ഓൾ റൗണ്ട് മികവുമായി ബാസ് ഡി ലീഡ്; നമീബിയക്കെതിരെ ഏഴ് വിക്കറ്റിന്റെ അനായാസ ജയം; പാകിസ്ഥാനെ മറികടന്ന് നെതർലൻഡ്സ് പോയന്റ് പട്ടികയില് രണ്ടാമത്
ദില്ലി: ടി20 ലോകകപ്പിൽ നമീബിയക്കെതിരെ നെതർലൻഡ്സിന് 7 വിക്കറ്റിന്റെ തകർപ്പൻ ജയം. ബാറ്റിംഗിലും ബൗളിംഗിലും തിളങ്ങിയ ഓൾറൗണ്ടർ ബാസ് ഡി ലീഡിന്റെ അവിസ്മരണീയ പ്രകടനമാണ് ഡച്ച് ടീമിന് അനായാസ വിജയം സമ്മാനിച്ചത്. ഈ വിജയത്തോടെ, പോയിന്റ് പട്ടികയിൽ പാകിസ്ഥാനെ മറികടന്ന് നെതർലൻഡ്സ് രണ്ടാം സ്ഥാനത്തെത്തി സൂപ്പർ 8 പ്രതീക്ഷകൾ സജീവമാക്കി. ദില്ലി അരുൺ ജെയ്റ്റ്ലി സ്റ്റേഡിയത്തിൽ നടന്ന മത്സരത്തിൽ 157 റൺസ് വിജയലക്ഷ്യം പിന്തുടർന്ന നെതർലൻഡ്സ് 18 ഓവറിൽ 3 വിക്കറ്റ് മാത്രം നഷ്ടപ്പെടുത്തി ലക്ഷ്യം കണ്ടു.
48 പന്തിൽ നിന്ന് പുറത്താകാതെ 72 റൺസ് നേടിയ ബാസ് ഡി ലീഡ് അഞ്ച് ഫോറുകളും നാല് സിക്സറുകളും സഹിതം തകർപ്പൻ പ്രകടനമാണ് നടത്തിയത്. ഓപ്പണർ മാക്സ് ഒഡൗഡിനെ (7) തുടക്കത്തിൽ നഷ്ടമായെങ്കിലും മൈക്കൽ ലെവിറ്റ് (28), കോളിൻ അക്കർമാൻ (32) എന്നിവർ ലീഡിന് മികച്ച പിന്തുണ നൽകി. 12 പന്തുകൾ ബാക്കിനിൽക്കെ ക്യാപ്റ്റൻ സ്കോട്ട് എഡ്വേർഡ്സിനെ (18*) കൂട്ടുപിടിച്ച് ലീഡ് ടീമിനെ വിജയത്തിലേക്ക് നയിച്ചു.
നേരത്തെ ടോസ് നഷ്ടപ്പെട്ട് ബാറ്റിംഗിനിറങ്ങിയ നമീബിയ നിശ്ചിത 20 ഓവറിൽ 8 വിക്കറ്റ് നഷ്ടത്തിൽ 156 റൺസാണ് നേടിയത്. കൃത്യമായ ഇടവേളകളിൽ വിക്കറ്റ് വീഴ്ത്തി ഡച്ച് ബൗളർമാർ നമീബിയൻ ബാറ്റിംഗ് നിരയെ സമ്മർദ്ദത്തിലാക്കി. 38 പന്തിൽ 42 റൺസെടുത്ത ജാൻ നിക്കോൾ ലോഫ്റ്റി ഈറ്റണാണ് നമീബിയയുടെ ടോപ് സ്കോറർ. ജാൻ ഫ്രൈലിങ്ക് 26 പന്തിൽ 30 റൺസ് നേടി ഭേദപ്പെട്ട പ്രകടനം കാഴ്ചവെച്ചു. നെതർലൻഡ്സിനായി ലോഗൻ വാൻ ബീക്കും ബാസ് ഡി ലീഡും രണ്ട് വിക്കറ്റുകൾ വീതം വീഴ്ത്തി.
പാകിസ്ഥാനോടേറ്റ ആദ്യ മത്സരത്തിലെ തോൽവിക്ക് ശേഷമുള്ള നെതർലൻഡ്സിന്റെ ശക്തമായ തിരിച്ചുവരവ് കൂടിയാണിത്. രണ്ട് മത്സരങ്ങളിൽ നിന്ന് രണ്ട് പോയിന്റോടെ, മികച്ച നെറ്റ് റൺറേറ്റിന്റെ അടിസ്ഥാനത്തിലാണ് അവർ ഇന്ത്യയ്ക്ക് പിന്നിൽ രണ്ടാം സ്ഥാനത്തേക്ക് ഉയർന്നത്. ഈ തോൽവി ടൂർണമെന്റിലെ തങ്ങളുടെ ആദ്യ മത്സരത്തിനിറങ്ങിയ നമീബിയൻ ടീമിന് തിരിച്ചടിയായി. ബാറ്റിംഗ് നിരയുടെ മെല്ലെപ്പോക്ക് അവർക്ക് വിനയായി. ഇന്ന് നടക്കുന്ന അമേരിക്കക്കെതിരായ മത്സരം പാകിസ്ഥാന് നിർണ്ണായകമാണ്.
