പൂനെ: ഐപിഎല്‍ മിനി ലേലത്തിന് മിനിറ്റുകള്‍ മാത്രം ശേഷിക്കെ സയ്യിദ് മുഷ്താഖ് അലി ട്വന്റി 20യില്‍ ഓപ്പണറായി ഇറങ്ങി ബാറ്റിങ് വെടിക്കെട്ടുമായി വെങ്കടേഷ് അയ്യര്‍. പഞ്ചാബിനെതിരായ മത്സരത്തില്‍ മധ്യ പ്രദേശിന് വേണ്ടി ഓപ്പണറായ കളിച്ച വെങ്കടേഷ് 43 പന്തില്‍ 70 റണ്‍സാണ് നേടിയത്. ഇത്തവണ താരലേലത്തില്‍ വെങ്കടേഷിന്റെ പേരുമുണ്ട്. വെങ്കടേഷ് തിളങ്ങിയെങ്കിലും മധ്യ പ്രദേശ് മത്സരത്തില്‍ പരാജയപ്പെട്ടു. രണ്ട് വിക്കറ്റിനായിരുന്നു തോല്‍വി. ടോസ് നേടി ബാറ്റിംഗിനെത്തിയ മധ്യ പ്രദേശ് എട്ട് വിക്കറ്റ് നഷ്ടത്തില്‍ 225 റണ്‍സാണ് നേടിയത്.

മറുപടി ബാറ്റിംഗില്‍ പഞ്ചാബ് 19.1 ഓവറില്‍ എട്ട് വിക്കറ്റ് നഷ്ടത്തില്‍ ലക്ഷ്യം മറികടന്നു. ഹര്‍നൂര്‍ സിംഗ് (36 പന്തില്‍ 64), സലില്‍ അറോറ (29 പന്തില്‍ 50) എന്നിവരുടെ ഇന്നിംഗ്സുകളാണ് പഞ്ചാബിനെ വിജയത്തിലേക്ക് നയിച്ചത്. മുഷ്താഖ് അലിയില്‍ തകര്‍പ്പന്‍ ഫോമില്‍ കളിച്ച സലിലിനും ഇത്തവണ ആവശ്യക്കാര്‍ ഏറെയാകും.

ഇരുവര്‍ക്കം പുറമെ അന്‍മോല്‍പ്രീത് സിംഗ് (14 പന്തില്‍ 38), രമണ്‍ദീപ് സിംഗ് (21 പന്തില്‍ പുറത്താവാതെ 35) എന്നിവരും നിര്‍ണായക പിന്തുണ നല്‍കി. പ്രഭ്സിമ്രാന്‍ സിംഗ് (9), നമന്‍ ധിര്‍ (7), സിന്‍വീര്‍ സിംഗ് (5), ആയുഷ് ഗോയല്‍ (1), ഗുര്‍നൂര്‍ ബ്രാര്‍ (7) എന്നിവരാണ് പുറത്തായ മറ്റുതാരങ്ങള്‍. മധ്യ പ്രദേശിന് വേണ്ടി ശിവം ശുക്ല മൂന്ന് വിക്കറ്റ് വീഴ്ത്തി.

നേരത്തെ, മധ്യ പ്രദേശ് നിരയില്‍ വെങ്കടേഷ് ഒഴികെ മറ്റാര്‍ക്കും അര്‍ധ സെഞ്ചുറി നേടാന്‍ സാധിച്ചിരുന്നില്ല. ഹര്‍പ്രീത് സിംഗ് (27), രജത് പടിധാര്‍ (20), അനികേത് വര്‍മ (31), മങ്കേഷ് യാദവ് (28), ത്രിപുരേഷ് സിംഗ് (11) എന്നിവരാണ് രണ്ടക്കം കണ്ട മറ്റുതാരങ്ങള്‍. പഞ്ചാബിന് വേണ്ടി ഗുര്‍നൂര്‍ ബ്രാര്‍ മൂന്നും രമണ്‍ദീപ് സിംഗ് രണ്ടും വിക്കറ്റ് വീഴ്ത്തി.

