ലണ്ടൻ: ഇംഗ്ലീഷ് പ്രീമിയർ ലീഗിൽ മാഞ്ചസ്റ്റർ യുണൈറ്റഡിന് ഞെട്ടിക്കുന്ന തോൽവി. സ്വന്തം തട്ടകമായ ഓൾഡ് ട്രാഫോർഡിൽ നടന്ന വാശിയേറിയ മത്സരത്തിൽ, പത്തുപേരായി കളിച്ച എവർട്ടൺ എതിരില്ലാത്ത ഒരു ഗോളിന് യുണൈറ്റഡിനെ വീഴ്ത്തി. എതിരില്ലാത്ത ഒരു ഗോളിനായിരുന്നു എവർട്ടന്റെ ജയം. കിയർനൻ ഡ്യൂസ്‌ബറി-ഹാളാണ് എവർട്ടണിനായി വിജയഗോൾ നേടിയത്.

മത്സരം ആരംഭിച്ച് അധികം വൈകാതെ തന്നെ മൈതാനം നാടകീയ രംഗങ്ങൾക്ക് സാക്ഷ്യം വഹിച്ചു. 13-ാം മിനിറ്റിൽ എവർട്ടൺ മധ്യനിര താരം ഇദ്രിസ ഗെയ്, സഹതാരമായ മൈക്കിൾ കീനുമായി വാക്കുതർക്കത്തിലേർപ്പെടുകയും സഹതാരത്തിന്റെ കരണത്തടിച്ചതിന് റെഫറിയുടെ ചുവപ്പ് കാർഡ് കണ്ട് പുറത്തായി. ഇതോടെ ശേഷിച്ച 77 മിനിറ്റിലധികം 10 പേരെ വെച്ചാണ് എവർട്ടൺ കളിച്ചത്. യുണൈറ്റഡിന് ഇത് മുതലെടുക്കാനുള്ള സുവർണ്ണാവസരമായിരുന്നു.

എന്നാൽ, മത്സരത്തിൽ യുണൈറ്റഡ് ദയനീയമായി പരാജയപ്പെട്ടു. ചുവപ്പ് കാർഡിന് ശേഷം 16 മിനിറ്റുകൾക്കുള്ളിൽ എവർട്ടൺ ലീഡ് നേടുകയായിരുന്നു. 29-ാം മിനിറ്റിൽ കിയർനൻ ഡ്യൂസ്‌ബറി-ഹാളാണ് എവർട്ടണിനായി വിജയഗോൾ നേടിയത്. ബോക്‌സിന് പുറത്തുനിന്നുള്ള താരത്തിന്റെ തകർപ്പൻ ഷോട്ട് യുണൈറ്റഡ് ഗോൾകീപ്പർ സെനെ ലമ്മൻസിനെ മറികടന്ന് വലയിൽ കയറി.

ഒരു ഗോളിന് പിന്നിലായ യുണൈറ്റഡ്, പത്തുപേരുള്ള എതിരാളിക്കെതിരെ സമനില ഗോളിനായി കിണഞ്ഞു പരിശ്രമിച്ചെങ്കിലും ഫലമുണ്ടായില്ല. 25-ഓളം ഷോട്ടുകളാണ് അവർ ഗോൾ ലക്ഷ്യമാക്കി ഉതിർത്തത്. എന്നാൽ, മികച്ച പ്രതിരോധവും എവർട്ടൺ ഗോൾകീപ്പർ ജോർദാൻ പിക്ക്ഫോർഡിന്റെ തകർപ്പൻ സേവുകളും യുണൈറ്റഡിന് തടസ്സമായി. ഈ മത്സരത്തിലെ തോൽവിക്ക് ശേഷം റൂബൻ അമോറിം കടുത്ത നിരാശ പ്രകടിപ്പിച്ചു.

പത്തുപേരുള്ള ടീമിനെതിരെ കളിക്കുമ്പോൾ കാണിക്കേണ്ട തീവ്രതയും നിലവാരവും ടീമിനുണ്ടായില്ലെന്ന് അദ്ദേഹം തുറന്നടിച്ചു. പ്രീമിയർ ലീഗ് ചരിത്രത്തിൽ, എതിർ ടീമിലെ ഒരു കളിക്കാരൻ ചുവപ്പ് കാർഡ് കണ്ട് പുറത്തായ ശേഷം ഓൾഡ് ട്രാഫോർഡിൽ യുണൈറ്റഡ് തോൽക്കുന്നത് ഇതാദ്യമായാണ്. 2013-ന് ശേഷം എവർട്ടൺ ഓൾഡ് ട്രാഫോർഡിൽ നേടുന്ന ആദ്യ വിജയം കൂടിയാണിത്. ഈ പരാജയം യുണൈറ്റഡിന്റെ ലീഗ് സ്ഥാനത്തിന് കനത്ത വെല്ലുവിളിയാണ് ഉയർത്തുന്നത്.

ഇംഗ്ലീഷ് പ്രീമിയർ ലീഗ്എവർട്ടൺമാഞ്ചസ്റ്റർ യുണൈറ്റഡ്

സ്വന്തം ലേഖകൻ