ഇന്നലെ മില്ലര്ക്ക് പിഴച്ചു; അന്ന് ജഡേജയെ ഭാഗ്യം തുണച്ചു! അന്ന് ചെന്നൈയെ രക്ഷിച്ചത് ആര്പി സിംഗിന്റെ ആ നോബോള്; ഇന്ന് ഗുജറാത്തിന് മുന്നില് ഡല്ഹി വീണത് ഒരു റണ്ണിന്; ഐപിഎല്ലിലെ ആ പഴയ 'ട്വിസ്റ്റ്' വീണ്ടും ചര്ച്ചയാകുമ്പോള്!
ന്യൂഡല്ഹി: ഐപിഎല് ചരിത്രത്തില് ഭാഗ്യനിര്ഭാഗ്യങ്ങള് മാറിമറയുന്ന മത്സരങ്ങള് എന്നും ആരാധകര്ക്ക് ആവേശമാണ്. കഴിഞ്ഞ ദിവസം ഡല്ഹി ക്യാപിറ്റല്സും ഗുജറാത്ത് ടൈറ്റന്സും തമ്മില് നടന്ന പോരാട്ടവും വര്ഷങ്ങള്ക്ക് മുന്പ് ചെന്നൈ സൂപ്പര് കിങ്സും റോയല് ചലഞ്ചേഴ്സ് ബംഗളൂരുവും തമ്മില് നടന്ന മത്സരവും തമ്മിലുള്ള സമാനതകളാണ് ഇപ്പോള് കായിക ലോകത്തെ പ്രധാന ചര്ച്ചാവിഷയം.
ഡല്ഹി ക്യാപിറ്റല്സിനെതിരെ വെറും ഒരു റണ്ണിന്റെ ആവേശകരമായ ജയമാണ് ഗുജറാത്ത് ടൈറ്റന്സ് സ്വന്തമാക്കിയത്. ഗുജറാത്തിന്റെ സീസണിലെ ആദ്യ വിജയമെന്ന പ്രത്യേകതയും ഇതിനുണ്ട്. എന്നാല് ഡല്ഹിക്ക് ജയിക്കാവുന്ന കളി കൈവിട്ടുപോയത് സൂപ്പര് താരം ഡേവിഡ് മില്ലറുടെ ഒരു തീരുമാനമാണെന്നാണ് ആരാധകരുടെ ആരോപണം. അവസാന ഓവറിലെ അഞ്ചാം പന്തില് സിംഗിള് എടുക്കാന് മില്ലര് വിസമ്മതിച്ചതാണ് വിനയായത്.
പ്രസിദ്ധ് കൃഷ്ണ എറിഞ്ഞ അവസാന ഓവറില് 2 പന്തില് 2 റണ്സ് വേണമെന്നിരിക്കെ, അഞ്ചാം പന്തില് സിംഗിള് എടുക്കാതെ സ്ട്രൈക്ക് നിലനിര്ത്താനാണ് മില്ലര് ശ്രമിച്ചത്. എന്നാല് അവസാന പന്തില് റണ്സ് നേടാന് കഴിയാതെ പോയതോടെ ഡല്ഹി ഒരു റണ്ണിന് പരാജയം ഏറ്റുവാങ്ങി. ഐപിഎല് ചരിത്രത്തിലെ സമാനമായ മറ്റൊരു മത്സരമാണ് ഇപ്പോള് സോഷ്യല് മീഡിയയിലെ ചര്ച്ചകളില് നിറയുന്നത്. ഇന്ന് മില്ലറാണെങ്കില് അന്ന് ചെന്നൈയ്ക്കായി കളിച്ചിരുന്ന ജഡേജയായിരുന്നു താരം.
ഈ സംഭവം 2013-ല് ചെന്നൈ സൂപ്പര് കിങ്സും ആര്സിബിയും തമ്മില് നടന്ന അവിശ്വസനീയമായ ഒരു മത്സരത്തെയാണ് ഓര്മ്മിപ്പിക്കുന്നത്. അന്ന് ചെന്നൈക്ക് വേണ്ടി ക്രീസിലുണ്ടായിരുന്നത് രവീന്ദ്ര ജഡേജയായിരുന്നു. അവസാന രണ്ട് പന്തില് രണ്ട് റണ്സ് വേണമെന്ന സമാന സാഹചര്യമായിരുന്നു അന്നും. ആര് പി സിങ് എറിഞ്ഞ അഞ്ചാം പന്തില് സിംഗിള് എടുക്കാന് അവസരമുണ്ടായിട്ടും സ്ട്രൈക്ക് കൈമാറാന് ജഡേജ തയ്യാറായില്ല. അവസാന പന്തില് രണ്ട് റണ്സ് വേണമെന്നിരിക്കെ ജഡേജ ഉയര്ത്തിയടിച്ച പന്ത് തേര്ഡ് മാനില് ക്യാച്ച് ചെയ്യപ്പെട്ടു.
ബംഗളൂരു താരങ്ങള് വിജയം ആഘോഷിച്ചു തുടങ്ങിയെങ്കിലും വിധി മറ്റൊന്നായിരുന്നു. ആര് പി സിങ് എറിഞ്ഞ ആ പന്ത് ഒരു 'നോ ബോള്' ആണെന്ന് അംപയര് വിധിച്ചു. നോ ബോളിലൂടെ ലഭിച്ച ഒരു റണ്ണിന് പുറമെ, ആ പന്തില് ജഡേജ സിംഗിള് പൂര്ത്തിയാക്കുകയും ചെയ്തതോടെ ചെന്നൈ അവിശ്വസനീയമായ വിജയം സ്വന്തമാക്കി. ഡേവിഡ് മില്ലര്ക്ക് ഇന്നലെ തുണയാകാതെ പോയ ആ 'ഭാഗ്യം' അന്ന് ജഡേജയെ തുണച്ചു എന്നതാണ് സോഷ്യല് മീഡിയ ചൂണ്ടിക്കാണിക്കുന്നത്. ക്രിക്കറ്റില് തന്ത്രങ്ങള്ക്കൊപ്പം തന്നെ ഭാഗ്യത്തിനും വലിയ സ്ഥാനമുണ്ടെന്ന് ഈ രണ്ട് മത്സരങ്ങളും അടിവരയിടുന്നു.
