അഹമ്മദാബാദ്: ദക്ഷിണാഫ്രിക്കൻ താരം ഡേവിഡ് മില്ലർക്കൊപ്പം ചിത്രീകരിച്ച വീഡിയോ പങ്കുവെച്ചതിനെത്തുടർന്ന് സോഷ്യൽ മീഡിയ ഇൻഫ്ലുവൻസർ ആർ.ജെ. പ്രിൻസി പരീഖിന് നേരെ സൈബർ ആക്രമണം. ടി20 ലോകകപ്പിൽ ദക്ഷിണാഫ്രിക്കയോട് ഇന്ത്യ പരാജയപ്പെട്ടതിന് പിന്നാലെ പ്രിൻസി പങ്കുവെച്ച വീഡിയോയ്ക്ക് നേരെ ബലാത്സംഗ ഭീഷണികളും ബോഡി ഷെയ്മിംഗും ഉണ്ടായത്.ഇതിനെത്തുടർന്ന് തന്റെ ഫേസ്ബുക്ക് അക്കൗണ്ടിൽ നിന്നും ആ റീൽ നീക്കം ചെയ്യാൻ അവർ നിർബന്ധിതയായി.

എന്നാൽ ഈ വീഡിയോ ഇപ്പോഴും അവരുടെ ഇൻസ്റ്റാഗ്രാം അക്കൗണ്ടിലുണ്ട്. തനിക്ക് ലഭിച്ച ഭീഷണികൾക്കെതിരെ പോലീസിൽ പരാതി നൽകുമെന്ന് പ്രിൻസി പരീഖ് കൂട്ടിച്ചേർത്തു. സൂപ്പർ 8 പോരാട്ടത്തിൽ ഇന്ത്യയെ 76 റൺസിന് തകർത്ത ദക്ഷിണാഫ്രിക്കയുടെ വിജയശിൽപ്പി 35 പന്തിൽ 63 റൺസ് നേടിയ ഡേവിഡ് മില്ലറായിരുന്നു. മത്സരത്തിന് ശേഷം അഹമ്മദാബാദിലെ സ്റ്റേഡിയത്തിൽ വെച്ച് മില്ലറെ വലംവെക്കുന്ന തരത്തിലുള്ള തമാശ കലർന്ന ഒരു റീൽ പ്രിൻസി പങ്കുവെച്ചിരുന്നു.

"ഡേവിഡ്, നമ്മൾ സുഹൃത്തുക്കളാണെന്നാണ് ഞാൻ കരുതിയത്" എന്ന വാചകത്തോടെ പങ്കുവെച്ച വീഡിയോ നിമിഷനേരം കൊണ്ടാണ് വൈറലായത്. വീഡിയോ പുറത്തുവന്നതിന് പിന്നാലെ ഇന്ത്യൻ ആരാധകരിൽ ഒരു വിഭാഗം പ്രിൻസിക്ക് നേരെ തിരിയുകയായിരുന്നു. ബലാത്സംഗ ഭീഷണികൾക്ക് പുറമെ അവരുടെ ശരീരപ്രകൃതിയെ അധിക്ഷേപിക്കുന്ന തരത്തിലുള്ള നൂറുകണക്കിന് കമന്റുകളാണ് സോഷ്യൽ മീഡിയയിൽ നിറഞ്ഞത്.



"റീൽ പുറത്തിറങ്ങിയതിന് പിന്നാലെ എനിക്ക് നേരെ ഭയാനകമായ ബലാത്സംഗ ഭീഷണികളും ബോഡി ഷെയ്മിംഗും ഉണ്ടായി. ഇതിനെത്തുടർന്ന് ഫേസ്ബുക്കിൽ നിന്നും വീഡിയോ നീക്കം ചെയ്യാൻ ഞാൻ നിർബന്ധിതയായി," പ്രിൻസി വെളിപ്പെടുത്തി. നിലവിൽ ഇൻസ്റ്റാഗ്രാമിൽ മാത്രം വീഡിയോ നിലനിർത്തിയിട്ടുണ്ട്.





