സഭാ തർക്കം പിരിഹരിക്കാനുള്ള ഫോർമുല തയ്യാറാക്കുക മിസോറാം ഗവർണ്ണർ; കത്തോലിക്കാ കർദിനാൾമാരെ വിശ്വാസത്തിൽ എടുത്ത് ഭിന്നിച്ചു നിൽക്കുന്നവരെ അടുപ്പിക്കാമെന്ന് പ്രതീക്ഷ; ഓർത്തഡോക്‌സ്-യാക്കോബായ പ്രശ്‌ന പരിഹാരത്തിൽ പ്രധാനമന്ത്രി ഇടപെടുന്നത് ന്യൂനപക്ഷത്തെ ബിജെപിയിലേക്ക് അടുപ്പിക്കാൻ; പള്ളി തർക്കം തീർത്ത് മോദിക്ക് തിളക്കം കൂട്ടാൻ കരുക്കൾ നീക്കി പിള്ള
ന്യൂഡൽഹി: കേരളത്തിലെ സഭാ തർക്കം പരിഹിക്കാൻ പ്രധാനമന്ത്രി നരേന്ദ്ര മോദി ഇടപെടുമ്പോൾ പ്രശ്‌ന പരിഹാരത്തിന് സാധ്യത ഏറെയെന്ന് സൂചന. വ്യക്തമായ പദ്ധതിയുമായാണ് വിഷയത്തിൽ മോദി ഇടപെടുന്നതെന്നാണഅ സൂചന. ഓർത്തഡോക്‌സ്, യാക്കോബായ സഭകളുടെ മുതിർന്ന ബിഷപ്പുമാരുമായി പ്രധാനമന്ത്രി നരേന്ദ്ര മോദി അടുത്തയാഴ്ച ചർച്ച നടത്തും.
28 മുതലുള്ള ദിവസങ്ങളിലാവും ചർച്ചയെന്നു കേന്ദ്ര സർക്കാർ വൃത്തങ്ങൾ സൂചിപ്പിച്ചു. ഇരുവിഭാഗങ്ങളുമായി വെവ്വേറെ നടത്തുന്ന ചർച്ചയിൽ മിസോറം ഗവർണർ പി.എസ്.ശ്രീധരൻ പിള്ളയും പങ്കെടുക്കും. കഴിഞ്ഞയാഴ്ച പ്രധാനമന്ത്രിയുമായി നടത്തിയ കൂടിക്കാഴ്ചയിൽ ശ്രീധരൻ പിള്ള സഭാ വിഷയം ഉന്നയിച്ചിരുന്നു. ക്രൈസ്തവ സഭാനേതാക്കൾ അഭ്യർത്ഥിച്ചതു പ്രകാരമാണു താൻ പ്രധാനമന്ത്രിയുമായി സംസാരിച്ചതെന്ന് അദ്ദേഹം പറഞ്ഞു. കേരളത്തിലെ സഭകളുമായി അടുത്ത ബന്ധം പിള്ളയ്ക്കുണ്ട്. ഇതുപയോഗിച്ച് പ്രശ്‌നപരിഹാരത്തിനുള്ള ഏകദേശ രൂപം പിള്ള ഉണ്ടാക്കിയിട്ടുണ്ട്. അത് സഭാ നേതൃത്വം അംഗീകരിച്ചാൽ എല്ലാം പരിഹരിക്കപ്പെടും.
ഇതിന്റെ വിശദാംശങ്ങൾ സഭാ നേതൃത്വവുമായി ഗവർണ്ണർ പങ്കുവച്ചിട്ടുണ്ട്. ഇക്കാര്യം വിശദമായി മോദിയേയും അറിയിച്ചു. സുപ്രീംകോടതി വിധിയുടെ പശ്ചാത്തലത്തിൽ പ്രശ്‌ന പരിഹാരത്തിനുള്ള ഫോർമുലയാണ് പരിഗണിക്കുന്നത്. അഭിഭാഷകൻ കൂടിയായ പിള്ള എല്ലാ നിയമവശങ്ങളും പരിശോധിച്ചാണ് വിഷയത്തിൽ ഇടപെടുന്നത്. ക്രൈസ്തവ സമൂഹത്തെ ബിജെപിയുമായി അടുപ്പിക്കന്ന തരത്തിലാണ് മോദിയുടെ ഇടപെടൽ. കേന്ദ്ര മന്ത്രി ്അമിത് ഷായും ദേശീയ സുരക്ഷാ ഉപദേഷ്ടാവ് അജിത് ഡോവലും വിഷയങ്ങളിൽ കൂടിയാലോചന നടത്തുന്നുണ്ട്. കേരളത്തിൽ ബിജെപിക്ക് നേട്ടമുണ്ടാക്കാൻ ക്രൈസ്തവ പിന്തുണ അനിവാര്യമാണെന്നാണ് ബിജെപിയുടെ വിലയിരുത്തൽ.
