'പ്രതിസന്ധിയിൽ എല്ലാവരും നായകനെ നോക്കി, യഥാർത്ഥ ക്യാപ്റ്റനെപ്പോലെ അവൻ അത് നിറവേറ്റി'; എന്തൊരു ഇന്നിംഗ്സ്; സൂര്യകുമാറിനെ പ്രശംസിച്ച് ഇർഫാൻ പത്താൻ
മുംബൈ: ടി20 ലോകകപ്പിന്റെ ഉദ്ഘാടന മത്സരത്തിൽ യുഎസ്എയ്ക്കെതിരെ വാങ്കഡെ സ്റ്റേഡിയത്തിൽ ഇന്ത്യയെ വൻ നാണക്കേടിൽ നിന്ന് രക്ഷിച്ച ക്യാപ്റ്റൻ സൂര്യകുമാർ യാദവിന്റെ തകർപ്പൻ പ്രകടനത്തെ പ്രശംസിച്ച് മുൻ താരം ഇർഫാൻ പത്താൻ. അതേസമയം, ഇന്ത്യൻ ബാറ്റർമാരുടെ മോശം ബാറ്റിംഗ് ശൈലിയെ അദ്ദേഹം രൂക്ഷമായി വിമർശിക്കുകയും ചെയ്തു.
സ്വന്തം തട്ടകമായ വാങ്കഡെയിൽ ടീം ഇന്ത്യ തകർന്നടിഞ്ഞപ്പോൾ സൂര്യകുമാർ നടത്തിയ വീരോചിത പോരാട്ടമാണ് ഇന്ത്യയ്ക്ക് പൊരുതാവുന്ന സ്കോർ സമ്മാനിച്ചത്. 100 റൺസ് തികയ്ക്കുന്നതിന് മുൻപേ ആറ് വിക്കറ്റുകൾ നഷ്ടമായ ഇന്ത്യയെ സൂര്യയുടെ അർധസെഞ്ച്വറിയാണ് കരകയറ്റിയത്. "ടീം പ്രതിസന്ധിയിലാകുമ്പോൾ എല്ലാവരും നായകനെയാണ് നോക്കുന്നത്. സൂര്യകുമാർ യാദവ് ഒരു യഥാർത്ഥ ക്യാപ്റ്റനെപ്പോലെ അത് നിറവേറ്റി. എന്തൊരു ഇന്നിംഗ്സ്!" - ഇർഫാൻ പത്താൻ എക്സിൽ (X) കുറിച്ചു.
മത്സരത്തിൽ ടോസ് നേടിയ യുഎസ്എ ഫീൽഡിംഗ് തിരഞ്ഞെടുക്കുകയായിരുന്നു. അഭിഷേക് ശർമ്മ പൂജ്യത്തിന് പുറത്തായെങ്കിലും ഇഷാൻ കിഷനും (20) തിലക് വർമ്മയും (25) ചേർന്ന് 37 റൺസിന്റെ കൂട്ടുകെട്ടുണ്ടാക്കി. എന്നാൽ ഷാഡ്ലി വാൻ ഷാൽക്വിക് (4/25) ഇരുവരെയും പുറത്താക്കിയതോടെ ഇന്ത്യയുടെ തകർച്ച തുടങ്ങി. ശിവം ദുബെ (0), റിങ്കു സിംഗ് (6), ഹാർദിക് പാണ്ഡ്യ (5) എന്നിവർ നിരാശപ്പെടുത്തിയതോടെ ഇന്ത്യ 77-ന് 6 എന്ന നിലയിലേക്ക് കൂപ്പുകുത്തി.
എന്നാൽ ഒറ്റയാൾ പോരാട്ടം നടത്തിയ നായകൻ സൂര്യകുമാർ (49 പന്തിൽ 84*) 10 ഫോറുകളുടെയും 4 സിക്സറുകളുടെയും അകമ്പടിയോടെ ഇന്ത്യയെ 20 ഓവറിൽ 161/9 എന്ന സ്കോറിലെത്തിച്ചു. യുഎസ്എയ്ക്ക് വേണ്ടി ഹർമീത് സിംഗ് (2/26), മുഹമ്മദ് മൊഹ്സിൻ (1/16) എന്നിവർ മികച്ച ബൗളിംഗ് കാഴ്ചവെച്ചു.
