അബുദാബി: ഐപിഎല്‍ മിനി താരലേലത്തില്‍ അണ്‍ക്യാപ്ഡ് താരങ്ങള്‍ക്ക് പൊന്നുവില. പ്രശാന്ത് വീറും കാര്‍ത്തിക് ശര്‍മയും അക്വിബ് നബിയുമാണ് കോടികളുടെ കിലുക്കത്തോടെ ഐപിഎല്‍ ടീമുകളില്‍ ഇടംകണ്ടെത്തിയത്. സീനിയര്‍ താരങ്ങളെ ടീമിലെത്തിച്ച് വയസന്‍ പടയെന്ന് പരിഹാസം ഏറ്റുവാങ്ങിയ ചെന്നൈ സൂപ്പര്‍ കിംഗ്‌സ് യുവത്വം വീണ്ടെടുക്കാന്‍ ഉറച്ചായിരുന്നു ഇത്തവണ താരലേലത്തിന് എത്തിയത്. ആയുഷ് മാത്രയ്ക്കും ഉര്‍വില്‍ പട്ടേലിനും ഒപ്പം ഇനി യുവതാരങ്ങളായ പ്രശാന്ത് വീറും കാര്‍ത്തിക് ശര്‍മയും ചൈന്നൈ സൂപ്പര്‍ കിംഗ്‌സിന്റെ മഞ്ഞക്കുപ്പായത്തില്‍ ടീമിന്റെ കരുത്താകും.

രവീന്ദ്ര ജഡേജയുടെ പകരക്കാരനെ തേടുന്ന ചെന്നൈ സൂപ്പര്‍ കിംഗ്‌സ് പ്രശാന്ത് വീറിനായി 14.20 കോടി രൂപ മുടക്കാന്‍ തയാറായി. 30 ലക്ഷം രൂപയായിരുന്നു ഇടം കൈയന്‍ സ്പിന്നറും ബാറ്ററുമായി പ്രശാന്ത് വീറിന്റെ അടിസ്ഥാനവില. ഉത്തര്‍ പ്രദേശ് ട്വന്റി 20 ലീഗില്‍ നോയിഡ സൂപ്പര്‍ കിംഗ്‌സിനായി തിളങ്ങിയ പ്രശാന്ത് വീര്‍ ഇത്തവണത്തെ സയ്യിദ് മുഷ്താഖ് അലി ട്രോഫിയിലും തിളങ്ങിയിരുന്നു. മുംബൈ ഇന്ത്യന്‍സിന്റെയും രാജസ്ഥാന്‍ റോയല്‍സിന്റെയും സണ്‍റൈസേഴ്‌സ് ഹൈദരാബാദിന്റെയും ലക്‌നൗ സൂപ്പര്‍ ജയന്റ്‌സിന്റെയും ശക്തമായ വെല്ലുവിളി മറികടന്നാണ് ചെന്നൈ സൂപ്പര്‍ കിംഗ്‌സ് പ്രശാന്ത് വീറിനെ 14.20 കോടി രൂപക്ക് ടീമിലെത്തിച്ചത്.

രാജസ്ഥാന്റെ സിക്‌സ് ഹിറ്ററും വിക്കറ്റ് കീപ്പര്‍ ബാറ്ററുമായ കാര്‍ത്തിക് ശര്‍മക്കായും ശക്തമായ ലേലം വിളിയാണ് നടന്നത്. സണ്‍റൈസേഴ്‌സ് ഹൈദരാബാദിന്റെ ശക്തമായ വെല്ലുവിളി മറികടന്നാണ് ചെന്നൈ രാജസ്ഥാന്‍ താരത്തെ 14.20 കോടി രൂപക്ക് ടീമിലെത്തിച്ചത്. 30 ലക്ഷം രൂപയായിരുന്ന കാര്‍ത്തിക് ശര്‍മയുടെയും അടിസ്ഥാനവില. കഴിഞ്ഞ രഞ്ജി സീസണില്‍ ഏറ്റവും കൂടുതല്‍ സിക്‌സ് നേടിയ താരമായ കാര്‍ത്തിക് ശര്‍മ ചെന്നൈ സൂപ്പര്‍ കിംഗ്‌സിനൊപ്പം പരിശീലനം നടത്തിയിരുന്നു. ഇതുവരെ കളിച്ച 12 ടി20 മത്സരങ്ങളില്‍ നിന്ന് 164 സ്‌ട്രൈക്ക് റേറ്റില്‍ 334 റണ്‍സാണ് നേടിയത്. 28 സിക്‌സുകളും കാര്‍ത്തിക് പറത്തി. രാജസ്ഥാനു വേണ്ടി രഞ്ജി ട്രോഫിയിലും സയ്യിദ് മുഷ്താഖ് അലി, വിജയ് ഹസാരെ ടൂര്‍ണമെന്റുകളിലും താരം തിളങ്ങി. രാജസ്ഥാന്‍ പ്രീമിയര്‍ ലീഗിലെ വെടിക്കെട്ട് ബാറ്റിങ്ങോടെയാണ് കാര്‍ത്തിക്ക് ഐപിഎല്‍ ടീമുകളുടെ കണ്ണില്‍ പെട്ടത്.

