ഇന്ന് സഞ്ജുവിന് തിളങ്ങണം, ചെന്നൈയ്ക്ക് ജയിക്കണം; എതിരാളി റോയല് ചലഞ്ചേഴ്സ് ബെംഗളൂരു; ചിന്നസ്വാമി സ്റ്റേഡിയത്തില് ഇന്ന് ദക്ഷിണേന്ത്യന് എല് ക്ലാസിക്കോ; ഐപിഎല് ആരാധകര് ആവേശത്തില്
ബെംഗളൂരു: ഐപിഎല് പോരാട്ടത്തിന് ആവേശം പകര്ന്ന് ക്രിക്കറ്റ് ലോകം കാത്തിരുന്ന 'ദക്ഷിണേന്ത്യന് എല് ക്ലാസിക്കോ'യ്ക്ക് ഇന്ന് ബെംഗളൂരുവിലെ ചിന്നസ്വാമി സ്റ്റേഡിയം വേദിയാകും. സീസണിലെ രണ്ടാം പോരാട്ടത്തില് കരുത്തരായ റോയല് ചലഞ്ചേഴ്സ് ബെംഗളൂരുവും ചെന്നൈ സൂപ്പര് കിംഗ്സും നേര്ക്കുനേര് എത്തുമ്പോള് ആരാധകര് ആവേശത്തിന്റെ കൊടുമുടിയിലാണ്. വൈകീട്ട് ഏഴരയ്ക്കാണ് മത്സരത്തിന് തുടക്കമാകുക. ടൂര്ണമെന്റിലെ ആദ്യ മത്സരത്തില് സണ്റൈസേഴ്സ് ഹൈദരാബാദിനെ തകര്ത്തുവിട്ട ആത്മവിശ്വാസത്തിലാണ് ആര്സിബി സ്വന്തം മൈതാനത്തിറങ്ങുന്നത്. എന്നാല് മറുവശത്ത്, കളിച്ച രണ്ട് മത്സരങ്ങളിലും പരാജയമേറ്റുവാങ്ങിയ ചെന്നൈയ്ക്ക് ഇന്നത്തെ വിജയം അനിവാര്യമാണ്.
ഈ സീസണില് ക്രിക്കറ്റ് ലോകം ഏറ്റവും കൂടുതല് ഉറ്റുനോക്കുന്നത് മലയാളി താരം സഞ്ജു സാംസണിന്റെ പ്രകടനമാണ്. വര്ഷങ്ങളോളം രാജസ്ഥാന് റോയല്സിനെ നയിച്ച സഞ്ജു, മഞ്ഞക്കുപ്പായത്തില് ചെന്നൈയുടെ ഭാഗമായത് വലിയ വാര്ത്തയായിരുന്നു. എന്നാല് ആദ്യ രണ്ട് മത്സരങ്ങളിലും സഞ്ജുവിന് പ്രതീക്ഷയ്ക്കൊത്ത പ്രകടനം പുറത്തെടുക്കാനായില്ല. രാജസ്ഥാനെതിരെയും പഞ്ചാബിനെതിരെയും രണ്ടക്കം കാണാതെ പുറത്തായ സഞ്ജു, ചിന്നസ്വാമിയിലെ ബാറ്റിംഗ് പറുദീസയില് ഫോമിലേക്ക് തിരിച്ചെത്തുമെന്ന പ്രതീക്ഷയിലാണ് ആരാധകര്. ക്യാപ്റ്റന് ഋതുരാജ് ഗെയ്ക്വാദ് നയിക്കുന്ന ബാറ്റിംഗ് നിരയ്ക്കൊപ്പം ബൗളിംഗ് യൂണിറ്റിലെ പാളിച്ചകളും ചെന്നൈയെ അലട്ടുന്നുണ്ട്. രാഹുല് ചഹറും നൂര് അഹമ്മദും അടങ്ങുന്ന സ്പിന് നിര വന്തോതില് റണ്സ് വഴങ്ങുന്നത് ടീമിന് വലിയ വെല്ലുവിളിയാണ്.
മറുവശത്ത്, വിരാട് കോഹ്ലി നയിക്കുന്ന ബാറ്റിംഗ് നിരയുടെ കരുത്തിലാണ് റോയല് ചലഞ്ചേഴ്സ് ബെംഗളൂരുവിന്റെ കുതിപ്പ്. കോഹ്ലിക്കൊപ്പം ദേവ്ദത്ത് പടിക്കലും ക്യാപ്റ്റന് രജത് പടിദാറും ഫോമിലാണ്. ഫില് സാള്ട്ട്, ജിതേഷ് ശര്മ്മ, ടിം ഡേവിഡ് എന്നിവര് മധ്യനിരയ്ക്ക് കരുത്തേകുമ്പോള് റൊമാരിയോ ഷെപ്പേര്ഡും ക്രുനാല് പാണ്ഡ്യയും ഓള്റൗണ്ട് മികവുമായി ടീമിന് സന്തുലിതാവസ്ഥ നല്കുന്നു. പരിക്കേറ്റ ജോഷ് ഹെയ്സല്വുഡിന്റെ അഭാവം നികത്തുന്ന തരത്തില് ജേക്കബ് ഡഫിയും ഭുവനേശ്വര് കുമാറും പന്തെറിയുന്നത് ആര്സിബി ക്യാമ്പിന് ആശ്വാസം പകരുന്നുണ്ട്. നിലവിലെ ചാമ്പ്യന് പ്രകടനം ആവര്ത്തിക്കാനുറച്ചാണ് ആര്സിബി ഇന്ന് ഇറങ്ങുന്നത്.
നേര്ക്കുനേര് കണക്കുകളില് ചെന്നൈ സൂപ്പര് കിംഗ്സിനാണ് ആധിപത്യം. ഇതുവരെ നടന്ന 35 പോരാട്ടങ്ങളില് 21 എണ്ണത്തില് ചെന്നൈ ജയിച്ചപ്പോള് 13 എണ്ണത്തിലാണ് ബെംഗളൂരുവിന് വിജയിക്കാനായത്. ഒരു മത്സരം ഫലമില്ലാതെ അവസാനിച്ചു. എന്നിരുന്നാലും, ബാറ്റര്മാരെ തുണയ്ക്കുന്ന ചിന്നസ്വാമിയിലെ വിക്കറ്റില് ഇന്ന് ഒരു റണ്വേട്ട തന്നെ പ്രതീക്ഷിക്കാം. ടോസ് നേടുന്നവര് രണ്ടാമത് ബാറ്റിംഗ് തിരഞ്ഞെടുക്കാനാണ് സാധ്യത കൂടുതല്. പഴയ പ്രതാപം വീണ്ടെടുക്കാന് ചെന്നൈയും വിജയതുടര്ച്ച ലക്ഷ്യമിട്ട് ബെംഗളൂരുവും നേര്ക്കുനേര് വരുമ്പോള് കളി ആവേശകരമാകുമെന്ന് ഉറപ്പാണ്.
