പരിക്ക് അവഗണിച്ച് കളത്തിലിറങ്ങി സൂപ്പർതാരം; തരംതാഴ്ത്തൽ ഭീഷണി നേരിട്ടിരുന്ന സാന്റോസിന്റെ രക്ഷകനായി സുൽത്താൻ; ഗോളും അസിസ്റ്റുമായി കളം നിറഞ്ഞ് നെയ്മർ
സാവോപോളോ: കാൽമുട്ട് പരിക്ക് അവഗണിച്ച് കളത്തിലിറങ്ങിയ സൂപ്പർതാരം നെയ്മറിന്റെ പ്രകടനത്തിൽ ബ്രസീലിയൻ ക്ലബ്ബായ സാന്‍റോസിന് വിജയം. ബ്രസീൽ ലീഗ് സീരി എയിൽ തരംതാഴ്ത്തൽ ഭീഷണി നേരിട്ടിരുന്ന സാന്‍റോസ്, നിർണായക മത്സരത്തിൽ സ്പോർട് റെസിഫെയെ മറുപടിയില്ലാത്ത മൂന്ന് ഗോളുകൾക്ക് തകർത്ത് നിർണായകമായ മൂന്ന് പോയിന്റ് നേടി. നെയ്മർ ഒരു ഗോൾ നേടുകയും മറ്റൊരു ഗോളിന് വഴിയൊരുക്കുകയും ചെയ്തുകൊണ്ട് കളിയിലെ താരമായി.
മെനിസ്കസ് പരിക്കിനെ തുടർന്ന് ശസ്ത്രക്രിയയും ദീർഘകാല വിശ്രമവും ആവശ്യമാണെന്ന് ഡോക്ടർമാർ ഉപദേശിച്ചിരുന്നു. ഈ സീസണിലെ ശേഷിക്കുന്ന മത്സരങ്ങൾ നഷ്ടമാകുമെന്നും ലോകകപ്പ് പങ്കാളിത്തം സംശയത്തിലാണെന്നും റിപ്പോർട്ടുകൾക്കിടയിലാണ് നെയ്മർ ടീമിനെ രക്ഷിക്കാൻ മൈതാനത്തിറങ്ങിയത്. മത്സരത്തിന്‍റെ 25-ാം മിനിറ്റിൽ നെയ്മറാണ് സാന്‍റോസിനായി ആദ്യ ഗോൾ നേടിയത്. തുടർന്ന് 36-ാം മിനിറ്റിൽ സ്പോർട് റെസിഫെ താരം ലൂക്കാസ് കലിന്‍റെ ഓൺ ഗോൾ സാന്റോസിന്റെ ലീഡ് ഇരട്ടിയാക്കി. 67-ാം മിനിറ്റിൽ ജാവോ ഷ്മിത്തും വലകുലുക്കിയതോടെ സാന്‍റോസ് ആധികാരിക വിജയം സ്വന്തമാക്കി.
ഈ വിജയത്തോടെ, 36 മത്സരങ്ങളിൽനിന്ന് 41 പോയൻറുമായി 20 ടീമുകളുള്ള ലീഗിൽ 15-ാം സ്ഥാനത്തേക്ക് സാന്‍റോസ് ഉയർന്നു. നാല് ടീമുകളാണ് ലീഗിൽനിന്ന് തരംതാഴ്ത്തപ്പെടുന്നത്. മത്സരത്തിന് മുമ്പ് 17-ാം സ്ഥാനത്തായിരുന്ന സാന്‍റോസിന് തരംതാഴ്ത്തൽ ഒഴിവാക്കാൻ ഈ വിജയം അനിവാര്യമായിരുന്നു. ലീഗിൽ ഇനിയും രണ്ട് മത്സരങ്ങൾ ബാക്കിയുള്ളതിനാൽ, സാന്‍റോസിന് തരംതാഴ്ത്തൽ ഭീഷണി പൂർണമായി ഒഴിവായിട്ടില്ല.
സൗദി ക്ലബ് അൽ ഹിലാലിൽനിന്ന് സാന്‍റോസിലെത്തിയ നെയ്മറിനെ ഇവിടെയും പരിക്കുകൾ വേട്ടയാടുകയാണ്. 2025-ൽ ഹാംസ്ട്രിങ് പരിക്കും പേശീ സംബന്ധമായ പ്രശ്നങ്ങളും കാരണം നിരവധി മത്സരങ്ങൾ താരത്തിന് നഷ്ടമായിരുന്നു. ഈ സാഹചര്യം ബ്രസീൽ ദേശീയ ടീമിനൊപ്പമുള്ള താരത്തിന്റെ ലോകകപ്പ് പങ്കാളിത്തത്തെക്കുറിച്ചുള്ള ആശങ്കകൾ വർദ്ധിപ്പിക്കുന്നു.
