അനധികൃത ഓൺലൈൻ ബെറ്റിംഗ് ആപ്പ് പ്രചാരണം; ശിഖര്‍ ധവാനെ ചോദ്യം ചെയ്യാന്‍ വിളിപ്പിച്ച് ഇഡി
മുംബൈ: ഓൺലൈൻ ബെറ്റിംഗ് ആപ്പായ 1xBet-ന് സോഷ്യൽ മീഡിയ വഴി പ്രചാരണം നൽകിയതുമായി ബന്ധപ്പെട്ട് ഇന്ത്യൻ ക്രിക്കറ്റ് താരം ശിഖർ ധവാനെ എൻഫോഴ്സ്മെന്റ് ഡയറക്ടറേറ്റ് (ഇ.ഡി) ചോദ്യം ചെയ്യാൻ വിളിപ്പിച്ചു. കള്ളപ്പണം വെളുപ്പിക്കൽ നിരോധന നിയമപ്രകാരമുള്ള (പി.എം.എൽ.എ) അന്വേഷണത്തിന്റെ ഭാഗമായാണ് ധവാന് ഇ.ഡി സമൻസ് അയച്ചിരിക്കുന്നത്.
ഈ കേസിൽ ലഭിച്ച വിവരങ്ങളുടെ അടിസ്ഥാനത്തിലാണ് ധവാനിൽ നിന്ന് മൊഴിയെടുക്കാൻ ഇ.ഡി തീരുമാനിച്ചിരിക്കുന്നത്. 1xBet പോലുള്ള ബെറ്റിംഗ് പ്ലാറ്റ്‌ഫോമുകളുടെ പ്രചാരണവുമായി ബന്ധപ്പെട്ട് നിരവധി പേർക്ക് നോട്ടീസ് ലഭിച്ചിട്ടുണ്ട്. ഇത്തരം നിയമവിരുദ്ധമായ പ്രവർത്തനങ്ങളിൽ ഉന്നത വ്യക്തികൾ ഉൾപ്പെട്ടിട്ടുണ്ടോ എന്ന് കണ്ടെത്തുകയാണ് ഇ.ഡി ലക്ഷ്യമിടുന്നത്. ഇന്ത്യയിൽ ഓൺലൈൻ ബെറ്റിംഗ് വ്യാപകമായി നടക്കുന്നുണ്ടെന്നും ഇതിൽ പലപ്പോഴും കള്ളപ്പണം വെളുപ്പിക്കൽ ഉൾപ്പെടെയുള്ള നിയമവിരുദ്ധ പ്രവർത്തനങ്ങൾ നടക്കുന്നുണ്ടെന്നും റിപ്പോർട്ടുകളുണ്ട്.
ക്രിക്കറ്റ് താരങ്ങളുൾപ്പെടെയുള്ള പ്രമുഖരുടെ സോഷ്യൽ മീഡിയ പ്രചാരണങ്ങൾ ഇത്തരം ആപ്പുകൾക്ക് വലിയ പ്രചാരം നൽകുന്നുണ്ട്. അനധികൃത ബെറ്റിംഗ് ആപ്പുകൾ വഴി കോടിക്കണക്കിന് രൂപയുടെ നിക്ഷേപകരെ കബളിപ്പിക്കുകയും വലിയ തോതിലുള്ള നികുതി വെട്ടിപ്പ് നടത്തുകയും ചെയ്ത നിരവധി കേസുകൾ ഇഡി നിലവിൽ അന്വേഷിക്കുന്നുണ്ട്. കഴിഞ്ഞ വർഷം മുതൽ ബോളിവുഡ്, സൗത്ത് ഇന്ത്യൻ സിനിമാ താരങ്ങൾ, ക്രിക്കറ്റ് താരങ്ങൾ എന്നിവരെയും അനധികൃത ബെറ്റിംഗ് ആപ്പുകളുടെ പ്രചാരണത്തിന്റെ പേരിൽ ഇഡി ചോദ്യം ചെയ്യലിന് വിധേയമാക്കിയിട്ടുണ്ട്.
വിജയ് ദേവരകൊണ്ട, റാണ ദഗ്ഗുബാട്ടി, പ്രകാശ് രാജ്, ഹർഭജൻ സിംഗ്, ഊർവശി റൗട്ടേല, സുരേഷ് റെയ്ന എന്നിവരും ഈ പട്ടികയിൽ ഉൾപ്പെടുന്നു. കഴിഞ്ഞ മാസം സുരേഷ് റെയ്നയെയും ഇതേ കേസിൽ ഇഡി ചോദ്യം ചെയ്തിരുന്നു. അടുത്തിടെ ഓൺലൈൻ ഗെയിമിംഗിൽ റിയൽ മണി ബെറ്റിംഗ് സർക്കാർ നിരോധിക്കുകയും ചെയ്തിരുന്നു.
