ട്വന്റി 20യിൽ 500 വിക്കറ്റ് നേടിയ അഞ്ചാമത്തെ താരം; ചരിത്രനേട്ടവുമായി ഷാക്കിബ് അൽ ഹസൻ

ധാക്ക: ബംഗ്ലാദേശ് ക്രിക്കറ്റ് താരം ഷാക്കിബ് അൽ ഹസൻ ട്വന്റി 20 ക്രിക്കറ്റിൽ 500 വിക്കറ്റുകൾ എന്ന ചരിത്രനേട്ടം സ്വന്തമാക്കി. ഈ നാഴികക്കല്ല് പിന്നിടുന്ന ലോകത്തിലെ അഞ്ചാമത്തെ മാത്രം ബൗളറും ആദ്യത്തെ ബംഗ്ലാദേശ് താരവുമാണ് ഷാക്കിബ്. ഈ നേട്ടം കൈവരിക്കുന്ന ആദ്യത്തെ ഇടംകയ്യൻ സ്പിന്നർ എന്ന ബഹുമതിയും ഇതോടെ അദ്ദേഹത്തിന് സ്വന്തമായി.

ഡ്വെയ്ൻ ബ്രാവോ, റാഷിദ് ഖാൻ, സുനിൽ നരെയ്ൻ, ഇമ്രാൻ താഹിർ എന്നിവർ മാത്രമാണ് ഇതിനുമുൻപ് ട്വന്റി 20 ക്രിക്കറ്റിൽ 500 വിക്കറ്റുകൾ എന്ന നേട്ടം കൈവരിച്ചിട്ടുള്ളത്. ട്വന്റി 20 ക്രിക്കറ്റിലെ എക്കാലത്തെയും മികച്ച ഓൾറൗണ്ടർമാരിൽ ഒരാളെന്ന നിലയിലുള്ള തന്റെ സ്ഥാനം ഷാക്കിബ് ഒന്നുകൂടി ഉറപ്പിക്കുകയാണ് ഷാകിബ്. ഞായറാഴ്ച നടന്ന മത്സരത്തിൽ മുഹമ്മദ് റിസ്വാനെ പുറത്താക്കിയാണ് ഷാക്കിബ് 500 വിക്കറ്റ് ക്ലബ്ബിൽ ഇടംപിടിച്ചത്.

സ്വന്തം ബൗളിംഗിൽ റിസ്വാന്റെ ക്യാച്ചെടുത്താണ് അദ്ദേഹം ഈ നേട്ടം കൈവരിച്ചത്. അതേ മത്സരത്തിൽ രണ്ട് വിക്കറ്റുകൾ കൂടി നേടി അദ്ദേഹം തന്റെ ആകെ വിക്കറ്റ് നേട്ടം 502 ആക്കി ഉയർത്തി. റാഷിദ് ഖാൻ (660), ഡ്വെയ്ൻ ബ്രാവോ (631), സുനിൽ നരെയ്ൻ (590), ഇമ്രാൻ താഹിർ (554) എന്നിവരാണ് ഈ പട്ടികയിലെ മറ്റുള്ളവർ. ട്വന്റി 20 ഫോർമാറ്റിൽ 7000-ൽ അധികം റൺസും ഷാക്കിബ് നേടിയിട്ടുണ്ട്. ബാറ്റുകൊണ്ടും പന്തുകൊണ്ടും ഒരുപോലെ തിളങ്ങാനുള്ള അദ്ദേഹത്തിന്റെ കഴിവ് ലോകമെമ്പാടുമുള്ള ഫ്രാഞ്ചൈസി ലീഗുകളിൽ അദ്ദേഹത്തെ ഏറെ മൂല്യമുള്ള താരമാക്കി മാറ്റിയിരിക്കുന്നു.