഹുമതിയും ആശ ശോഭനയ്ക്കുണ്ട്. കഴിഞ്ഞ വർഷം പരിക്കിനെ തുടർന്ന് 2025 സീസണിൽ ആശയ്ക്ക് കളിക്കാൻ സാധിച്ചിരുന്നില്ല. എങ്കിലും ഫോമിൽ തിരിച്ചെത്തിയാൽ ആശയുടെ സ്പിൻ യു.പി. വാരിയേഴ്സിന് വലിയ മുതൽക്കൂട്ടാകും.

നിലവിൽ ഇന്ത്യയുടെ ദേശീയ ടീമിനായി രണ്ട് ഏകദിനങ്ങളിലും ആറ് ടി20 മത്സരങ്ങളിലും ഈ വെറ്ററൻ താരം കളിച്ചിട്ടുണ്ട്. ഈ മെഗാ ലേലത്തിൽ ഏറ്റവും വലിയ പേഴ്സുമായി എത്തിയ യു.പി. വാരിയേഴ്സ്, ഇന്ത്യൻ ഓൾറൗണ്ടർ ദീപ്തി ശർമ്മയെ 3.2 കോടി രൂപയ്ക്ക് തിരികെ ടീമിലെത്തിക്കുകയും ഓസ്ട്രേലിയൻ ഇതിഹാസ താരവും ഡൽഹി ക്യാപിറ്റൽസിന്റെ മുൻ നായികയുമായിരുന്ന മെഗ് ലാനിങ്ങിനെ 1.9 കോടി രൂപയ്ക്ക് സ്വന്തമാക്കുകയും ചെയ്തിട്ടുണ്ട്.

വനിതാ പ്രീമിയർ ലീഗ്മലയാളി ലെഗ് സ്പിന്നർആശ ശോഭന

സ്വന്തം ലേഖകൻ