അഹമ്മദാബാദ്: ടി20 ലോകകപ്പിലെ കരുത്തരുടെ പോരാട്ടത്തിൽ വെസ്റ്റ് ഇൻഡീസിനെ നിലംപരിശാക്കി ദക്ഷിണാഫ്രിക്ക സെമി ഫൈനലിൽ. സൂപ്പർ 8 പോരാട്ടത്തിൽ വിൻഡീസ് ഉയർത്തിയ 177 റൺസ് വിജയലക്ഷ്യം, 23 പന്തുകൾ ബാക്കിനിൽക്കെ വെറും ഒരു വിക്കറ്റ് നഷ്ടത്തിൽ ദക്ഷിണാഫ്രിക്ക മറികടന്നു. വിജയത്തോടെ ഗ്രൂപ്പിൽ നിന്ന് സെമി ഉറപ്പിക്കുന്ന ആദ്യ ടീമായി ദക്ഷിണാഫ്രിക്ക മാറി. പ്രോട്ടിയാസിന്റെ ഈ വമ്പൻ ജയം ഇന്ത്യയുടെ സെമി സാധ്യതകൾക്കും കരുത്തേകിയിട്ടുണ്ട്.

ക്യാപ്റ്റൻ ഏയ്ഡൻ മാർക്രത്തിന്റെ വെടിക്കെട്ട് ബാറ്റിംഗാണ് ദക്ഷിണാഫ്രിക്കൻ വിജയം അനായാസമാക്കിയത്. 46 പന്തിൽ 82 റൺസുമായി മാർക്രം പുറത്താകാതെ നിന്നു. 27 പന്തിൽ നിന്നായിരുന്നു മാർക്രത്തിന്റെ അർധസെഞ്ചുറി. ഓപ്പണർ ക്വിന്റൺ ഡി കോക്ക് (47), റിയാൻ റിക്കിൾടൺ (45 നോട്ടൗട്ട്) എന്നിവരും മികച്ച പിന്തുണ നൽകി. ഒന്നാം വിക്കറ്റിൽ മാർക്രം-ഡി കോക്ക് സഖ്യം പവർപ്ലേയിൽ അടിച്ചുകൂട്ടിയത് 69 റൺസാണ്. വിൻഡീസ് ഫീൽഡർമാരുടെ പിഴവുകളും ദക്ഷിണാഫ്രിക്കയ്ക്ക് കാര്യങ്ങൾ എളുപ്പമാക്കി.

നേരത്തെ ടോസ് നഷ്ടപ്പെട്ട് ബാറ്റിംഗിനിറങ്ങിയ വിൻഡീസ് ദക്ഷിണാഫ്രിക്കൻ പേസിനു മുന്നിൽ വിറയ്ക്കുന്ന കാഴ്ചയാണ് കണ്ടത്. ഒരു ഘട്ടത്തിൽ 81 റൺസിന് 7 വിക്കറ്റ് എന്ന ദയനീയ നിലയിലായിരുന്നു അവർ. എന്നാൽ എട്ടാം വിക്കറ്റിൽ ഒന്നിച്ച റൊമാരിയോ ഷെപ്പേർഡും (37 പന്തിൽ 52*) ജേസൺ ഹോൾഡറും (31 പന്തിൽ 49) ചേർന്നുള്ള 89 റൺസിന്റെ റെക്കോർഡ് കൂട്ടുകെട്ടാണ് വിൻഡീസിനെ ഭേദപ്പെട്ട സ്കോറിലെത്തിച്ചത്. ലുങ്കി എൻഗിഡി മൂന്ന് വിക്കറ്റെടുത്തു. റബാഡയും കോർബിൻ ബോഷും രണ്ട് വിക്കറ്റ് വീതം വീഴ്ത്തി.

ദക്ഷിണാഫ്രിക്ക വിൻഡീസിനെ തകർത്തത് ഇന്ത്യയ്ക്ക് വലിയ ആശ്വാസമാണ്. ഗ്രൂപ്പിലെ വരാനിരിക്കുന്ന മത്സരങ്ങളിൽ സിംബാബ്‌വെയെയും (ഇന്ന്), ഞായറാഴ്ച വെസ്റ്റ് ഇൻഡീസിനെയും തോൽപ്പിച്ചാൽ ഇന്ത്യയ്ക്ക് സുഗമമായി സെമിയിലേക്ക് മാർച്ച് ചെയ്യാം.

സ്കോർ ചുരുക്കത്തിൽ:

വെസ്റ്റ് ഇൻഡീസ്: 176/8 (20 ഓവർ) - റൊമാരിയോ ഷെപ്പേർഡ് (52*), ജേസൺ ഹോൾഡർ (49)

ദക്ഷിണാഫ്രിക്ക: 177/1 (16.1 ഓവർ) - ഏയ്ഡൻ മാർക്രം (82*), ക്വിന്റൺ ഡി കോക്ക് (47)

ടി20 ലോകകപ്പ്വെസ്റ്റ് ഇൻഡീസ്ദക്ഷിണാഫ്രിക്ക

സ്വന്തം ലേഖകൻ