ന്യൂഡൽഹി: ട്വന്റി20 ക്രിക്കറ്റിൽ 600 വിക്കറ്റ് ക്ലബിൽ ഇടം നേടി വെസ്റ്റിൻഡീസ് ഓൾറൗണ്ടർ സുനിൽ നരെയ്ൻ. അഫ്ഗാനിസ്ഥാന്റെ റാഷിദ് ഖാൻ (681 വിക്കറ്റ്), വിൻഡീസിന്റെ ഡ്വെയ്ൻ ബ്രാവോ (631 വിക്കറ്റ്) എന്നിവർക്ക് ശേഷം ഈ നേട്ടം കൈവരിക്കുന്ന ലോകത്തിലെ മൂന്നാമത്തെ താരമാണ് നരെയ്ൻ. ഐ.എൽ.ടി 20 ചാമ്പ്യൻഷിപ്പിൽ അബുദബി നൈറ്റ് റൈഡേഴ്സിനായി ഷാർജ വാരിയേഴ്സിനെതിരായ മത്സരത്തിലാണ് ഈ ചരിത്ര നേട്ടം സ്വന്തമാക്കിയത്.

ഷാർജ വാരിയേഴ്സിനെതിരായ മത്സരത്തിലെ ആദ്യ ഓവറിൽ വിക്കറ്റ് വീഴ്ത്തിയാണ് 600 എന്ന മാന്ത്രിക സംഖ്യയിലേക്ക് നരെയ്ൻ എത്തിയത്. അന്താരാഷ്ട്ര ക്രിക്കറ്റിലും ഇന്ത്യൻ പ്രീമിയർ ലീഗ് (ഐ.പി.എൽ) ഉൾപ്പെടെ ലോകമെമ്പാടുമുള്ള വിവിധ ചാമ്പ്യൻഷിപ്പുകളിലുമായി 568 മത്സരങ്ങളിൽ നിന്നാണ് അദ്ദേഹത്തിന്റെ ഈ വിക്കറ്റ് നേട്ടം. കരിയറിലുടനീളം 6.16 എന്ന മികച്ച ഇക്കണോമി റേറ്റ് നിലനിർത്തിക്കൊണ്ടാണ് ഈ നേട്ടം സുനിൽ നരെയ്ൻ കരസ്ഥമാക്കിയത്.

ഐ.പി.എല്ലിൽ കൊൽക്കത്ത നൈറ്റ് റൈഡേഴ്സിനുവേണ്ടി മാത്രമാണ് സുനിൽ നരെയ്ൻ കളിച്ചിട്ടുള്ളത്. കെ.കെ.ആറിനായി 189 മത്സരങ്ങളിൽ കളത്തിലിറങ്ങിയ അദ്ദേഹം, വിരാട് കോഹ്‌ലി, കീരോൺ പൊള്ളാർഡ് എന്നിവർക്കൊപ്പം ഒരു ടീമിനുവേണ്ടി 150-ൽ അധികം മത്സരങ്ങൾ കളിച്ച മൂന്ന് കളിക്കാരരിൽ ഒരാളാണ്. കൂടാതെ, ഐ.പി.എൽ ചരിത്രത്തിൽ ഏറ്റവും കൂടുതൽ വിക്കറ്റുകൾ (192) നേടിയ വിദേശതാരം എന്ന റെക്കോർഡും നരെയ്ന്റെ പേരിലാണ്.

2012-ൽ വെസ്റ്റിൻഡീസിനായി അരങ്ങേറ്റം കുറിച്ച സുനിൽ നരെയ്ൻ, ട്രിനിഡാഡ് ആൻഡ് ടുബാഗോ, സിഡ്നി സിക്സേഴ്സ്, ഗയാന വാരിയേഴ്സ്, കേപ് കോബ്രാസ്, മെൽബൺ റെനെഗേഡ്സ്, ലാഹോർ ഖലന്താഴ്സ്, ധാക്ക ഡൈനാമിറ്റ്സ്, ഓവൽ ഇൻവിൻസിബിൾസ്, ലോസ് ആഞ്ചലസ് നൈറ്റ് റൈഡേഴ്സ് തുടങ്ങിയ നിരവധി ടീമുകൾക്കായും പന്തെറിഞ്ഞിട്ടുണ്ട്.

600 വിക്കറ്റ് ക്ലബ്ബ്വെസ്റ്റിൻഡീസ് ഓൾറൗണ്ടർസുനിൽ നരെയ്ൻ

സ്വന്തം ലേഖകൻ