ലക്‌നൗ: സയ്യിദ് മുഷ്താഖ് അലി ടി20 ടൂർണമെന്റിൽ ഛത്തീസ്ഗഢിനെതിരെ കേരളത്തിന് തകർപ്പൻ ജയം. ലക്‌നൗവിൽ നടന്ന മത്സരത്തിൽ എട്ട് വിക്കറ്റിനാണ് കേരളം ഛത്തീസ്ഗഢിനെ പരാജയപ്പെടുത്തിയത്. 121 റൺസ് വിജയലക്ഷ്യം പിന്തുടർന്ന കേരളം, ക്യാപ്റ്റൻ സഞ്ജു സാംസൺ (15 പന്തിൽ 43), രോഹൻ കുന്നുമ്മൽ (17 പന്തിൽ 33) എന്നിവർ നൽകിയ വെടിക്കെട്ട് തുടക്കത്തിൽ 10.4 ഓവറിൽ രണ്ട് വിക്കറ്റ് മാത്രം നഷ്ടത്തിൽ അനായാസം വിജയം സ്വന്തമാക്കി. ടൂർണമെന്റിൽ കേരളത്തിന്റെ മൂന്ന് മത്സരങ്ങളിലെ രണ്ടാം വിജയമാണിത്.

നേരത്തെ, ടോസ് നഷ്ടപ്പെട്ട് ബാറ്റിംഗിനിറങ്ങിയ ഛത്തീസ്ഗഢ് 19.5 ഓവറിൽ 120 റൺസിന് എല്ലാവരും പുറത്തായി. അമൻദീപ് ഖാരെ (41), സഞ്ജിത് ദേശായി (35) എന്നിവർക്ക് മാത്രമാണ് ഛത്തീസ്ഗഡ് നിരയിൽ ഭേദപ്പെട്ട പ്രകടനം കാഴ്ചവെക്കാൻ സാധിച്ചത്. ശശാങ്ക് ചന്ദ്രകർ (17) മാത്രമാണ് രണ്ടക്കം കടന്ന മറ്റൊരു താരം. കേരളത്തിനായി കെ എം ആസിഫ് മൂന്ന് വിക്കറ്റ് വീഴ്ത്തി മികച്ച ബൗളിംഗ് പ്രകടനം കാഴ്ചവെച്ചു. അങ്കിത് ശർമ്മ, വിഘ്‌നേഷ് പുത്തൂർ എന്നിവർ രണ്ട് വിക്കറ്റ് വീതം നേടി തിളങ്ങി.

മറുപടി ബാറ്റിംഗിനിറങ്ങിയ കേരളത്തിനായി സഞ്ജു സാംസണും രോഹൻ കുന്നുമ്മലും ചേർന്ന് ഒന്നാം വിക്കറ്റിൽ 72 റൺസിന്റെ കൂട്ടുകെട്ടുണ്ടാക്കി. അഞ്ച് സിക്സും രണ്ട് ഫോറുമടക്കം 15 പന്തിൽ 43 റൺസ് നേടിയ സഞ്ജുവിനെ അഞ്ചാം ഓവറിൽ രവി കിരൺ പുറത്താക്കുകയായിരുന്നു. തൊട്ടടുത്ത ഓവറിൽ 17 പന്തിൽ രണ്ട് സിക്സും മൂന്ന് ഫോറുമടക്കം 33 റൺസ് നേടിയ രോഹൻ കുന്നുമ്മലും മടങ്ങി.

പിന്നീട് ഒത്തുചേർന്ന സൽമാൻ നിസാർ (പുറത്താവാതെ 16), വിഷ്ണു വിനോദ് (പുറത്താവാതെ 22) എന്നിവർ ചേർന്ന് കൂടുതൽ വിക്കറ്റ് നഷ്ടമില്ലാതെ കേരളത്തെ വിജയത്തിലെത്തിക്കുകയായിരുന്നു. ഛത്തീസ്ഗഡ് ബാറ്റിംഗ് നിരയിൽ അമൻദീപ്, സഞ്ജീത്, ശശാങ്ക് എന്നിവരൊഴികെ ആയുഷ് പാണ്ഡെ (0), ശശാങ്ക് സിംഗ് (0), അജയ് മണ്ഡൽ (1), പ്രതീക് യാദവ് (4), ആനന്ദ് റാവു (3), ശുഭം അഗർവാൾ (6), രവി കിരൺ (1) എന്നിവരെല്ലാം ചെറിയ സ്കോറുകൾക്ക് പുറത്തായി. മൂന്ന് മത്സരങ്ങളില്‍ കേരളത്തിന്റെ രണ്ടാം ജയമാണിത്.

സയ്യിദ് മുഷ്താഖ് അലിസഞ്ജുകേരളം

സ്വന്തം ലേഖകൻ