ആദ്യ കപ്പ് ലക്ഷ്യമിട്ട് കരുത്തരായ കൊച്ചി ബ്ലൂ ടൈഗേഴ്സ്; കിരീടം നിലനിർത്താൻ കൊല്ലം സെയിലേഴ്സ്; കേരള ക്രിക്കറ്റ് ലീഗ് ഫൈനൽ പോരാട്ടം തീപാറും
കൊച്ചി: കേരള ക്രിക്കറ്റ് ലീഗിന്റെ രണ്ടാം സീസണിന്റെ കലാശപ്പോര് നാളെ. നിലവിലെ ചാമ്പ്യന്മാരായ ഏരിസ് കൊല്ലം സെയിലേഴ്സും കൊച്ചി ബ്ലൂ ടൈഗേഴ്സുമാണ് കിരീടത്തിനായി ഏറ്റുമുട്ടുന്നത്. ടൂർണമെന്റിൽ ഏറ്റവും ശക്തരായ ടീമെന്ന വിശേഷണത്തോടെയാണ് കൊച്ചി ഫൈനലിലേക്ക് എത്തുന്നത്. ടൂർണമെന്റിലെ ഏറ്റവും മികച്ച ടീമെന്ന നിലയിൽ കൊച്ചി ബ്ലൂ ടൈഗേഴ്സ് ഫൈനലിൽ മുൻതൂക്കം നേടുന്നു.
സഞ്ജു സാംസണിന്റെ സാന്നിധ്യം ടൂർണമെന്റിന്റെ തുടക്കത്തിൽ കൊച്ചിയുടെ ശ്രദ്ധാകേന്ദ്രമായിരുന്നു. ഏഷ്യാ കപ്പിനുള്ള ഇന്ത്യൻ ടീമിൽ ഇടം ലഭിച്ചതിനാൽ സഞ്ജുവിനു ടൂർണമെന്റിന്റെ പാതിവഴിയിൽ വിട്ടുപോകേണ്ടി വന്നെങ്കിലും, ടീം വിജയം തുടർന്നു. ലീഗിൽ കളിച്ച 11 മത്സരങ്ങളിൽ വെറും രണ്ടെണ്ണത്തിൽ മാത്രമാണ് കൊച്ചി പരാജയപ്പെട്ടത്. മറ്റ ഒരു ടീമിനും ഈ സീസണിൽ ഇത്രയധികം ആധിപത്യം അവകാശപ്പെടാനില്ല. ബാറ്റിങ്ങിൽ സഞ്ജു സാംസൺ 368 റൺസുമായി ടോപ് സ്കോറർമാരിൽ മൂന്നാം സ്ഥാനത്തുണ്ട്. വിനൂപ് മനോഹരൻ (11 മത്സരങ്ങളിൽ 344 റൺസ്, 163 സ്ട്രൈക്ക് റേറ്റ്), നിഖിൽ തോട്ടത്ത്, സാലി സാംസൺ, മുഹമ്മദ് ഷാനു, ആൽഫി ഫ്രാൻസിസ് ജോൺ എന്നിവരും മികച്ച പ്രകടനം കാഴ്ചവെച്ചിട്ടുണ്ട്.
കൊച്ചിയുടെ പ്രധാന കരുത്ത് ഓൾറൗണ്ടർ മുഹമ്മദ് ആഷിഖാണ്. നിർണായക ഘട്ടങ്ങളിൽ ബാറ്റുകൊണ്ടും പന്തുകൊണ്ടും ടീമിന് വിജയങ്ങൾ സമ്മാനിക്കാൻ അദ്ദേഹത്തിന് സാധിച്ചിട്ടുണ്ട്. കാലിക്കറ്റ് ഗ്ലോബ്സ്റ്റാർസിനെതിരായ സെമിഫൈനലിൽ 10 പന്തിൽ 31 റൺസെടുത്ത് ടീമിനെ വിജയത്തിലേക്ക് നയിച്ച പ്രകടനം ഇതിന് ഉദാഹരണമാണ്. ടൂർണമെന്റിൽ ഉടനീളം സ്ഥിരതയാർന്ന പ്രകടനം കാഴ്ചവെക്കാൻ കൊല്ലം സെയിലേഴ്സിന് കഴിഞ്ഞിട്ടുണ്ട്. നായകൻ സച്ചിൻ ബേബിയുടെ നേതൃത്വത്തിൽ കഴിഞ്ഞ തവണ കിരീടം നേടിയ ടീം, ഇത്തവണയും കിരീടം നിലനിർത്താൻ തന്നെയാണ് ലക്ഷ്യമിടുന്നത്. ഓൾറൗണ്ട് മികവാണ് കൊല്ലം ടീമിന്റെ പ്രധാന ശക്തി.
ബാറ്റുകൊണ്ടും പന്തുകൊണ്ടും ഒരുപോലെ തിളങ്ങാൻ കഴിവുള്ള താരങ്ങൾ ടീമിലുണ്ട്. പ്രധാനമായും ഓപ്പണർമാരായ അശ്വിൻ റോഷനും, സച്ചിൻ ബേബിയും ടീമിന് മികച്ച തുടക്കങ്ങൾ നൽകുന്നു. കൂടാതെ, മധ്യനിരയിൽ അപകടകാരികളായ ബാറ്റ്സ്മാൻമാരുടെ സാന്നിധ്യവും കൊല്ലത്തിനുണ്ട്. ബൗളിംഗിൽ, പേസ് ബൗളർമാരും സ്പിന്നർമാരും ഒരുപോലെ മികച്ച പ്രകടനം കാഴ്ചവെക്കുന്നു. നിർണായക ഘട്ടങ്ങളിൽ വിക്കറ്റുകൾ വീഴ്ത്താനും റൺസ് വഴങ്ങുന്നത് നിയന്ത്രിക്കാനും കഴിവുള്ള ബൗളർമാർ കൊല്ലം നിരയിലുണ്ട്. കഴിഞ്ഞ സീസണിലെ ചാമ്പ്യന്മാരെന്ന നിലയിൽ ഫൈനലിലെ സമ്മർദ്ദം കൈകാര്യം ചെയ്യാനുള്ള പരിചയസമ്പത്തും അവർക്ക് അനുകൂല ഘടകമാണ്.