അണ്‍ ക്യാപ്ഡ് താരങ്ങളുടെ ലേലത്തില്‍ ഞെട്ടിച്ച മറ്റൊരു താരം ജമ്മു കശ്മീര്‍ പേസറായ അക്വിബ് ധറിനാണ്. 30 ലക്ഷം രൂപ അടിസ്ഥാന വിലയുണ്ടായിരുന്ന അക്വിബിനായി ഡല്‍ഹിയും ആര്‍സിബിയുമാണ് തുടക്കം മുതല്‍ വാശിയോടെ രംഗത്തെത്തിയത്. വാശിയേറിയ ലേലത്തിനൊുവില്‍ 8.4 കോടി രൂപക്ക് ഡല്‍ഹി ക്യാപിറ്റല്‍സാണ് അക്വിബ് നബിയെ സ്വന്തമാക്കിയത്. 29കാരനായ അക്വിബ് നബി മികച്ച ന്യൂബോളില്‍ മികച്ച സ്വിംഗ് കണ്ടെത്താന്‍ കഴിയുന്ന ബൗളറും ഡെത്ത് ഓവര്‍ സ്‌പെഷ്യലിസ്റ്റുമാണ്. സയ്യിദ് മുഷ്താഖ് അലി ട്രോഫിയിലും ഇത്തവണത്തെ രഞ്ജി ട്രോഫിയിലും അക്വിബ് തിളങ്ങിയിരുന്നു. ഈ രഞ്ജി സീസണില്‍ ഒമ്പത് ഇന്നിംഗ്‌സില്‍ 29 വിക്കറ്റെടുത്ത അക്വിബ് രാജസ്ഥാനെതിരെ 24 റണ്‍സ് വഴങ്ങി ഏഴ് വിക്കറ്റെടുത്ത് ടീമിന് നോക്കൗട്ടില്‍ സ്ഥാനം ഉറപ്പാക്കുകയും ചെയ്തു. താരത്തിന്റെ ആദ്യ ഐപിഎല്‍ സീസണാണ് 2026ലേത്.

താരലേലത്തില്‍ നേട്ടം കൊയ്തത് ഓസ്‌ട്രേലിയന്‍ താരം കാമറൂണ്‍ ഗ്രീനും ശ്രീലങ്കന്‍ താരം മതീഷ പതിരാനയുമാണ്. ഗ്രീന്‍ 25.2 കോടി രൂപയ്ക്ക് കൊല്‍ക്കത്ത നൈറ്റ് റൈഡേഴ്‌സില്‍ കളിക്കും. ഓസ്‌ട്രേലിയന്‍ താരത്തിനായി വാശിയേറിയ പോരാട്ടമാണു തുടക്കം മുതല്‍ നടന്നത്. രാജസ്ഥാന്‍ റോയല്‍സ് തുടക്കത്തില്‍ രംഗത്തുണ്ടായിരുന്നെങ്കിലും പിന്നീട് പിന്‍മാറി. ചെന്നൈ സൂപ്പര്‍ കിങ്‌സും കൊല്‍ക്കത്തയും തമ്മിലായിരുന്നു ഗ്രീനിനു വേണ്ടിയുള്ള പിന്നീടത്തെ പോരാട്ടം. ഒടുവില്‍ പഴ്‌സിലെ വലിയ തുകയുടെ കരുത്തില്‍ ഗ്രീനിനെ കൊല്‍ക്കത്ത സ്വന്തമാക്കി.ചെന്നൈ സൂപ്പര്‍ കിങ്‌സ് റിലീസ് ചെയ്ത ശ്രീലങ്കന്‍ പേസര്‍ മതീഷ പതിരാനയ്ക്കും വലിയ വില കിട്ടി. 18 കോടി രൂപയ്ക്കാണ് താരം കൊല്‍ക്കത്ത നൈറ്റ് റൈഡേഴ്‌സില്‍ ചേര്‍ന്നത്. കഴിഞ്ഞ ഐപിഎലില്‍ 13 കോടിക്കായിരുന്നു താരം ചെന്നൈയില്‍ കളിച്ചത്. പതിരാനയ്ക്കു വേണ്ടി ലക്‌നൗ സൂപ്പര്‍ ജയന്റ്‌സും ഡല്‍ഹി ക്യാപിറ്റല്‍സും രംഗത്തെത്തിയതോടെ രണ്ടു കോടി അടിസ്ഥാന വിലയിട്ട താരത്തിന്റെ വില 15 കോടി പിന്നിട്ടിരുന്നു. എന്നാല്‍ അപ്രതീക്ഷിതമായി മത്സരത്തിലേക്ക് എത്തിയ കൊല്‍ക്കത്ത വലിയ തുക മുടക്കി താരത്തെ സ്വന്തമാക്കുകയായിരുന്നു.

ഇന്ത്യന്‍ ഓള്‍റൗണ്ടര്‍ വെങ്കടേഷ് അയ്യര്‍ ഏഴുകോടിക്ക് റോയല്‍ ചാലഞ്ചേഴ്‌സ് ബെംഗളൂരുവില്‍ ചേര്‍ന്നു. ഓസ്‌ട്രേലിയയുടെ യുവതാരം ജേക് ഫ്രേസര്‍ മഗ്രുകിനെ ആദ്യ അവസരത്തില്‍ ആരും വിളിച്ചില്ല. ദക്ഷിണാഫ്രിക്കന്‍ ബാറ്റര്‍ ഡേവിഡ് മില്ലര്‍ രണ്ടു കോടിക്ക് ഡല്‍ഹി ക്യാപിറ്റല്‍സില്‍ ചേരും. ഇന്ത്യന്‍ യുവതാരം പൃഥ്വി ഷായും ആദ്യ അവസരത്തില്‍ വിറ്റുപോയില്ല.

സ്വന്തം ലേഖകൻ