'ഈ വര്‍ഷം, ഞാന്‍ ഒരു പുതിയ വെല്ലുവിളി ഏറ്റെടുക്കാന്‍ തീരുമാനിച്ചു'; ഇത്തവണ ഐ പി എല്ലിന് ഇല്ലെന്ന് പ്രഖ്യാപിച്ച് ഫാഫ് ഡുപ്ലെസിസ്; ഈ സിസണില്‍ ഭാഗമാവുക പാകിസ്ഥാന്‍ സൂപ്പര്‍ ലീഗില്‍; ഭാവിയില്‍ തിരിച്ചുവരുമെന്നും താരം
ഫാഫ് ഡു പ്ലെസിസ് 2026-ലെ ഐ.പി.എല്‍ സീസണില്‍ നിന്നും പിന്മാറി.
ജോഹന്നാസ്ബര്‍ഗ് : ദക്ഷിണാഫ്രിക്കന്‍ ക്രിക്കറ്റ് ടീം മുന്‍ നായകന്‍ ഫാഫ് ഡു പ്ലെസിസ് 2026-ലെ ഇന്ത്യന്‍ പ്രീമിയര്‍ ലീഗ് (ഐ.പി.എല്‍) സീസണില്‍ നിന്നും പിന്മാറി. അടുത്ത മാസം നടക്കാനിരിക്കുന്ന താരലേലത്തില്‍ തന്റെ പേര് ഉണ്ടാവില്ലെന്ന് ഡുപ്ലെസിസ് പ്രസ്താവനയിലൂടെ അറിയിച്ചു. ഇത്തവണ പാക്കിസ്ഥാന്‍ സൂപ്പര്‍ ലീഗിന്റെ ഭാഗമാകുമെന്നും അദ്ദേഹം പറഞ്ഞു. ഭാവിയില്‍ തീര്‍ച്ചയായും ഐപിഎല്ലിലേക്ക് തിരിച്ചുവരുമെന്നും ഡു പ്ലെസി വ്യക്തമാക്കി.
'ഐപിഎല്ലിലെ 14 സീസണുകള്‍ക്ക് ശേഷം, ഈ വര്‍ഷത്തെ ലേലത്തില്‍ എന്റെ പേര് നല്‍കാതിരിക്കാന്‍ ഞാന്‍ തീരുമാനിച്ചു. ഈ ലീഗ് എന്റെ യാത്രയുടെ വലിയൊരു ഭാഗമായിരുന്നു. ലോകോത്തര താരങ്ങള്‍ക്കൊപ്പം മികച്ച ഫ്രാഞ്ചൈസികള്‍ക്കുവേണ്ടി കളിക്കാന്‍ എനിക്ക് ഭാഗ്യംലഭിച്ചു'',ഡുപ്ലെസിസ് സാമൂഹികമാധ്യമങ്ങളില്‍ കുറിച്ചു.
'പതിനാല് വര്‍ഷം വലിയകാലമാണ്. ഈ അധ്യായം എനിക്ക് എത്രമാത്രം വിലപ്പെട്ടതായിരുന്നു എന്നതില്‍ ഞാന്‍ അഭിമാനിക്കുന്നു. എന്റെ ഹൃദയത്തില്‍ ഇന്ത്യയ്ക്ക് പ്രത്യേക സ്ഥാനമുണ്ട്. ഇതൊരിക്കലും ഒരു വിടവാങ്ങലല്ല, നിങ്ങള്‍ എന്നെ വീണ്ടും കാണും'',അദ്ദേഹം കുറിച്ചു.
ഈ വര്‍ഷം, ഒരു പുതിയ വെല്ലുവിളി ഏറ്റെടുക്കാന്‍ തീരുമാനിച്ചതായും വരാനിരിക്കുന്ന പിഎസ്എല്‍ സീസണില്‍ കളിക്കുമെന്നും ഡുപ്ലെസിസ് കൂട്ടിച്ചേര്‍ത്തു.ഐപിഎല്ലില്‍ 154 മത്സരങ്ങള്‍ കളിച്ച ഡു പ്ലെസിസ് 4,773 റണ്‍സെടുത്തിട്ടുണ്ട്. ചെന്നൈ സൂപ്പര്‍ കിങ്‌സ്, റൈസിങ് പൂനെ സൂപ്പര്‍ ജയന്റ്‌സ്, റോയല്‍ ചലഞ്ചേഴ്‌സ് ബെംഗളൂരു, ഡല്‍ഹി ക്യാപിറ്റല്‍സ് തുടങ്ങിയ ടീമുകളില്‍ ഡു പ്ലെസിസ് കളിച്ചിട്ടുണ്ട്.
ഇതില്‍ ഏഴ് സീസണുകള്‍ ചെന്നൈ സൂപ്പര്‍ കിങ്‌സിനൊപ്പമായിരുന്നു ഡു പ്ലെസി കളിച്ചത്. 2018, 2021 സീസണുകളില്‍ ഡു പ്ലെസി ചെന്നൈയ്‌ക്കൊപ്പം കിരീടം സ്വന്തമാക്കി.2022-ല്‍ റോയല്‍ ചലഞ്ചേഴ്‌സ് ബെംഗളൂരുവിലെത്തി. 2024-ല്‍ ഡല്‍ഹിയിലേക്ക് കൂടുമാറിയ താരത്തെ ഇക്കുറി നിലനിര്‍ത്താന്‍ ടീം തയ്യാറായിരുന്നില്ല.