കൊല്‍ക്കത്ത മിന്നിക്കും

ഐപിഎല്‍ താരലേലത്തിന് അബുദാബി ഒരുങ്ങി. ഇന്ന് 2.30 മുതലാണ് മിനി ലേലം ആരംഭിക്കുക. അതിനിടെ അടുത്ത ഐപിഎല്‍ മത്സരങ്ങളുടെ സാധ്യതാ തീയതികളും പുറത്തുവന്നു. റിപ്പോര്‍ട്ട് പ്രകാരം മാര്‍ച്ച് 26ന് ആകും പുതിയ ഐപിഎല്‍ സീസണ്‍ ആരംഭിക്കുക. മേയ് 31നാണ് ഫൈനല്‍. ഫൈനലിന് ബംഗളൂരു ചിന്നസ്വാമി സ്റ്റേഡിയം വേദിയായേക്കും. മിനി ലേലത്തില്‍ ഏറ്റവും സമ്പന്നര്‍ കൊല്‍ക്കത്ത നൈറ്റ് റൈഡേഴ്സാണ്. കാല്‍ക്കത്തയ്ക്ക് താരലേലത്തില്‍ ബാക്കിയുള്ളത് 64.30 കോടി രൂപ. ആറ് വിദേശികള്‍ ഉള്‍പ്പടെ 13 താരങ്ങളെ സ്വന്തമാക്കാം. താരലേലത്തില്‍ കാമറൂണ്‍ ഗ്രീന്‍, പൃഥ്വി ഷാ, സര്‍ഫറാസ് ഖാന്‍, ജാമി സ്മിത്ത്, ജോണി ബെയര്‍സ്റ്റോ, കാര്‍ത്തിക് ശര്‍മ, മതീഷ പതിരാന, മാറ്റ് ഹെന്റി തുടങ്ങിയവരെ സ്വന്തമാക്കാന്‍ കൊല്‍ക്കത്ത ശ്രമിച്ചേക്കും.

രാജസ്ഥാന്‍ റോയല്‍സിന് താരലേലത്തില്‍ ബാക്കിയുള്ളത് 16.05 കോടി രൂപ. ഒരുവിദേശ താരം ഉള്‍പ്പടെ ഒന്‍പത് താരങ്ങളെ സ്വന്തമാക്കാം. ബിഷ്ണോയ്, ചാഹര്‍, വിഘ്നേഷ്, സല്‍മാന്‍ നിസാര്‍ തുടങ്ങിയരെ കൊണ്ടുവരാന്‍ ശ്രമിക്കും. പഞ്ചാബ് കിംഗ്സിന് ലേലത്തില്‍ ബാക്കിയുള്ളത് 11.50 കോടി രൂപ. രണ്ട് വിദേശ താരങ്ങള്‍ ഉള്‍പ്പടെ നാല് താരങ്ങളെ സ്വന്തമാക്കാം. ഷായ് ഹോപ്പ്, ബെയര്‍സ്റ്റോ, മാറ്റ് ഹെന്റി, രാഹുല്‍ ചാഹര്‍, വിഘ്നേഷ് പുത്തൂര്‍ എന്നിവരെ കൊണ്ടുവരാന്‍ ശ്രമിക്കും. ഗുജറാത്ത് ടൈറ്റന്‍സിന് താരലേലത്തില്‍ ബാക്കിയുള്ളത് 12.90 കോടി രൂപ. നാല് വിദേശികള്‍ ഉള്‍പ്പെട അഞ്ച് താരങ്ങളെ സ്വന്തമാക്കാം. ഡേവിഡ് മില്ലര്‍, ലിയാം ലിവിംഗ്സ്റ്റണ്‍, മെന്‍ഡിസ്, ബെയര്‍സ്റ്റോ, ആഡം മില്‍നെ, ജേക്കബ് ഡഫി എന്നിവരെ ടീമിലെത്തിക്കാന്‍ ശ്രമിക്കും.

സണ്‍റൈസേഴ്സ് ഹൈദരാബാദിന് താരലേലത്തില്‍ ബാക്കിയുള്ളത് 25.50 കോടി രൂപ. രണ്ട് വിദേശികള്‍ ഉള്‍പ്പടെ പത്ത് താരങ്ങളെ സ്വന്തമാക്കാം. രണ്ട് വിദേശികള്‍ ഉള്‍പ്പടെ പത്ത് താരങ്ങളെ സ്വന്തമാക്കാം. അക്വിബ് നബി, ആകാശ് ദീപ്, അശോക് ശര്‍മ, മഹിപാല്‍ ലോംറോര്‍, കാര്‍ത്തിക് ശര്‍മ എന്നിവരാണ് ഹൈദരബാദിന്റെ ലക്ഷ്യം. ഡല്‍ഹി ക്യാപിറ്റല്‍സിന് താരലേലത്തില്‍ ബാക്കിയുള്ളത് 21.80 കോടി രൂപ. അഞ്ച് വിദേശികള്‍ ഉള്‍പ്പെട എട്ട് താരങ്ങളെ സ്വന്തമാക്കാം. ക്വിന്റണ്‍ ഡി കോക്ക്, പതും നിസ്സങ്ക, പതിരാന, ബെയര്‍സ്റ്റോ, മുസതഫിസുര്‍ എന്നിവരെ ലക്ഷ്യമിടും.

