കരിയറിലെ അവസാന ബോര്‍ഡര്‍ ഗാവസ്‌ക്കര്‍ പരമ്പരയൊ? ഓസീസ് മണ്ണില്‍ കാലുകുത്തിയതിനു മുതല്‍ പത്രങ്ങള്‍ നിറഞ്ഞ് വിരാട് കോലി; ഹിന്ദിയിലും പഞ്ചാബിയിലും തലക്കെട്ടെഴുതി അഡ്ലെയ്ഡ് അഡ്വര്‍ടൈസര്‍; ആരാധകര്‍ ആവേശത്തില്‍
ഓസീസ് പത്രങ്ങള്‍ നിറഞ്ഞ് വിരാട് കോലി
പെര്‍ത്ത്: ഇന്ത്യ - ഓസ്ട്രേലിയ ബോര്‍ഡര്‍ ഗാവസ്‌ക്കര്‍ ട്രോഫി സീരീസ് ക്രിക്കറ്റ് പരമ്പരയുടെ ആവേശത്തിന് തിരികൊളുത്തി ഓസ്ട്രേലിയന് മാധ്യമങ്ങള്‍. പരമ്പരയിലെ ആദ്യ ടെസ്റ്റ് 22ന് പെര്‍ത്തില്‍ തുടങ്ങാനിരിക്കെ വിരാട് കോലിയെ വാഴ്ത്തിക്കൊണ്ടാണ് ഇന്ന് പ്രമുഖ ഓസ്ട്രേലിയന് മാധ്യമങ്ങള്‍ പുറത്തിറങ്ങിയത്. ഇംഗ്ലീഷില്‍ മാത്രമല്ല, അഡ്ലെയ്ഡ് അഡ്വര്‍ടൈസര്‍ എന്ന പത്രം ഹിന്ദിയിലും പഞ്ചാബിയിലും തലക്കെട്ടെഴുതി ഇന്ത്യന്‍ ആരാധകരെപോലും ഞെട്ടിക്കുകയും ചെയ്തു.
പരമ്പരയുടെ ഭാഗമായി ഞായറാഴ്ച വൈകുന്നേരത്തോടെ ഇന്ത്യന്‍ താരം വിരാട് കോലി ഓസ്ട്രേലിയയില് വിമാനമിറങ്ങിയിരുന്നു. കോലി ഓസീസ് മണ്ണില്‍ കാലുകുത്തിയതിനു പിന്നാലെ ചൊവ്വാഴ്ച ഓസ്ട്രേലിയന് മാധ്യമങ്ങളുടെ ആദ്യ പേജുകളില്‍ കോലി മയമാണ്.
ദി അഡ്വെര്‍ട്ടൈസര്‍, ദി ഡെയ്ലി ടെലെഗ്രാഫ് തുടങ്ങി ഏതാനും പത്രങ്ങളാണ് കോലിയുടെ ചിത്രം ആദ്യ പേജില്‍ തന്നെ കൊടുത്തിരിക്കുന്നത്. ചില പത്രങ്ങള്‍ കോലിയുടെ വലിയ ചിത്രത്തിനൊപ്പം ഹിന്ദിയിലും പഞ്ചാബിയിലുമാണ് പ്രധാന തലക്കെട്ട് നല്‍കിയത്. ഓസ്ട്രേലിയന് ആരാധകര്‍ക്കിടയില്‍ കോലിയുടെ ജനപ്രീതിയാണ് ഈ സൂചനകള്‍ കാണിക്കുന്നത്.
കോലിയെ കൂടാതെ യുവതാരങ്ങളായ യശസ്വി ജയ്സ്വാളിനെയും ഋഷഭ് പന്തിനെയും കുറിച്ചും വിവിധ പത്രങ്ങളില്‍ വാര്‍ത്തകളുണ്ട്. ഓസ്ട്രേലിയയില് ഓസീസിനെതിരേ മികച്ച പ്രകടനം പുറത്തെടുത്തിട്ടുള്ള കോലി, കാണികളുടെ നോട്ടപ്പുള്ളി കൂടിയായിരുന്നു. എന്നാല്‍ സമീപകാലത്തെ താരത്തിന്റെ ഫോം ആശങ്ക നല്‍കുന്നതാണ്.
