മറ്റ് ടീമുകൾക്ക് ലഭിക്കുന്ന പരിഗണന തങ്ങൾക്കില്ല; ക്ലബ്ബിന്റെ സാമ്പത്തിക കൈകാര്യം ചെയ്യലിൽ അതൃപ്തി; അൽ-നസറിനായുള്ള അടുത്ത മത്സരം കളിക്കില്ല; സൗദിയിൽ റൊണാൾഡോയുടെ 'പണിമുടക്ക്'

റിയാദ്: ലോക ഫുട്ബോളിലെ ഇതിഹാസ താരം ക്രിസ്റ്റ്യാനോ റൊണാൾഡോ സൗദി ക്ലബ്ബായ അൽ-നസറിനായുള്ള അടുത്ത മത്സരത്തിൽ കളിക്കില്ലെന്ന് റിപ്പോർട്ട്. ക്ലബ്ബിന്റെ സാമ്പത്തിക കൈകാര്യം ചെയ്യലിൽ തനിക്കുള്ള അതൃപ്തി കാരണമാണ് റൊണാൾഡോ 'പണിമുടക്കിൽ' പ്രവേശിച്ചതെന്നാണ് പോർച്ചുഗീസ് മാധ്യമങ്ങൾ വ്യക്തമാക്കുന്നത്. തിങ്കളാഴ്ച അൽ-റിയാദുമായി നടക്കാനിരിക്കുന്ന സൗദി പ്രോ ലീഗ് മത്സരത്തിന് മുന്നോടിയായാണ് സൂപ്പർ താരത്തിന്റെ ഈ നീക്കം.

സൗദി അറേബ്യയുടെ പബ്ലിക് ഇൻവെസ്റ്റ്‌മെന്റ് ഫണ്ട് (പിഐഎഫ്) അൽ-നസറിന്റെ സാമ്പത്തിക കാര്യങ്ങൾ കൈകാര്യം ചെയ്യുന്ന രീതിയിൽ റൊണാൾഡോയ്ക്ക് അതൃപ്തിയുണ്ടെന്ന് പോർച്ചുഗീസ് ഔട്ട്‌ലെറ്റ് 'എ ബോല' ഒരു ക്ലബ്ബ് വൃത്തത്തെ ഉദ്ധരിച്ച് റിപ്പോർട്ട് ചെയ്തു. മറ്റു പ്രധാന ക്ലബ്ബുകളുമായി താരതമ്യം ചെയ്യുമ്പോൾ അൽ-നസറിന് ലഭിക്കുന്ന പരിഗണനയിൽ താരം സന്തുഷ്ടനല്ലെന്നാണ് വിവരം. ട്രാൻസ്ഫർ മാർക്കറ്റിൽ അൽ-അഹ്ലി, അൽ-ഇത്തിഹാദ്, അൽ-ഹിലാൽ എന്നിവയെ അപേക്ഷിച്ച് തന്റെ ടീമിനോട് പിഐഎഫ് തുല്യമല്ലാത്ത നിലപാടാണ് സ്വീകരിക്കുന്നതെന്ന് റൊണാൾഡോ കരുതുന്നു.

സൗദി പ്രോ ലീഗിലെ നാല് പ്രധാന ക്ലബ്ബുകളായ അൽ-അഹ്ലി, അൽ-ഇത്തിഹാദ്, അൽ-ഹിലാൽ, അൽ-നസർ എന്നിവയിൽ 75 ശതമാനം ഓഹരിയും പിഐഎഫിനാണ്. ലോക ഫുട്ബോളിലെ പ്രമുഖ താരങ്ങളെ വലിയ പ്രതിഫലത്തിൽ സൗദി ലീഗിലേക്ക് ആകർഷിക്കുന്നതിൽ ഈ ഫണ്ട് ഒരു പ്രധാന പങ്ക് വഹിച്ചിട്ടുണ്ട്. 2023-ൽ റൊണാൾഡോ അൽ-നസറിൽ ചേർന്നതിന് തൊട്ടുപിന്നാലെ കരീം ബെൻസെമ, ഖാലിദു കൗലിബാലി, റിയാദ് മഹ്‌റെസ് തുടങ്ങിയ താരങ്ങൾ യഥാക്രമം അൽ-ഇത്തിഹാദ്, അൽ-ഹിലാൽ, അൽ-അഹ്ലി എന്നിവയുമായി വലിയ കരാറുകളിൽ ഒപ്പിട്ടിരുന്നു.

ഈ ടീമുകൾ അവരുടെ സ്ക്വാഡുകൾ ശക്തിപ്പെടുത്തുന്നത് തുടരുകയാണെങ്കിലും, അൽ-നസറിന് തുല്യമായ പരിഗണന ലഭിക്കുന്നില്ലെന്നാണ് റൊണാൾഡോയുടെ വാദം. പ്രതിദിനം 488,000 പൗണ്ട് (ഏകദേശം അഞ്ചര കോടി രൂപ) പ്രതിഫലം വാങ്ങുന്ന ലോകത്തിലെ ഏറ്റവും ഉയർന്ന പ്രതിഫലം വാങ്ങുന്ന ഫുട്ബോളറാണ് 40 വയസ്സുകാരനായ റൊണാൾഡോ. ഈ സീസണിൽ എല്ലാ മത്സരങ്ങളിലുമായി 22 കളികളിൽ നിന്ന് 18 ഗോളുകൾ നേടി അൽ-നസറിന്റെ ക്യാപ്റ്റൻ സ്ഥാനം അലങ്കരിക്കുമ്പോഴും, ക്ലബ്ബിനൊപ്പം ഇതുവരെ ഒരു ആഭ്യന്തര കിരീടവും നേടാൻ അദ്ദേഹത്തിന് സാധിച്ചിട്ടില്ല.