കൊളംബോ: ടി20 ലോകകപ്പിലെ ഗ്രൂപ്പ് ഘട്ട മത്സരത്തിൽ സിംബാബ്‌വെയ്‌ക്കെതിരെ ശ്രീലങ്കയ്ക്ക് മികച്ച സ്കോർ. ആർ. പ്രേമദാസ സ്റ്റേഡിയത്തിൽ നടക്കുന്ന മത്സരത്തിൽ ടോസ് നേടി ബാറ്റിംഗ് തിരഞ്ഞെടുത്ത ശ്രീലങ്ക നിശ്ചിത 20 ഓവറിൽ 7 വിക്കറ്റ് നഷ്ടത്തിൽ 178 റൺസെടുത്തു. ശ്രീലങ്കയ്ക്ക് വേണ്ടി ഓപ്പണർ പാതും നിസങ്ക തകർപ്പൻ പ്രകടനമാണ് കാഴ്ചവെച്ചത്. 41 പന്തിൽ നിന്ന് 8 ഫോറുകൾ ഉൾപ്പെടെ 62 റൺസാണ് താരം അടിച്ചുകൂട്ടിയത്. മധ്യനിരയിൽ പവൻ രത്നായകെ 25 പന്തിൽ 44 റൺസെടുത്ത് സ്കോർ ഉയർത്തുന്നതിൽ നിർണ്ണായക പങ്കുവഹിച്ചു. കുസൽ പെരേര (22), ദുനിത് വെല്ലാലഗെ (15*) എന്നിവരും ഭേദപ്പെട്ട പ്രകടനം കാഴ്ചവെച്ചു.

ടോസ് നേടി ബാറ്റിംഗ് തിരഞ്ഞെടുത്ത ശ്രീലങ്കയ്ക്ക് മികച്ച തുടക്കം ലഭിച്ചിട്ടും കൃത്യമായ ഇടവേളകളിൽ വിക്കറ്റുകൾ വീണത് ശ്രീലങ്കയ്ക്ക് തിരിച്ചടിയായി. ടീം സ്കോർ 54-ൽ നിൽക്കെ 22 റൺസെടുത്ത ഓപ്പണർ കുസൽ പെരേരയെ അഞ്ചാം ഓവറിൽ ലങ്കയ്ക്ക് നഷ്ടമായി. തുടർന്ന് ക്രീസിലെത്തിയ കുസൽ മെൻഡിസ് (14) 12.1 ഓവറിൽ ടീം സ്‌കോർ 100ൽ നിൽക്കെ പുറത്തായി. മികച്ച ഫോമിൽ കളിച്ചിരുന്ന ഓപ്പണർ പാതും നിസങ്ക (62) 14-ാം ഓവറിൽ 108 റൺസിൽ നിൽക്കെ വീണതോടെ ലങ്കയുടെ റൺറേറ്റ് കുറഞ്ഞു.

മധ്യനിരയിൽ കാമിന്ദു മെൻഡിസ് (7), നായകൻ ദസുൻ ഷാനക (6) എന്നിവർ വേഗത്തിൽ മടങ്ങിയതോടെ ലങ്ക 17.1 ഓവറിൽ 142-ന് 5 വിക്കറ്റ് എന്ന നിലയിലേക്ക് പതറി. അവസാന ഓവറുകളിൽ തകർത്തടിച്ച പവൻ രത്നായകെ (44), ദുഷാൻ ഹേമന്ത എന്നിവർ 19-ാം ഓവറിലെ അടുത്തടുത്ത പന്തുകളിൽ പുറത്തായതോടെ ലങ്കൻ സ്കോർ 164-ൽ 7 വിക്കറ്റ് എന്ന നിലയിലായി. നിശ്ചിത 20 ഓവർ പൂർത്തിയായപ്പോൾ 178 റൺസാണ് ശ്രീലങ്കയ്ക്ക് നേടാനായത്.

സിംബാബ്‌വെയ്‌ക്ക് വേണ്ടി ബ്ലെസിംഗ് മുസറബാനി, ബ്രാഡ് ഇവാൻസ്, ഗ്രെയിം ക്രീമർ എന്നിവർ രണ്ട് വിക്കറ്റുകൾ വീതം വീഴ്ത്തി. റയാൻ ബേൾ ഒരു വിക്കറ്റും നേടി. സിക്കന്ദർ റാസ 4 ഓവറിൽ 36 റൺസ് വിട്ടുകൊടുത്തെങ്കിലും വിക്കറ്റൊന്നും നേടാനായില്ല.

ടി20 ലോകകപ്പ്ശ്രീലങ്കസിംബാബ്‌വെ

സ്വന്തം ലേഖകൻ