അതേസമയം, മത്സരത്തിൽ ഇന്ത്യയെ നിഷ്പ്രഭമാക്കിയാണ് ദക്ഷിണാഫ്രിക്ക വിജയിച്ചത്. 187 റൺസ് എന്ന ലക്ഷ്യം പിന്തുടർന്ന ഇന്ത്യ 111 റൺസിന് പുറത്താവുകയായിരുന്നു. മില്ലറുടെയും യുവതാരം ഡെവാൾഡ് ബ്രെവിസിന്റെയും (45 റൺസ്) പ്രകടനത്തെ മുൻ ഇന്ത്യൻ താരം ഇർഫാൻ പത്താൻ പ്രശംസിച്ചിരുന്നു. ബുംറയുടെ തകർപ്പൻ സ്പെല്ലിനെ അതിജീവിച്ച് മില്ലർ തന്റെ അനുഭവസമ്പത്ത് പുറത്തെടുത്തതാണ് ഇന്ത്യയ്ക്ക് തിരിച്ചടിയായതെന്ന് പത്താൻ നിരീക്ഷിച്ചു.

ആദ്യഘട്ടത്തിലുണ്ടായ തിരിച്ചടികൾക്ക് ശേഷം നിർണ്ണായകമായ ഒരു ഘട്ടത്തിൽ അർദ്ധസെഞ്ച്വറി നേടിയ മില്ലറുടെ പക്വതയാർന്ന ബാറ്റിംഗ് ദക്ഷിണാഫ്രിക്കൻ ഇന്നിംഗ്‌സിന് കരുത്തേകുകയും കളി പ്രോട്ടീസിന് അനുകൂലമാക്കുകയും ചെയ്തു. മൂന്ന് വിക്കറ്റുകൾ നഷ്ടപ്പെട്ടതിന് ശേഷം ഡെവാൾഡ് ബ്രെവിസ് സാഹചര്യം കൈകാര്യം ചെയ്ത രീതിയെയും പത്താൻ പ്രശംസിച്ചു. ബ്രെവിസിന്റെ 45 റൺസ് ഇന്നിംഗ്‌സും മില്ലറുമായുള്ള കൂട്ടുകെട്ടും മത്സരഫലത്തിൽ നിർണ്ണായകമായെന്ന് [പത്താൻ പറഞ്ഞു.

'ബ്രെവിസിന്റെ ആ 45 റൺസ് ഇന്നിംഗ്‌സ് വളരെ നിർണ്ണായകമായിരുന്നു. ആ കൂട്ടുകെട്ട് ഇല്ലായിരുന്നെങ്കിൽ ദക്ഷിണാഫ്രിക്ക ഒരിക്കലും ഈ മത്സരത്തിൽ വിജയിക്കില്ലായിരുന്നു. അത്രമാത്രം പക്വതയാർന്ന ഇന്നിംഗ്‌സായിരുന്നു അത്. മൂന്ന് വിക്കറ്റുകൾ വീണ സമയത്ത് തുടക്കത്തിൽ അദ്ദേഹം വളരെ കരുതലോടെയാണ് കളിച്ചത്. സാധാരണയായി ബ്രെവിസ് ക്രീസിലെത്തിയാൽ ഉടൻ തന്നെ വലിയ ഷോട്ടുകൾക്ക് മുതിരാറാണ് പതിവ്. എന്നാൽ 180 സ്ട്രൈക്ക് റേറ്റിൽ കളിക്കുന്ന ഒരു ബാറ്റ്‌സ്മാനായിരുന്നിട്ടും അദ്ദേഹം തുടക്കത്തിൽ കുറച്ച് സമയം എടുത്തു, ആ കൂട്ടുകെട്ട് കെട്ടിപ്പടുത്തു. ആ ഒരു പങ്കാളിത്തമാണ് ദക്ഷിണാഫ്രിക്കയ്ക്ക് ആവശ്യമായ സ്ഥിരത നൽകിയത്,' പത്താൻ കൂട്ടിച്ചേർത്തു.

ദക്ഷിണാഫ്രിക്കഡേവിഡ് മില്ലർസോഷ്യൽ മീഡിയ ഇൻഫ്ലുവൻസർ

സ്വന്തം ലേഖകൻ