ഐപിഎല്‍: പ്ലേഓഫ് മത്സരങ്ങളുമായി ബന്ധപ്പെട്ട് ഭേദഗതികളുമായി ബിസിസിഐ; പ്ലേ ഓഫ് വേദികള്‍ പ്രഖ്യാപിച്ചു; ഫൈനല്‍ നരേന്ദ്രമോദി സ്റ്റേഡിയത്തില്‍
ന്യൂഡല്‍ഹി: ഇന്ത്യന്‍ പ്രീമിയര്‍ ലീഗിന്റെ (ഐപിഎല്‍) ഈ സീസണിലെ പ്ലേഓഫ് മത്സരങ്ങളുമായി ബന്ധപ്പെട്ട് ഭേദഗതികളുമായി ബിസിസിഐ. മുമ്പ് നിശ്ചയിച്ച ഹൈദരാബാദ്-കൊല്‍ക്കത്ത വേദികളില്‍നിന്ന് പിന്മാറി, ന്യൂ ചണ്ഡീഗഢും അഹമ്മദാബാദുമാണ് പുതിയ വേദികള്‍. പിസിഎ സ്റ്റേഡിയം, ന്യൂ ചണ്ഡീഗഢയിലാണ് ക്വാളിഫയര്‍ 1 മെയ് 28ന്, എലിമിനേറ്റര്‍ മെയ് 29ന് നടക്കുന്നത്. തുടര്‍ന്ന്, ക്വാളിഫയര്‍ 2യും (മെയ് 31) ഫൈനലും (ജൂണ്‍ 3) അഹമ്മദാബാദിലെ നരേന്ദ്രമോദി സ്റ്റേഡിയത്തില്‍ വച്ചായിരിക്കും.
ക്വാളിഫയര്‍ 1 ലീഗ് റൗണ്ടിലെ ഒന്നും രണ്ടും സ്ഥാനങ്ങളിലുള്ള ടീമുകള്‍ ഏറ്റുമുട്ടും. വിജയി നേരിട്ട് ഫൈനലിലേക്ക്. എലിമിനേറ്റര്‍ മൂന്നും നാലും സ്ഥാനക്കാരായ ടീമുകള്‍ ഏറ്റുമുട്ടും. തോല്‍ക്കുന്ന ടീം പുറത്താകും. ക്വാളിഫയര്‍ 2 ക്വാളിഫയര്‍ 1ല്‍ തോറ്റവരും എലിമിനേറ്ററില്‍ ജയിച്ചവരുമാണ് പങ്കെടുക്കുന്നത്. ഫൈനല്‍ രണ്ട് ക്വാളിഫയര്‍ മത്സരങ്ങളിലേയും വിജയികള്‍ തമ്മില്‍ കിരീടത്തിനായി ഏറ്റുമുട്ടും.
കാലാവസ്ഥയും മറ്റുമാനദണ്ഡങ്ങളും പരിഗണിച്ചാണ് വേദികള്‍ നിശ്ചയിച്ചത്. ഐപിഎല്‍ ഗവേണിങ് കൗണ്‍സിലിന്റേതാണ് തീരുമാനം. ബെംഗളൂരുവും ഹൈദരാബാദും തമ്മിലുള്ള മത്സരത്തിന്റെ വേദിയും മാറ്റിയിട്ടുണ്ട്. ബെംഗളൂരുവിലെ പ്രതികൂലമായ കാലാവസ്ഥ കണക്കിലെടുത്ത് ലഖ്നൗവിലെ ഏകന സ്റ്റേഡിയത്തിലേക്കാണ് മത്സരം മാറ്റിയത്.