നാട്ടില്‍ ന്യൂസീലന്‍ഡിനെതിരായ പരമ്പരയിലടക്കം മികച്ച പ്രകടനം നടത്താന്‍ കോലിക്ക് സാധിച്ചിരുന്നില്ല. ഓസ്ട്രേലിയയിലെത്തിയ കോലി പെര്‍ത്തില്‍ ടീം അംഗങ്ങള്‍ക്കൊപ്പം ചേര്‍ന്നു. കോലിയുടെ കരിയറിലെ അവസാന ബോര്‍ഡര്‍ ഗാവസ്‌ക്കര്‍ പരമ്പര കൂടിയായേക്കും ഇത്തവണത്തേത്. അതിനാല്‍ തന്നെ മികച്ച പ്രകടനം പുറത്തെടുക്കാന്‍ തന്നെയാകും താരം ശ്രമിക്കുക.
ഓസ്‌ട്രേലിയക്കെതിരായ ടെസ്റ്റ് പരമ്പരക്കുള്ള വിരാട് കോലിയുള്‍പ്പെടെയുള്ള താരങ്ങളടങ്ങിയ ഇന്ത്യയുടെ ആദ്യ സംഘം ഇന്നലെ ഓസ്ട്രേലിയയില് എത്തിയിരുന്നു. വിരാട് കോലിക്ക് പുറമെ യുവതാരം യശസ്വി ജയ്‌സ്വാളിനെ പുതിയ 'കിംഗ്' എന്നാണ് ഒരു പത്രം പഞ്ചാബിയില്‍ വിശേഷിപ്പിച്ചത്.
ഓസ്ട്രേലിയയില് നാലു ടെസ്റ്റ് പരമ്പരകള്‍ കളിച്ചിട്ടുള്ള വിരാട് കോലിക്ക് തന്നെയാണ് ഏറ്റവും കൂടുതല്‍ ആരാധകരുള്ളത്. അതേസമയം, 2023ല്‍ ഇന്ത്യന്‍ ടെസ്റ്റ് ക്യാപ് അണിഞ്ഞ യശസ്വി ജയ്‌സ്വാളിന്റെ ആദ്യ ഓസ്ട്രേലിയന് പരമ്പരയാണിത്.ഓസ്ട്രേലിയന് സാഹചര്യങ്ങളുമായി പൊരുത്തപ്പെടുന്നതിനായി ഇന്ത്യന്‍ ടീം ഇനിയുള്ള ദിവസങ്ങളില്‍ പെര്‍ത്തില്‍ പരിശീലനം നടത്തും. ടെസ്റ്റ് പരമ്പരക്ക് മുമ്പ് ഇന്ത്യക്ക് പരിശീലന മത്സരങ്ങളില്ല. 22ന് പെര്‍ത്തിലാണ് ഇന്ത്യ-ഓസ്ട്രേലിയ ആദ്യ ടെസ്റ്റ് തുടങ്ങുന്നത്.
ആദ്യ ടെസ്റ്റിനുശേഷം ഡിസംബര്‍ ഒന്നുമുതല്‍ ഓസ്ട്രേലിയന് പ്രൈമിനിസ്റ്റേഴ്‌സ് ഇലവനുമായി ഇന്ത്യ ദ്വിദിന പരിശീലന മത്സരത്തില്‍ കളിക്കും. കാന്‍ബറയിലെ മനൗക ഓവലിലാണ് പരിശീലന മത്സരം.ഡിസംബര്‍ ആറു മുതല്‍ അഡ്ലെയ്ഡ് ഓവലിലാണ് പരമ്പരയിലെ രണ്ടാം ടെസ്റ്റ്. ഡേ നൈറ്റ് ടെസ്റ്റാണിത്. ഡിസംബര്‍ 14 മുതല്‍ ബ്രിസേബേനിലെ ഗാബയിലാണ് മൂന്നാം ടെസ്റ്റ്. മെല്‍ബണില്‍ ഡിസംബര്‍ 26 മുതലാണ് ബോക്‌സിംഗ് ഡേ ടെസ്റ്റ്.
ജനുവരി മൂന്ന് മതുല്‍ സിഡ്‌നിയിലാണ് പരമ്പരയിലെ അവസാന ടെസ്റ്റിന് തുടക്കമാകുക. 1990നു ശേഷം ആദ്യമായാണ് ഇന്ത്യയും ഓസ്‌ട്രേലിയയും അഞ്ച് മത്സര ടെസ്റ്റ് പരമ്പരയില്‍ ഏറ്റുമുട്ടുന്നത്. കഴിഞ്ഞ രണ്ട് തവണയും ഓസ്ട്രേലിയയില് പരമ്പര നേടി ഇന്ത്യ ചരിത്രനേട്ടം സ്വന്തമാക്കിയിരുന്നു.