ലക്നൗ സൂപ്പര്‍ ജയന്റ്സിന് താരലേലത്തില്‍ ബാക്കിയുള്ളത് 22.95 കോടി രൂപ. നാല് വിദേശികള്‍ ഉള്‍പ്പടെ ആറ് താരങ്ങളെ ലേലത്തില്‍ സ്വന്തമാക്കാം. ഹോള്‍ഡര്‍, സല്‍മാന്‍ നിസാര്‍, അല്‍സാരി ജോസഫ്, വിയാല്‍ മള്‍ഡര്‍ തുടങ്ങിയ താരങ്ങളിലാണ് ലക്നൗവിന്റെ കണ്ണ്. ഏറ്റവും പണം കുറവുള്ളത് മുംബൈ ഇന്ത്യന്‍സിനാണ്. ബാക്കിയുള്ളത് 2.75 കോടി രൂപ. ഒരു വിദേശി ഉള്‍പ്പടെ അഞ്ച് താരങ്ങളെ സ്വന്താമാക്കാം. ജോണി ബെയര്‍സ്റ്റോ, കുശാല്‍ മെന്‍ഡിസ്, ജാമി സ്മിത്ത്, ടീം സീഫെര്‍ട്ട് തുടങ്ങിയവരെ മുംബൈ ലക്ഷ്യമിടും. ആര്‍സിബിക്ക് താരലേലത്തില്‍ ബാക്കിയുള്ളത് 16.40 കോടി. രണ്ട് വിദേശികള്‍ ഉള്‍പ്പടെ എട്ട് താരങ്ങളെ ടീമിലെത്തിക്കാം. ലുംഗി എന്‍ഗിഡി, അല്‍സാരി ജോസഫ്, ടസ്‌കിന്‍ അഹമ്മദ്, സ്പെന്‍സര്‍ ജോണ്‍സണ്‍, സര്‍ഫറാസ്, ദീപക് ഹൂഡ എന്നിവരെ ആര്‍സിബി ലക്ഷ്യമിടും. ചെന്നൈ സൂപ്പര്‍ കിംഗ്സിന്റെ അക്കൗണ്ടില്‍ 43.40കോടി രൂപ. നാല് വിദേശ താരങ്ങള്‍ ഉള്‍പ്പടെ ഒന്‍പതുപേരെ ലേലത്തില്‍ സ്വന്തമാക്കാം. ലേലത്തില്‍ ഗ്രീന്‍, വെങ്കടേഷ്, ലിയാം ലിയാം ലിവിംഗ്സ്റ്റണ്‍, ജേസണ്‍ ഹോള്‍ഡര്‍, മൈക്കല്‍ ബ്രേസ്വെല്‍, മുസ്തഫിസുര്‍ റഹ്‌മാന്‍ എന്നിവരെ ചെന്നൈ ലക്ഷ്യമിടും.

പ്രതീക്ഷയോടെ കേരള താരങ്ങള്‍

ഐപിഎല്‍ താരലേലത്തില്‍ പ്രതീക്ഷയോടെ പതിനൊന്ന് കേരള താരങ്ങള്‍. കെ എം ആസിഫ്, രോഹന്‍ കുന്നുമ്മല്‍, സല്‍മാന്‍ നിസാര്‍, അഹമ്മദ് ഇമ്രാന്‍, ഏദന്‍ ആപ്പിള്‍ ടോം, വിഘ്‌നേഷ് പുത്തൂര്‍, ശ്രീഹരി നായര്‍, അബ്ദുല്‍ ബാസിത്, അഖില്‍ സ്‌കറിയ, മുഹമ്മദ് ഷറഫുദ്ദീന്‍, ജിക്കു ബ്രൈറ്റ് എന്നിവരാണ് ലേലപ്പട്ടികയിലുളള താരങ്ങള്‍. കെ എം ആസിഫാണ് ഉയര്‍ന്ന അടിസ്ഥാന വിലയുള്ള മലയാളിതാരം. 40 ലക്ഷം രൂപയാണ് ആസിഫിന്റെ അടിസ്ഥാന വില. കേരളത്തിന്റെ സീനിയര്‍ ടീമില്‍ കളിച്ചിട്ടില്ലാത്ത ജിക്കു കഴിഞ്ഞ സീസണില്‍ മുംബൈ ഇന്ത്യന്‍സിന്റെ നെറ്റ്സ് ബൗളറായിരുന്നു. വിഘ്നേഷ് പുത്തൂര്‍ കഴിഞ്ഞ സീസണില്‍ മുംബൈ ഇന്ത്യന്‍സ് താരമായിരുന്നു.

സ്വന്തം ലേഖകൻ