ചെന്നൈ: ഐപിഎല്ലിന്റെ പുതിയ പതിപ്പിന് ആവേശം പകർന്ന് ചെന്നൈ സൂപ്പർ കിംഗ്‌സ് സീസണിലേക്കുള്ള ജേഴ്സി പുറത്തിറക്കി. 'എല്ലാം പുതിയതാണ്, എല്ലാം നിങ്ങൾക്കായി മാത്രം' എന്ന ടാഗ്‌ലൈനോടെ പുറത്തിറക്കിയ ജേഴ്സിയിൽ അത്യാധുനിക ഡിസൈനുകളാണ് ഉൾപ്പെടുത്തിയിരിക്കുന്നത്. കഴിഞ്ഞ സീസണിലെ തിരിച്ചടികൾക്ക് ശേഷം കരുത്തുറ്റ തിരിച്ചുവരവിനൊരുങ്ങുന്ന ചെന്നൈ, വമ്പൻ മാറ്റങ്ങളുമായാണ് ഇത്തവണ എത്തുന്നത്.

നായകൻ റുതുരാജ് ഗെയ്‌ക്‌വാദിന്റെ നേതൃത്വത്തിൽ പുറത്തിറക്കിയ വീഡിയോയിൽ എം.എസ് ധോണിയും പ്രധാന വേഷത്തിലെത്തുന്നുണ്ട്. രാജസ്ഥാൻ റോയൽസിൽ നിന്ന് മെഗാ ട്രേഡിലൂടെ ചെന്നൈയിലെത്തിയ മലയാളി താരം സഞ്ജു സാംസണെ വീഡിയോയിൽ പ്രത്യേകമായി പരാമർശിച്ചിട്ടുണ്ട്. സഞ്ജുവിന്റെ വരവ് ടീമിന്റെ ബാറ്റിംഗ് നിരയ്ക്ക് കൂടുതൽ കരുത്തേകുമെന്നാണ് ആരാധകരുടെ പ്രതീക്ഷ.

ഐക്കോണിക് 'കാനറി യെല്ലോ' നിറത്തിനൊപ്പം ഇന്ത്യൻ സായുധ സേനയോടുള്ള ആദരസൂചകമായി തോളിൽ 'ക്യാമഫ്ലേജ്' സ്ട്രിപ്പുകളും ഇത്തവണ നിലനിർത്തിയിട്ടുണ്ട്. ഇത്തിഹാദ് എയർവേയ്‌സാണ് പ്രധാന സ്പോൺസർ. കടുത്ത ചൂടിനെ പ്രതിരോധിക്കാൻ പുനരുപയോഗം ചെയ്ത പോളിസ്റ്ററിൽ നിർമ്മിച്ച 'മോയിസ്ചർ വിക്കിംഗ്' സാങ്കേതികവിദ്യയാണ് ജേഴ്സിയിൽ ഉപയോഗിച്ചിരിക്കുന്നത്.

ആരാധകർക്കായി മൂന്ന് വ്യത്യസ്ത വിഭാഗങ്ങളിലാണ് ജേഴ്സി വിപണിയിലെത്തുന്നത്:

പ്ലെയർ എഡിഷൻ: താരങ്ങൾ ഗ്രൗണ്ടിൽ ധരിക്കുന്ന ഔദ്യോഗിക ജേഴ്സി (4,999 - 5,999 രൂപ).

റിപ്ലിക്ക എഡിഷൻ: പ്രീമിയം നിലവാരമുള്ള ആരാധകർക്കായുള്ള പതിപ്പ് (2,499 - 2,999 രൂപ).

ഫാൻ എഡിഷൻ: കുറഞ്ഞ വിലയിൽ ലഭ്യമാകുന്ന സാധാരണ ആരാധകർക്കായുള്ള ജേഴ്സി (799 - 1,299 രൂപ).

ഐപിഎൽചെന്നൈ സൂപ്പർ കിംഗ്‌സ്ജേഴ്സി

സ്വന്തം ലേഖകൻ