ദക്ഷിണാഫ്രിക്കയ്‌ക്കെതിരായ ഏകദിന പരമ്പര; ഋതുരാജ് ഗെയ്‌ക്‌വാദിനെ പ്ലേയിംഗ് ഇലവനിൽ ഉൾപ്പെടുത്തും; മഹാരാഷ്ട്രാ താരത്തെ പരിഗണിക്കുന്നത് നാലാം നമ്പറിലേക്ക്?
റാഞ്ചി: ദക്ഷിണാഫ്രിക്കയ്‌ക്കെതിരായ ഏകദിന പരമ്പരയിലെ ആദ്യ മത്സരത്തിന് മുന്നോടിയായി ഇന്ത്യൻ ടീമിൽ മാറ്റങ്ങൾക്ക് സാധ്യത. കഴുത്തിന് പരിക്കേറ്റ സ്റ്റാർ ഓപ്പണർ ശുഭ്മാൻ ഗിൽ പരമ്പരയിൽ നിന്ന് പുറത്തായതിനെ തുടർന്ന്, ഋതുരാജ് ഗെയ്‌ക്‌വാദിനെ പ്ലേയിംഗ് ഇലവനിൽ ഉൾപ്പെടുത്തുമെന്നാണ് സൂചന. ഇന്ത്യൻ ഏകദിന ക്യാപ്റ്റൻ കെ.എൽ. രാഹുലാണ് ഈ വിവരം ഔദ്യോഗികമായി സ്ഥിരീകരിച്ചത്. നാളെ ഉച്ചയ്ക്ക് 1.30-ന് റാഞ്ചിയിൽ മത്സരം ആരംഭിക്കും.
മത്സരത്തിന് മുന്നോടിയായി മാധ്യമങ്ങളോട് സംസാരിക്കവെ, ടീമിന്റെ തന്ത്രങ്ങളെക്കുറിച്ചും ബാറ്റിംഗ് ക്രമീകരണങ്ങളെക്കുറിച്ചും രാഹുൽ വിശദീകരിച്ചു. 2023 ഡിസംബറിന് ശേഷം ആദ്യമായാണ് ഋതുരാജ് ഗെയ്‌ക്‌വാദ് ഏകദിന ക്രിക്കറ്റിൽ ഇന്ത്യക്കായി കളിക്കാനൊരുങ്ങുന്നത്. ഋതുരാജിനെ പ്രശംസിച്ചുകൊണ്ട് രാഹുൽ പറഞ്ഞത് ഇങ്ങനെ: "ഋതുരാജ് ഒരു മികച്ച കളിക്കാരനാണ്. ഞങ്ങളുടെ ബാറ്റിംഗ് ലൈനപ്പ് ഇപ്പോൾ ഏറെക്കുറെ ഉറപ്പായിക്കഴിഞ്ഞു. ലഭിച്ച അവസരങ്ങളെല്ലാം അദ്ദേഹം മികച്ച രീതിയിൽ വിനിയോഗിച്ചിട്ടുണ്ട്. ഈ പരമ്പരയിൽ അദ്ദേഹത്തിന് അവസരം നൽകാൻ ഞങ്ങൾ പദ്ധതിയിടുന്നുണ്ട്."
ടീമിന്റെ ബാറ്റിംഗ് ക്രമത്തിൽ ചില സുപ്രധാന മാറ്റങ്ങൾക്കും സാധ്യതയുണ്ട്. ശ്രേയസ് അയ്യരുടെ അഭാവം നാലാം നമ്പർ ബാറ്റിംഗ് സ്ഥാനം ഒഴിഞ്ഞുകിടക്കാൻ കാരണമായിട്ടുണ്ട്. ഈ സാഹചര്യത്തിൽ, പകരക്കാരനായ ഋതുരാജ് ഗെയ്‌ക്‌വാദ് ഇറങ്ങുമെന്നാണ് പ്രതീക്ഷിക്കുന്നത്. രോഹിത് ശർമ്മയ്‌ക്കൊപ്പം യുവതാരം യശസ്വി ജയ്‌സ്വാൾ ഓപ്പണിംഗ് ചെയ്യാനാണ് സാധ്യതയെന്നും രാഹുൽ സൂചിപ്പിച്ചു. ക്യാപ്റ്റൻ കെ.എൽ. രാഹുൽ തന്നെയാകും ആറാം നമ്പറിൽ ബാറ്റ് ചെയ്യുകയെന്നാണ് സൂചന.
വിക്കറ്റ് കീപ്പിംഗിനെക്കുറിച്ചും രാഹുൽ നിലപാട് വ്യക്തമാക്കി. ഋഷഭ് പന്ത് ടീമിലുണ്ടെങ്കിൽ താൻ വിക്കറ്റ് കീപ്പിംഗ് ചെയ്യില്ലെന്ന് രാഹുൽ അറിയിച്ചു. കഴിഞ്ഞ രണ്ട് വർഷമായി ഏകദിനത്തിൽ ഇന്ത്യയുടെ പ്രധാന വിക്കറ്റ് കീപ്പർ ബാറ്റ്‌സ്മാൻ രാഹുലായിരുന്നു. ദക്ഷിണാഫ്രിക്കയെ ടെംബ ബാവുമ തന്നെയാണ് നയിക്കുന്നത്.
