മുംബൈ: ഇന്ത്യൻ ക്രിക്കറ്റ് നായകൻ രോഹിത് ശർമ്മ തൻ്റെ ഗാരേജിലേക്ക് പുത്തൻ ഒരംഗത്തെക്കൂടി ചേർത്തിരിക്കുന്നു. ഇറ്റാലിയൻ ആഡംബര വാഹന നിർമ്മാതാക്കളായ ലംബോർഗിനിയുടെ പുത്തൻ സൂപ്പർ എസ്‌യുവി മോഡലായ ഉറൂസ് എസ്ഇ ആണ് ആ പുതിയ അതിഥി. മുൻപ് കൈവശമുണ്ടായിരുന്ന റെഗുലർ ഉറൂസ് ഒരു മത്സരവിജയിക്ക് സമ്മാനിച്ചതിന് പിന്നാലെയാണ്, ഏകദേശം 4.57 കോടി രൂപ എക്സ്-ഷോറൂം വില വരുന്ന ഈ പ്ലഗ്-ഇൻ ഹൈബ്രിഡ് വാഹനം രോഹിത് സ്വന്തമാക്കുന്നത്.

വാഹനത്തിന്റെ സാങ്കേതികമേന്മയെക്കാൾ, അതിൻ്റെ രജിസ്ട്രേഷൻ നമ്പറാണ് ഇപ്പോൾ സമൂഹമാധ്യമങ്ങളിലെ മുഖ്യ ചർച്ചാവിഷയം. '3015' എന്ന ഈ സംഖ്യയുടെ പിന്നിലെ ഗണിതശാസ്ത്രം ആരാധകർ ഇതിനകം തന്നെ വ്യാഖ്യാനിച്ചു കഴിഞ്ഞു. ഈ സംഖ്യ കേവലം യാദൃശ്ചികമല്ല, മറിച്ച് രോഹിത്തിൻ്റെ വ്യക്തിജീവിതവുമായി ഗാഢമായി ബന്ധപ്പെട്ടിരിക്കുന്നു. ഡിസംബർ 30-ന് ജനിച്ച മൂത്ത മകൾ സമൈറയുടെ ജന്മദിനത്തെ '30' എന്ന അക്കം മകൻ അഹാൻ്റെ ജന്മദിനമായ '15' ആണ് അടുത്ത ഭാഗം. ഇതിലെ കൗതുകം ഇവിടെ അവസാനിക്കുന്നില്ല; 30-ഉം 15-ഉം ചേരുമ്പോൾ ലഭിക്കുന്ന 45, ക്രിക്കറ്റ് ലോകത്ത് രോഹിത് അണിയുന്ന ജേഴ്‌സി നമ്പറാണ്.

തൻ്റെ വാഹനങ്ങൾക്ക് വ്യക്തിപരമായ പ്രാധാന്യമുള്ള നമ്പറുകൾ തിരഞ്ഞെടുക്കുന്നത് രോഹിത്തിന് ഒരു പതിവാണ്. മുൻപുണ്ടായിരുന്ന നീല നിറത്തിലുള്ള ഉറൂസിൻ്റെ രജിസ്ട്രേഷൻ നമ്പർ '264' ആയിരുന്നു, അത് ഏകദിന ക്രിക്കറ്റിൽ അദ്ദേഹം കുറിച്ച ഐതിഹാസികമായ ഉയർന്ന സ്കോറിൻ്റെ ഓർമ്മപ്പെടുത്തലായിരുന്നു.

ഓറഞ്ച് നിറത്തിലുള്ള പുതിയ ഉറൂസ് എസ്ഇ, ലംബോർഗിനിയുടെ വാഹനനിരയിലെ രണ്ടാമത്തെ ഹൈബ്രിഡ് മോഡലാണ്. റൂവുൾട്ടോയ്ക്ക് ശേഷം പ്ലഗ്-ഇൻ ഹൈബ്രിഡ് സാങ്കേതികവിദ്യയുമായി വിപണിയിലെത്തുന്ന ഈ വാഹനത്തിൻ്റെ ഓൺ-റോഡ് വില അഞ്ച് കോടി രൂപയ്ക്ക് മുകളിൽ വരുമെന്നാണ് വിലയിരുത്തപ്പെടുന്നത്. കായികരംഗത്തെ നേട്ടങ്ങൾക്കൊപ്പം, വാഹനലോകത്തെ തൻ്റെ അഭിരുചികളിലും തനതായ വ്യക്തിമുദ്ര പതിപ്പിക്കുകയാണ് രോഹിത് ശർമ്മ.

രോഹിത് ശർമ്മലംബോർഗിനി കാർനമ്പർ

സ്വന്തം ലേഖകൻ