ഇൻഡോർ: അണ്ടർ-15 വനിതാ ഏകദിന ടൂർണമെന്‍റിൽ കേരളത്തിനെതിരെ ഹരിയാനയ്ക്ക് ഒൻപത് വിക്കറ്റ് വിജയം. ഓപ്പണർ ഖുഷി ഛില്ലാറിന്‍റെ തകർപ്പൻ സെഞ്ചുറിയുടെ മികവിലാണ് ഹരിയാന അനായാസ ജയം സ്വന്തമാക്കിയത്. ആദ്യം ബാറ്റ് ചെയ്ത കേരളം നിശ്ചിത 35 ഓവറിൽ ആറ് വിക്കറ്റ് നഷ്ടത്തിൽ 162 റൺസെടുത്തപ്പോൾ, മറുപടി ബാറ്റിങ്ങിന് ഇറങ്ങിയ ഹരിയാന 28.1 ഓവറിൽ ഒരു വിക്കറ്റ് മാത്രം നഷ്ടപ്പെടുത്തി ലക്ഷ്യം മറികടന്നു.

ഹരിയാനയുടെ വിജയശിൽപ്പി ഖുഷി ഛില്ലാർ 97 പന്തുകളിൽ 16 ബൗണ്ടറികളും ഒരു സിക്സുമടക്കം പുറത്താകാതെ 106 റൺസ് നേടി. സഹ ഓപ്പണർ സന ദേസ്വാളുമായി ചേർന്ന് 92 റൺസിന്‍റെ കൂട്ടുകെട്ട് പടുത്തുയർത്തി. സന 29 റൺസെടുത്ത് റണ്ണൗട്ടായെങ്കിലും, പിന്നീട് ക്രീസിലെത്തിയ മന്വി ചിത്രയ്ക്കൊപ്പം (22* റൺസ്) ചേർന്ന് ഖുഷി ഹരിയാനയെ വിജയത്തിലേക്ക് നയിക്കുകയായിരുന്നു.

ടോസ് നേടി ബാറ്റിങ് തിരഞ്ഞെടുത്ത കേരളത്തിന് വേണ്ടി ഓപ്പണർമാരായ ആര്യനന്ദയും ഇവാന ഷാനിയും മികച്ച തുടക്കമാണ് നൽകിയത്. ഇരുവരും ചേർന്ന് 74 റൺസ് കൂട്ടിച്ചേർത്തു. ആര്യനന്ദ 39 റൺസെടുത്ത് പുറത്തായപ്പോൾ, ക്യാപ്റ്റൻ ഇവാന ഷാനി 43 റൺസുമായി കേരളത്തിന്‍റെ ടോപ് സ്കോററായി. വൈഗ അഖിലേഷ് അക്കൗണ്ട് തുറക്കാതെ റണ്ണൗട്ടായി മടങ്ങിയെങ്കിലും, ജൊഹീന ജിക്കുപാൽ 20 റൺസും ഷിവാനി എം 27 റൺസും നേടി സ്കോർ 162-ൽ എത്തിക്കാൻ സഹായിച്ചു. ഹരിയാനയ്ക്ക് വേണ്ടി നിയ റാണ രണ്ട് വിക്കറ്റുകൾ വീഴ്ത്തി മികച്ച പ്രകടനം കാഴ്ചവെച്ചു.

അണ്ടർ-15 വനിതാ ഏകദിന ടൂർണമെന്റ്ഹരിയാനകേരളം

സ്വന്തം ലേഖകൻ