മുള്ളൻപൂരിൽ പഞ്ചാബ് കിങ്സിന് ടോസ്, ഹൈദരാബാദിനെ ബാറ്റിങ്ങിനയച്ചു; വിജയക്കുതിപ്പ് തുടരാൻ ശ്രേയസ് അയ്യരും സംഘവും; പ്ലേയിങ് ഇലവൻ അറിയാം
മുള്ളൻപൂർ: ഐപിഎല്ലിൽ സൺറൈസേഴ്സ് ഹൈദരാബാദിനെതിരെ പഞ്ചാബ് കിങ്സിന് ടോസ്. ടോസ് നേടിയ പഞ്ചാബ് ക്യാപ്റ്റൻ ശ്രേയസ് അയ്യർ സൺറൈസേഴ്സിനെ ബാറ്റിങ്ങിന് അയച്ചു. മുള്ളൻപൂരിലെ മഹാരാജ യാദവീന്ദ്ര സിങ് സ്റ്റേഡിയത്തിലാണ് മത്സരം നടക്കുന്നത്. സീസണിൽ ഇതുവരെ തോൽവിയറിയാത്ത കുതിപ്പ് തുടരുന്ന പഞ്ചാബ് കിങ്സ് വലിയ ആത്മവിശ്വാസത്തിലാണ്.
കഴിഞ്ഞ സീസണിൽ 246 റൺസെന്ന കൂറ്റൻ ലക്ഷ്യം പിന്തുടർന്ന് തന്നെ തോൽപ്പിച്ച ഹൈദരാബാദിനോട് സ്വന്തം മണ്ണിൽ പകരം ചോദിക്കുക എന്ന ലക്ഷ്യം കൂടിയുണ്ട് ശ്രേയസ് അയ്യർക്കും സംഘത്തിനും. മറുവശത്ത്, കളിച്ച മൂന്ന് മത്സരങ്ങളിൽ രണ്ടിലും തോറ്റ ഹൈദരാബാദിന് ഈ മത്സരം നിർണായകമാണ്. സ്ഥിരത കണ്ടെത്താൻ ബുദ്ധിമുട്ടുന്ന ടീമിന് കരുത്തരായ പഞ്ചാബിനെ തളയ്ക്കുക എന്നത് വലിയ വെല്ലുവിളിയാകും.
പഞ്ചാബ് കിങ്സിനാണ് മത്സരത്തിൽ മുൻതൂക്കമെങ്കിലും സൺറൈസേഴ്സിന്റെ വെടിക്കെട്ട് ഓപ്പണർമാരായ ട്രാവിസ് ഹെഡിലും അഭിഷേക് ശർമ്മയിലുമാണ് ആരാധകരുടെ കണ്ണ്. ഇരുവരും നൽകുന്ന തുടക്കം മത്സരഫലത്തിൽ നിർണായകമാകും. വിക്കറ്റിന് പിന്നിലെ ചടുലനീക്കങ്ങളും ശ്രേയസ് അയ്യരുടെ നായക മികവും പഞ്ചാബിന് കരുത്താകുമ്പോൾ, സീസണിലെ തങ്ങളുടെ രണ്ടാം ജയം തേടിയാണ് മുൻ ചാമ്പ്യൻമാരായ ഹൈദരാബാദ് ഇറങ്ങുന്നത്.
പഞ്ചാബ് കിങ്സ് (പ്ലേയിങ് ഇലവൻ): പ്രിയാൻഷ് ആര്യ, പ്രഭ്സിമ്രാൻ സിങ് (വിക്കറ്റ് കീപ്പർ), കൂപ്പർ കോനോളി, ശ്രേയസ് അയ്യർ (ക്യാപ്റ്റൻ), ശശാങ്ക് സിങ്, മാർക്കസ് സ്റ്റോയിനിസ്, മാർക്കോ യാൻസൻ, സേവ്യർ ബാർട്ട്ലെറ്റ്, വൈശാഖ് വിജയ്കുമാർ, അർഷ്ദീപ് സിങ്, യുസ്വേന്ദ്ര ചാഹൽ.
സൺറൈസേഴ്സ് ഹൈദരാബാദ് (പ്ലേയിങ് ഇലവൻ): ട്രാവിസ് ഹെഡ്, അഭിഷേക് ശർമ്മ, ഇഷാൻ കിഷൻ (വിക്കറ്റ് കീപ്പർ/ക്യാപ്റ്റൻ), ഹെൻറിച്ച് ക്ലാസൻ, സലിൽ അറോറ, അനികേത് വർമ്മ, നിതീഷ് കുമാർ റെഡ്ഡി, ഹർഷ് ദുബെ, ശിവാംഗ് കുമാർ, ഹർഷൽ പട്ടേൽ, ഇഷാൻ മലിംഗ.
