'ആ സീനിയർ താരങ്ങളുടെ സാന്നിധ്യം ടീമിന് മുൻതൂക്കം നൽകും'; പകരം വയ്ക്കാനാവാത്ത താരങ്ങളാണ് കോലിയും രോഹിത്തും; അവർ ഏകദിന ലോകകപ്പില്‍ കളിക്കണം; പിന്തുണയുമായി മോര്‍ണെ മോര്‍ക്കല്‍
റാഞ്ചി: 2027ലെ ഏകദിന ലോകകപ്പിൽ സീനിയർ താരങ്ങളായ രോഹിത് ശർമ്മയും വിരാട് കോഹ്‌ലിയും ഇന്ത്യൻ ടീമിൽ ഉണ്ടാകണമെന്ന് ആഗ്രഹം പ്രകടിപ്പിച്ച് ഇന്ത്യൻ ബൗളിംഗ് കോച്ച് മോര്‍ണെ മോർക്കൽ. രോഹിത്തിന്റെയും കോലിയുടെയും സാന്നിധ്യം എതിർ ടീമുകൾക്ക് മേൽ ഇന്ത്യക്ക് മാനസികമായ മുൻതൂക്കം നൽകുമെന്നും മോർക്കൽ ചൂണ്ടിക്കാട്ടി. ശാരീരികക്ഷമത നിലനിർത്തുകയാണെങ്കിൽ ഇരുവരും പകരം വയ്ക്കാനാവാത്ത താരങ്ങളാണെന്നും അദ്ദേഹം അഭിപ്രായപ്പെട്ടു.
എതിരാളികളെ നിഷ്പ്രഭരാക്കാൻ ഇവർക്ക് കഴിവുണ്ടെന്നും, താൻ കളിച്ചിരുന്ന കാലത്ത് ഇരുവരും തനിക്ക് ഏറ്റവും വലിയ വെല്ലുവിളിയായിരുന്നുവെന്നും മോർക്കൽ കൂട്ടിച്ചേർത്തു. ലോകകപ്പിൽ കളിക്കാനുള്ള തയ്യാറെടുപ്പുകൾ രോഹിത്തും കോലിയും നടത്തുമെന്നാണ് തന്റെ പ്രതീക്ഷയെന്നും അദ്ദേഹം പറഞ്ഞു.
ഇതിനിടെ, പരിക്കേറ്റ ഇന്ത്യൻ നിശ്ചിത ഓവർ ക്രിക്കറ്റ് ടീം ക്യാപ്റ്റൻ ശുഭ്മാൻ ഗിൽ, വൈസ് ക്യാപ്റ്റൻ ശ്രേയസ് അയ്യർ എന്നിവരുടെ ആരോഗ്യനിലയെക്കുറിച്ചുള്ള പുതിയ വിവരങ്ങളും മോർക്കൽ പങ്കുവെച്ചു. രണ്ട് ദിവസം മുമ്പ് ഗില്ലുമായി സംസാരിച്ചതായും കഴുത്തിനേറ്റ പരിക്കിൽ നിന്ന് അദ്ദേഹം സുഖം പ്രാപിച്ചുവരികയാണെന്നും മോർക്കൽ അറിയിച്ചു. കഴിഞ്ഞ മാസം ഓസ്ട്രേലിയക്കെതിരായ ആദ്യ ഏകദിനത്തിനിടെ പ്ലീഹയ്ക്ക് പരിക്കേറ്റ ശ്രേയസ് അയ്യർ പുനരധിവാസം ആരംഭിച്ചതായും അദ്ദേഹം വ്യക്തമാക്കി. നിലവിലെ ഏകദിന പരമ്പരയിൽ ഇരുവരും കളിക്കുന്നില്ല. പരമ്പര തുടങ്ങാൻ രണ്ട് ദിവസം മാത്രം ശേഷിക്കെയാണ് മോർക്കൽ ഈ വിവരങ്ങൾ വെളിപ്പെടുത്തിയത്.
ഇരുവരും നന്നായി പുരോഗമിക്കുന്നുണ്ടെന്നും, മുഴുവൻ മാനേജ്മെന്റും അവരെ ടീമിലേക്ക് തിരികെ കൊണ്ടുവരാൻ ആഗ്രഹിക്കുന്നുണ്ടെന്നും അദ്ദേഹം കൂട്ടിച്ചേർത്തു. ദക്ഷിണാഫ്രിക്കക്കെതിരായ രണ്ട് മത്സര ടെസ്റ്റ് പരമ്പരയിലെ ആദ്യ മത്സരത്തിനിടെ മൂന്ന് പന്തുകൾ നേരിട്ട ശേഷം ഒരു സ്വീപ് ഷോട്ടിനെ തുടർന്നാണ് ഗില്ലിന് കഴുത്ത് വേദന അനുഭവപ്പെട്ടത്.
