ഐസിസി ചാമ്പ്യൻസ് ട്രോഫി സെമി ഫൈനലിസ്റ്റുകളെ തിരഞ്ഞെടുത്ത് ഷൊയ്ബ് അക്തര്‍; ഓസ്‌ട്രേലിയയില്ല, അഫ്ഗാനിസ്ഥാന് സെമി സാധ്യത; ഇന്ത്യയെ പാകിസ്ഥാൻ പരാജയപ്പെടുത്തും
കറാച്ചി: ഐസിസി ചാമ്പ്യൻസ് ട്രോഫി ക്രിക്കറ്റിന് ദിവസങ്ങള്‍ മാത്രം ബാക്കിയിരിക്കെ ടൂര്‍ണമെന്‍റിലെ ഫേവറൈറ്റുകളെ തെരഞ്ഞെടുത്തിരിക്കുകയാണ് മുന്‍ പാക് പേസര്‍ ഷൊയ്ബ് അക്തര്‍. ലോക ചാമ്പ്യൻമാരായ ഓസ്ട്രേലിയ അക്തര്‍ തെരഞ്ഞെടുത്ത സെമി ഫൈനലിസ്റ്റുകളില്ല എന്നതാണ് ശ്രദ്ധേയം. അതേസമയം, ലോക ക്രിക്കറ്റിലെ കുഞ്ഞൻമാരായ അഫ്ഗാനിസ്ഥാന് സെമിയിലെ സർപ്രൈസ് ടീമാകുമെന്നും പ്രവചിച്ചിരിക്കുകയാണ്. അഫ്ഗാനിസ്ഥാന് സെമി ഫൈനലിലെത്താനുള്ള മികച്ച ടീമുണ്ടെന്നും അക്തർ അഭിപ്രയാപ്പെട്ടു.
ഐസിസി ടൂർണമെന്റ്കളിൽ മികച്ച പ്രകടനത്തിലൂടെ ക്രിക്കറ്റ് ആരാധകരെയടക്കം അമ്പരപ്പിക്കാൻ അഫ്ഗാനിസ്ഥാന് കഴിഞ്ഞിട്ടുണ്ട്. 2024 ടി20 ലോകകപ്പിന്റെ അവസാന നാലിൽ ഇടം നേടാനും അഫ്ഗാനിസ്ഥാനായി. 2023ലെ ഏകദിന ലോകകപ്പില്‍ അഫ്ഗാനിസ്ഥാന് ആറാം സ്ഥാനത്താണ് ഫിനിഷ് ചെയ്തതെങ്കിലും നേരിയ വ്യത്യാസത്തിനായിരുന്നു സെമി സ്ഥാനം നഷ്ടമായത്. ചാമ്പ്യൻസ് ട്രോഫിയില്‍ ഇന്ത്യയും പാകിസ്ഥാനും ഒരു ഗ്രൂപ്പിലാണ്. അക്തറിന്‍റെ പ്രവചനം പോലെ ഇന്ത്യയും പാകിസ്ഥാനും സെമിയിലെത്തിയാല്‍ ന്യൂസിലന്‍ഡും ബംഗ്ലാദേശും ഇന്ത്യയുടെ ഗ്രൂപ്പില്‍ നിന്ന് പുറത്താവും
ടൂര്‍ണമെന്‍റില്‍ പക്വതയോടെ കളിച്ചാല്‍ അഫ്ഗാനിസ്ഥാന് സെമി ഫൈനലിലെത്താനുള്ള കരുത്തുണ്ടെനാണ് താന്‍ വിശ്വസിക്കുന്നതെന്ന് അക്തര്‍ പറഞ്ഞു. അഫ്ഗാനിസ്ഥാന് പുറമെ ഇന്ത്യയും പാകിസ്ഥാനുമായിരിക്കും സെമിയിലെത്തുന്ന മറ്റ് രണ്ടാ ടീമുകള്‍. എന്നാല്‍ സെമിയിലെത്താന്‍ സാധ്യതയുള്ള നാലാമത്തെ ടീമാതാണെന്ന് അക്തര്‍ വ്യക്തമാക്കിയില്ല. എന്നാൽ ടൂർണമെന്റിൽ പാകിസ്ഥാൻ ഇന്ത്യയെ പരാജയപ്പെടുത്തുമെന്നും അക്തർ പറയുന്നു. ഫെബ്രുവരി 23നാണ് ഇന്ത്യ പാകിസ്ഥാൻ പോരാട്ടവും.
രണ്ടാമത്തെ ഗ്രൂപ്പില്‍ നിന്ന് അഫ്ഗാനിസ്ഥാൻ സെമിയിലെത്തിയാല്‍ ഓസ്ട്രേലിയ, ഇംഗ്ലണ്ട്, ദക്ഷിമാഫ്രിക്ക ടീമുകളിലൊന്നാവും സെമിയിലെത്തുന്ന നാലാമത്തെ ടീം. ചാമ്പ്യൻസ് ട്രോഫിയില്‍ ഫെബ്രുവരി 23ന് നടക്കുന്ന ഇന്ത്യ-പാകിസ്ഥാന്‍ മത്സരത്തില്‍ പാകിസ്ഥാന്‍ ജയിക്കുമെന്നാണ് പ്രതീക്ഷയെന്നും അക്തര്‍ പറഞ്ഞു. 23ലെ മത്സരശേഷം ചാമ്പ്യൻസ് ട്രോഫി ഫൈനലിലും ഇന്ത്യയും പാകിസ്ഥാനും ഏറ്റുമുട്ടണമെന്നാണ് തന്‍റെ ആഗ്രഹമെന്നും അക്തര്‍ വ്യക്തമാക്കി.
