ഇംഗ്ലീഷ് പ്രീമിയർ ലീഗിൽ ചെൽസിക്ക് തുടർച്ചയായ മൂന്നാം വിജയം; ബേൺലിയെ പരാജയപ്പെടുത്തിയത് എതിരില്ലാത്ത രണ്ട് ഗോളുകൾക്ക്; പോയിന്റ് പട്ടികയിൽ ബ്ലൂസ്‌ രണ്ടാം സ്ഥാനത്ത്
ലണ്ടൻ: ഇംഗ്ലീഷ് പ്രീമിയർ ലീഗിൽ ചെൽസിക്ക് തുടർച്ചയായ മൂന്നാം വിജയം. ടർഫ് മൂറിൽ നടന്ന മത്സരത്തിൽ ബേൺലിയെ എതിരില്ലാത്ത രണ്ട് ഗോളുകൾക്കാണ് ചെൽസി പരാജയപ്പെടുത്തിയത്. പെഡ്രോ നെറ്റോ, എൻസോ ഫെർണാണ്ടസ് എന്നിവരാണ് ബ്ലൂസിനായി വലകുലുക്കിയത്. ഈ വിജയത്തോടെ പോയിന്റ് പട്ടികയിൽ ചെൽസി രണ്ടാം സ്ഥാനത്തേക്ക് ഉയർന്നു. ലീഗിലെ ഒന്നാം സ്ഥാനക്കാരായ ആഴ്സണലുമായുള്ള പോയിന്റ് വ്യത്യാസം മൂന്നായി കുറയ്ക്കാനും ഈ വിജയം ചെൽസിയെ സഹായിച്ചു.
പ്രധാന താരങ്ങളായ കോൾ പാൽമർ, മൊയ്‌സെസ് കൈസെഡോ എന്നിവരില്ലാതെയാണ് കോച്ച് എൻസോ മറെസ്കയുടെ ചെൽസി ഈ നിർണ്ണായക മത്സരം നേരിട്ടത്. കളിയുടെ ആദ്യ ഘട്ടത്തിൽ ബേൺലി ആക്രമിച്ചു കളിച്ചെങ്കിലും, 37-ാം മിനിറ്റിൽ ലഭിച്ച അവസരം മുതലെടുത്ത പെഡ്രോ നെറ്റോയുടെ ഡൈവിംഗ് ഹെഡ്ഡറാണ് ചെൽസിക്ക് ആദ്യ ഗോൾ സമ്മാനിച്ചത്. ജാമി ബൈനോ-ഗിറ്റെൻസിന്റെ മികച്ച ക്രോസാണ് ഈ ഗോളിലേക്ക് വഴി തുറന്നത്. ഇതോടെ ആദ്യ പകുതി അവസാനിക്കുമ്പോൾ ചെൽസി 1-0 എന്ന നിലയിൽ മുന്നിട്ട് നിന്നു. കൈസെഡോയുടെ അഭാവത്തിൽ മധ്യനിരയിൽ കളിച്ച യുവതാരം ആന്ദ്രേ സാന്റോസിന്റെ പ്രകടനം ശ്രദ്ധേയമായി. പ്രതിരോധത്തിലും ആക്രമണത്തിലും താരം മികച്ച പിന്തുണ നൽകി.
രണ്ടാം പകുതിയിൽ ബേൺലിക്ക് തിരിച്ചുവരാൻ അവസരം നൽകാതെ ചെൽസിയുടെ പ്രതിരോധം ശക്തമായി നിലകൊണ്ടു. രണ്ടാം പകുതിയിൽ നെറ്റോയുടെ ഒരു തകർപ്പൻ ഷോട്ട് പോസ്റ്റിൽ തട്ടിത്തെറിച്ചത് ചെൽസിക്ക് രണ്ടാം ഗോൾ നിഷേധിച്ചു. കളി തീരാൻ മിനിറ്റുകൾ മാത്രം ബാക്കി നിൽക്കെ 88-ാം മിനിറ്റിലാണ് ചെൽസിയുടെ രണ്ടാം ഗോൾ പിറന്നത്. പകരക്കാരനായി ഇറങ്ങിയ യുവതാരം മാർക്ക് ഗിയുവിന്റെ മിന്നുന്ന പ്രകടനമാണ് ഈ ഗോളിന് വഴിയൊരുക്കിയത്. ബേൺലി പ്രതിരോധത്തെ മറികടന്ന് മുന്നേറിയ ഗിയു, പന്ത് ഓടിവന്ന എൻസോ ഫെർണാണ്ടസിന് നൽകി. അർജന്റീന താരം പിഴവില്ലാതെ പന്ത് വലയിലെത്തിച്ച് വിജയം ഉറപ്പിച്ചു.
