ജയത്തോടെ പരമ്പര സ്വന്തമാക്കാൻ ഇന്ത്യ; ഒപ്പമെത്താൻ ഓസ്‌ട്രേലിയ; നാലാം ട്വന്റി 20 മത്സരം ഇന്ന് റായ്പൂരിൽ; ശ്രേയസ് അയ്യരും മുകേഷ് കുമാറും ദീപക് ചഹാറും ഇന്ത്യൻ നിരയിൽ ഇടംപിടിച്ചേക്കും
റായ്പൂർ: ഇന്ത്യ-ഓസ്‌ട്രേലിയ ട്വന്റി 20 ക്രിക്കറ്റ് പരമ്പരയിലെ നാലാം മത്സരം ഇന്ന് റായ്പൂരിൽ. നാലാം മത്സരം ജയിച്ച് പരമ്പര സ്വന്തമാക്കാനാണ് സൂര്യകുമാർ യാദവും സംഘവും ഇറങ്ങുന്നത്. ഗ്ലെൻ മാക്‌സ്‌വെൽ വെടിക്കെട്ടിൽ ഗുവാഹത്തിയിൽ കൈവിട്ട ജയം റായ്പൂരിൽ സ്വന്തമാക്കിയാൽ പരമ്പരയിൽ യുവനിരയ്ക്ക് മുന്നേറാം. എന്നാൽ രണ്ട് തോൽവികൾക്ക് ശേഷം ആവേശ ജയത്തിന്റെ ആത്മവിശ്വാസത്തിലാണ് ഓസ്‌ട്രേലിയ എത്തിയിരിക്കുന്നത്. റായ്പൂർ സ്റ്റേഡിയത്തിലെ ആദ്യ അന്താരാഷ്ട്ര ട്വന്റി മത്സരം ത്രില്ലർ പോരാട്ടമാകുമെന്നുറപ്പ്. വൈകിട്ട് ഏഴിനാണ് മത്സരം ആരംഭിക്കുക. റായ്പൂരിൽ ആറരയ്ക്ക് ടോസ് വീഴും.
ഗുവാഹത്തിയിലെ മൂന്നാം ടി20യിൽ 222 റൺസുണ്ടായിട്ടും പ്രതിരോധിക്കാൻ പറ്റാത്ത ഇന്ത്യൻ ബൗളിങ് നിരയിൽ ഇന്ന് മാറ്റങ്ങൾ ഉറപ്പിക്കാം. വിവാഹ ചടങ്ങിനായി മൂന്നാം ട്വന്റി 20യിൽ നിന്ന് അവധിയെടുത്ത പേസർ മുകേഷ് കുമാർ തിരിച്ചെത്തുന്നത് ഡെത്ത് ബൗളിംഗിന് മൂർച്ച കൂട്ടും. അവസാന രണ്ട് മത്സരങ്ങൾക്കായി ടീമിലെടുത്ത ദീപക് ചഹാറും ഇലവനിൽ ഇടം ഉറപ്പിക്കും എന്ന് പ്രതീക്ഷിക്കാം. മൂന്നാം പേസറായി ആവേശ് ഖാന് അവസരം കിട്ടാനാണ് സാധ്യത. അതേസമയം ബാറ്റിംഗിൽ ഒരു മാറ്റം ഉറപ്പ്. വൈസ് ക്യാപ്റ്റൻ സ്ഥാനത്തോടുകൂടി ശ്രേയസ് അയ്യർ തിരിച്ചെത്തുമ്പോൾ തിലക് വർമ്മയ്ക്കായിരിക്കും അവസരം നഷ്ടമാവുക.
ഏകദിന ലോകകപ്പ് കളിച്ച താരങ്ങളായ ഗ്ലെൻ മാക്‌സ്‌വെൽ, മാർക്കസ് സ്റ്റോയിനിസ്, ജോഷ് ഇൻഗ്ലിസ് തുടങ്ങിയവർ നാട്ടിലേക്ക് മടങ്ങിയതിനാൽ ഓസീസ് ടീമിൽ അടിമുടി മാറ്റമുണ്ടാകും. പരമ്പര നഷ്ടമാകാതിരിക്കാൻ മാത്യു വെയ്ഡിനും സംഘത്തിനും ഇത് ജീവന്മരണ പോരാട്ടമാണ്. ആദ്യ മൂന്ന് മത്സരങ്ങളിലെ പോലെ റൺമഴ പെയ്യുന്ന പിച്ച് തന്നെയായിരിക്കും റായ്പൂരിലേതും. 123 ഫോറും 65 സിക്സുമാണ് ഇതുവരെ പരമ്പരയിൽ പിറന്നത്. ഇന്നും ബൗണ്ടറികൾക്ക് ഒരു കുറവും ഉണ്ടാകില്ല എന്നാണ് ആരാധകർ പ്രതീക്ഷിക്കുന്നത്. ജിയോ സിനിമയും സ്പോർട്സ് 18നും വഴി ആരാധകർക്ക് മത്സരം ഇന്ത്യയിൽ കാണാം.
