'ഞങ്ങൾ നിങ്ങൾക്കൊപ്പമുണ്ട്; ഖത്തറിൽനിന്ന് ഒരായിരം സ്‌നേഹത്തോടെ...'; സ്ഞ്ജുവിന് പിന്തുണയുമായി ആരാധകർ ഫിഫ ലോകകപ്പ് വേദിയിലും; രണ്ടാം ഏകദിനത്തിൽ ടീമിൽ ഇടം നിഷേധിച്ചതിൽ പ്രതിഷേധം ഉയരവെ വൈറലായി ചിത്രങ്ങൾ
ദോഹ: ന്യൂസിലൻഡിനെതിരായ രണ്ടാം ഏകദിനത്തിൽ ഇന്ത്യൻ ടീമിൽ സഞ്ജു സാംസണ് ഇടംനൽകാത്തതിൽ സാമൂഹ്യ മാധ്യമങ്ങളിൽ വിമർശനം ഉയരുന്നതിനിടെ ഫിഫ ലോകകപ്പ് വേദിയിലും താരത്തിന് പിന്തുണയറിച്ച് ആരാധകർ. സഞ്ജുവിന്റെ പോസ്റ്ററുമായാണ് ആരാധകർ ഫിഫ ലോകകപ്പ് വേദികളിലെത്തിയത്. 'ഞങ്ങൾ നിങ്ങൾക്കൊപ്പമുണ്ട്. ഖത്തറിൽനിന്ന് ഒരായിരം സ്‌നേഹത്തോടെ...' എന്നാണ് രാജസ്ഥാൻ റോയൽസിന്റെയും ഇന്ത്യൻ ടീമിന്റെയും ജേഴ്‌സിയിലുള്ള സഞ്ജുവിന്റെ ചിത്രങ്ങളുള്ള ബാനറുകളിൽ ഇവർ കുറിച്ചത്.
സഞ്ജുവിന് പിന്തുണയുമായി ആരാധകർ ലോകകപ്പ് വേദിയിലെത്തിയതിന്റെ ചിത്രങ്ങൾ ട്വിറ്ററിൽ നിരവധി പേരാണ് പങ്കുവച്ചത്. സമാഹമാധ്യമങ്ങളിലെല്ലാം ഇതിന്റെ ചിത്രങ്ങൾ വൈറലാകുകയാണ്.'ഫിഫ ലോകകപ്പിൽ നിങ്ങൾ ആരെയാണ് പിന്തുണയ്ക്കുന്നത്?' എന്ന അടിക്കുറിപ്പോടെ രാജസ്ഥാൻ റോയൽസിന്റെ ഫേസ്‌ബുക് പേജിലും ചിത്രം പങ്കുവച്ചിട്ടുണ്ട്.
സഞ്ജുവിനെ കളിപ്പിക്കാത്തതിൽ ക്രിക്കറ്റ് സ്റ്റേഡിയങ്ങളിലും സമൂഹമാധ്യമങ്ങളിലും ദിവസേന സിലക്ടർമാർക്കും ബിസിസിക്കുമെതിരെ മുറവിളി ഉയരുന്ന പശ്ചാത്തലത്തിലാണ് ഫുട്‌ബോൾ ലോകകപ്പ് വേദിയിൽ താരത്തിന് പിന്തുണയറിച്ച് ആരാധകർ രംഗത്ത് വന്നത്.
നേരത്തെ അയർലൻഡ് , വെസ്റ്റിൻഡീസ്, സിംബാബ്വെ എന്നിങ്ങനെ ഇന്ത്യൻ ക്രിക്കറ്റ് ടീം മത്സരത്തിനായി പോയ വിവിധ രാജ്യങ്ങളിലും സഞ്ജുവിനായി ആരാധകവൃന്ദം ആർപ്പുവിളിച്ചിരുന്നു. അന്ന് ക്രിക്കറ്റ് വേദിയിലായിരുന്നെങ്കിൽ ഇപ്പോഴിതാ ഫിഫ ഫുട്‌ബോൾ ലോകകപ്പ് നടക്കുന്ന ഖത്തറിൽ വിവിധ മത്സരങ്ങൾ നടക്കുന്ന വേദികളിലാണെന്ന വ്യത്യാസം മാത്രം.
മികച്ച ഫോമിൽ തുടരുന്ന സഞ്ജുവിനെ ന്യൂസീലൻഡിനെതിരായ രണ്ടാം ഏകദിനത്തിൽ തഴഞ്ഞതിനു പിന്നാലെ സമൂഹമാധ്യമങ്ങളിൽ ആരാധകരോഷം രൂക്ഷമായിരുന്നു. സഞ്ജുവിനെ കളിപ്പിക്കാത്തതിൽ മുൻ ഇന്ത്യൻ താരങ്ങളായ മുരളി കാർത്തിക്, ആശിഷ് നെഹ്‌റ ഉൾപ്പെടെയുള്ളവർ രംഗത്തെത്തിയിരുന്നു. ആറാമത് ഒരു ബോളറെ ആവശ്യമാണെന്നു തോന്നിയപ്പോൾ ദീപക് ഹൂഡയ്ക്ക് അവസരം നൽകിയെന്നായിരുന്നു പതിവുപോലെ ടീം മാനേജ്‌മെന്റിന്റെ വിശദീകരണം.
