ക്വീൻസ്‌ലൻഡ്: ഓസ്‌ട്രേലിയൻ ക്രിക്കറ്റ് ഇതിഹാസം ഡോൺ ബ്രാഡ്മാൻ ഉപയോഗിച്ചിരുന്ന 'ബാഗി ഗ്രീൻ' തൊപ്പിക്ക് ലേലത്തിൽ റെക്കോർഡ് തുക. 2.92 കോടി രൂപയ്ക്കാണ് (4.60 ലക്ഷം ഓസ്‌ട്രേലിയൻ ഡോളർ) തൊപ്പി വിറ്റത്. ലോയ്ഡ്‌സ് ഓക്ഷൻ കമ്പനി കഴിഞ്ഞ ദിവസം നടത്തിയ ലേലത്തിലാണ് ഈ ചരിത്രപ്രധാനമായ വസ്തു ഗോൾഡ് കോസ്റ്റിൽ നിന്നുള്ള ഒരു വ്യക്തി സ്വന്തമാക്കിയത്.

1947-48 വർഷത്തിൽ ഇന്ത്യക്കെതിരേ ഓസ്‌ട്രേലിയയിൽ നടന്ന ടെസ്റ്റ് പരമ്പരയിൽ ബ്രാഡ്മാൻ ധരിച്ച തൊപ്പിയാണിത്. സ്വാതന്ത്ര്യാനന്തരം ഇന്ത്യ കളിച്ച ആദ്യ ടെസ്റ്റ് പരമ്പരയായിരുന്നു ഇത്. സ്വന്തം നാട്ടിൽ ബ്രാഡ്മാന്റെ അവസാന പരമ്പരയും കൂടിയായിരുന്നു ആ പരമ്പര. മത്സരശേഷം, ബ്രാഡ്മാൻ ഈ തൊപ്പി ഇന്ത്യയുടെ ഓപ്പണിങ് ബൗളറായിരുന്ന ശ്രീരംഗ വാസുദേവ് സൊഹോനിക്ക് സമ്മാനിക്കുകയായിരുന്നു.

ഏഴു പതിറ്റാണ്ടിലേറെക്കാലം സൊഹോനിയുടെ കുടുംബം സൂക്ഷിച്ചുവെച്ചശേഷമാണ് ഈ തൊപ്പി ഇപ്പോൾ ലേലത്തിനെത്തിയത്. 1928 മുതൽ 1948 വരെ ഓസ്‌ട്രേലിയക്ക് വേണ്ടി കളിച്ച ഡോൺ ബ്രാഡ്മാൻ, ലോക ക്രിക്കറ്റിലെ എക്കാലത്തെയും മികച്ച ബാറ്ററായാണ് വിലയിരുത്തപ്പെടുന്നത്. ടെസ്റ്റ് ക്രിക്കറ്റിൽ 99.94 എന്ന അവിശ്വസനീയമായ ബാറ്റിങ് ശരാശരി അദ്ദേഹത്തിന്റെ പേരിലുണ്ട്.

ഓസ്‌ട്രേലിയക്രിക്കറ്റ് ഇതിഹാസംഡോൺ ബ്രാഡ്മാൻ

സ്വന്തം ലേഖകൻ