ഗുരുഗ്രാം: ക്രിക്കറ്റിന്റെ എല്ലാ ഫോർമാറ്റിൽ നിന്നും വിരമിച്ച് ഇന്ത്യൻ ക്രിക്കറ്റ് ടീം പേസർ മോഹിത് ശർമ്മ. 37-കാരനായ താരം ബുധനാഴ്ച സാമൂഹിക മാധ്യമങ്ങളിലൂടെയാണ് വിരമിക്കൽ പ്രഖ്യാപനം നടത്തിയത്. ഐപിഎല്ലിൽ ചെന്നൈ സൂപ്പർ കിംഗ്‌സ്, പഞ്ചാബ് കിംഗ്‌സ്, ഗുജറാത്ത് ടൈറ്റൻസ്, ഡെൽഹി ക്യാപിറ്റൽസ് എന്നീ പ്രമുഖ ടീമുകൾക്കായി മോഹിത് ശർമ്മ കളിച്ചിട്ടുണ്ട്. ചെന്നൈ സൂപ്പർ കിംഗ്‌സിനൊപ്പം നാല് സീസണുകളിലും, പഞ്ചാബ് കിംഗ്‌സിനൊപ്പം മൂന്ന് സീസണുകളിലും, ഗുജറാത്ത് ടൈറ്റൻസിനും ഡെൽഹി ക്യാപിറ്റൽസിനുമൊപ്പം രണ്ട് സീസണുകളിലും താരം സജീവമായിരുന്നു.

2013-ൽ സിംബാബ്‌വെക്കെതിരെ ഏകദിനത്തിലൂടെ ഇന്ത്യൻ ടീമിൽ അരങ്ങേറ്റം കുറിച്ച മോഹിത് ശർമ്മ, ദേശീയ ടീമിനായി 26 ഏകദിനങ്ങളും എട്ട് ട്വന്റി-20 മത്സരങ്ങളും കളിച്ചിട്ടുണ്ട്. 2015 ഏകദിന ലോകകപ്പിൽ ഇന്ത്യയെ പ്രതിനിധീകരിച്ച് കളിച്ച അദ്ദേഹം, ഏകദിനത്തിൽ 32.90 ശരാശരിയിൽ 31 വിക്കറ്റുകളും, ട്വന്റി-20യിൽ ആറ് വിക്കറ്റുകളും നേടിയിട്ടുണ്ട്. ഇന്ത്യൻ ആഭ്യന്തര ക്രിക്കറ്റിൽ ഹരിയാനയ്ക്ക് വേണ്ടി മികച്ച പ്രകടനം കാഴ്ചവെച്ചതിന് ശേഷമാണ് മോഹിത് ശർമ്മ ദേശീയ ടീമിലെത്തിയത്.

ഇൻസ്റ്റാഗ്രാം അക്കൗണ്ടിൽ പങ്കുവെച്ച ഹൃദയസ്പർശിയായ കുറിപ്പിൽ, ആരാധകർക്കും തന്നെ പിന്തുണച്ച എല്ലാവർക്കും മോഹിത് നന്ദി അറിയിച്ചു. "ഹരിയാനയെ പ്രതിനിധീകരിച്ചത് മുതൽ ഇന്ത്യൻ ജേഴ്‌സി അണിയുകയും ഐപിഎല്ലിൽ കളിക്കുകയും ചെയ്ത ഈ യാത്ര അനുഗ്രഹീതമായിരുന്നു," അദ്ദേഹം കുറിച്ചു. തന്റെ കരിയറിന് താങ്ങും തണലുമായി നിന്ന ഹരിയാന ക്രിക്കറ്റ് അസോസിയേഷനും, നിരന്തരമായ മാർഗ്ഗനിർദ്ദേശം നൽകിയ അനിരുദ്ധ് സാറിനും ബിസിസിഐക്കും പരിശീലകർക്കും ടീം അംഗങ്ങൾക്കും ഐപിഎൽ ഫ്രാഞ്ചൈസികൾക്കും സപ്പോർട്ട് സ്റ്റാഫിനും സുഹൃത്തുക്കൾക്കും, തന്റെ മാനസികാവസ്ഥകളെ പിന്തുണയോടെ കൈകാര്യം ചെയ്ത ഭാര്യക്കും മോഹിത് പ്രത്യേകം നന്ദി രേഖപ്പെടുത്തി. "പുതിയ വഴികളിൽ കളിയെ സേവിക്കാൻ ഞാൻ കാത്തിരിക്കുന്നു. നന്ദി," എന്നും അദ്ദേഹം കൂട്ടിച്ചേർത്തു.

ഇന്ത്യൻ പ്രീമിയർ ലീഗിലെ (ഐപിഎൽ) സ്ഥിരസാന്നിധ്യമായിരുന്ന മോഹിത് ശർമ്മ, ചെന്നൈ സൂപ്പർ കിംഗ്സിനൊപ്പമുള്ള മികച്ച പ്രകടനങ്ങളിലൂടെയാണ് ശ്രദ്ധേയനായത്. 2013-ൽ 20 വിക്കറ്റുകളും 2024-ൽ 23 വിക്കറ്റുകളും നേടിയിരുന്നു. പിന്നീട് ഗുജറാത്ത് ടൈറ്റൻസിലൂടെ കരിയറിൽ ഒരു രണ്ടാം വരവ് നടത്തിയ അദ്ദേഹം, 2023 ഐപിഎല്ലിൽ 27 വിക്കറ്റുകളുമായി ടൂർണമെന്റിലെ വിക്കറ്റ് വേട്ടക്കാരിൽ രണ്ടാം സ്ഥാനത്തെത്തിയിരുന്നു.

120 ഐപിഎൽ മത്സരങ്ങളിൽ നിന്ന് 134 വിക്കറ്റുകളാണ് മോഹിത് ശർമ്മ നേടിയിട്ടുള്ളത്. 8.77 ആണ് താരത്തിന്റെ എക്കണോമി റേറ്റ്. ഐപിഎല്ലിൽ മികച്ച പ്രകടനം കാഴ്ചവെച്ചെങ്കിലും, 2013, 2015, 2019, 2021, 2023 വർഷങ്ങളിലെ ഫൈനലുകളിൽ തോൽവി വഴങ്ങിയതിനാൽ താരത്തിന് ഒരു ഐപിഎൽ കിരീടം പോലും നേടാനായില്ല.

പേസർമോഹിത് ശർമ്മവിരമിച്ചു

സ്വന്തം ലേഖകൻ