ഈ സാഹചര്യത്തിലാണ് മിസോറാം ഗവർണ്ണറെ പ്രശ്‌ന പരിഹാരത്തിന് നിയോഗിച്ചത്. ക്രൈസ്തവർക്ക് ഉള്ള മറ്റ് പരാതികളും കേന്ദ്ര സർക്കാർ പരിശോധിക്കും. മറ്റ് ക്രൈസ്തവ സഭകളുമായി ജനുവരിയിൽ മോദി ചർച്ച നടത്തുമെന്ന് പി.എസ് ശ്രീധരൻപിള്ള അറിയിച്ചു. ചർച്ചക്ക് രാഷ്ട്രീയ ലക്ഷ്യങ്ങളില്ല. മതപരമായ ലക്ഷ്യങ്ങളോടെയല്ല സഭാതർക്കത്തിൽ ഇടപെടുന്നതെന്നും ശ്രീധരൻപിള്ള പറഞ്ഞു. പ്രധാനമന്ത്രിയുടെ ഇടപെടലിൽ രാഷട്രീയ ലക്ഷ്യങ്ങൾ ഇല്ലെന്ന് ആവർത്തിക്കുമ്പോഴും, സംസ്ഥാനത്തെ ക്രൈസ്തവ സമൂഹത്തെ പാർട്ടിയിലേക്ക് ആകർഷിക്കുകയാണ് ഇതിലൂടെ ബിജെപി ലക്ഷ്യമിടുന്നത്.
സഭാ തർക്കം രമ്യമായി പരിഹരിക്കാനായാൽ അത് ബിജെപിക്ക് നേട്ടമാകും എന്ന കാര്യത്തിൽ മറ്റ് രാഷ്ട്രീയ പാർട്ടികൾക്കും തർക്കമില്ല. കേരളത്തിലെ പ്രബലമായ രണ്ട് ക്രൈസ്തവ സഭകളുടെ പിന്തുണ ഉറപ്പിക്കാനായാൽ കേരളത്തിൽ മുന്നോട്ട് പോകാമെന്ന് ബിജെപിയും കണക്ക് കൂട്ടുന്നു. വിവിധ പരാതികൾ ഉന്നയിച്ച് കേരളത്തിലെ സഭാ നേതൃത്വങ്ങൾ നൽകിയ നിവേദനം ശ്രീധരൻ പിള്ള പ്രധാനമന്ത്രിയെ നേരിൽ കണ്ട് കൈമാറിയിരുന്നു. ക്രിസ്തുമസിന് ശേഷം കേരളത്തിലെ സഭാ അധ്യക്ഷന്മാരുമായി പ്രധാനമന്ത്രി നരേന്ദ്ര മോദി കൂടിക്കാഴ്ച നടത്തിയേക്കും എന്ന് ശ്രീധരൻ പിള്ള സൂചന നൽകുകയും ചെയ്തിരുന്നു.
ന്യൂനപക്ഷ സ്‌കോളർഷിപ്പ്, ലൗ ജിഹാദ് അടക്കമുള്ള വിഷയങ്ങളിൽ കേന്ദ്രസർക്കാർ ഇടപെടൽ വേണമെന്നാണ് വിവിധ സഭകളുടെ ആവശ്യം. ഈ സാഹചര്യത്തിൽ മിസ്സോറാം ഗവർണർ വഴി ക്രൈസ്തവ സഭ നേതൃത്വം പ്രധാനമന്ത്രിക്ക് നിവേദനം കൈമാറിയിട്ടുണ്ട്. ക്രൈസ്തവ സഭകളെ വീണ്ടും ചേർത്തു നിർത്താനാണ് മിസോറം ഗവർണർ പി.എസ്.ശ്രീധരൻ പിള്ളയുടെ ശ്രമം. ഗവർണ്ണറുടെ 'ജസ്റ്റിസ് ഫോർ ഓൾ, പ്രജുഡിസ് ടു നൺ' എന്ന പുസ്തക പ്രകാശന ചടങ്ങിൽ കർദിനാൾ മാർ ജോർജ് ആലഞ്ചേരി എത്തിയതിന് പിന്നിലും ഈ രാഷ്ട്രീയമാണ് സിപിഎം കാണുന്നത്. പുസ്തകം കർദിനാളിന് നൽകി ഗവർണർ ആരിഫ് മുഹമ്മദ് ഖാൻ പ്രകാശനം ചെയ്യുകയായിരുന്നു. മുമ്പും ബിജെപി നേതാക്കളിൽ സഭയുമായി ഏറെ അടുപ്പമുണ്ടായിരുന്നത് പി എസ് ശ്രീധരൻ പിള്ളയ്ക്കാണ്.
അതിനിടെ ന്യൂനപക്ഷ വിദ്യാഭ്യാസത്തിനുള്ള വിഹിതത്തിൽ ക്രൈസ്തവരോട് അനീതിയുണ്ടെങ്കിൽ പരിഹരിക്കുമെന്നു പ്രധാനമന്ത്രി നരേന്ദ്ര മോദി അറിയിച്ചതായി ശ്രീധരൻ പിള്ള അറിയിക്കുകയും ചെയ്തു. കർദിനാൾ മാർ ജോർജ് ആലഞ്ചേരിയുമായുള്ള കൂടിക്കാഴ്ചയ്ക്കുശേഷം സംസാരിക്കുകയായിരുന്നു അദ്ദേഹം. ന്യൂനപക്ഷങ്ങളുടെ വിദ്യാഭ്യാസത്തിനു കേന്ദ്രസർക്കാർ നൽകുന്ന വിഹിതം കുറഞ്ഞതു കർദിനാൾ നേരത്തേ ശ്രദ്ധയിൽപെടുത്തിയിരുന്നു. 80% ഒരു വിഭാഗത്തിനു നൽകുകയും ക്രൈസ്തവ സമുദായങ്ങൾക്കുള്ള വിഹിതം 20% ആയി കുറയുകയും ചെയ്തുവെന്നു ചൂണ്ടിക്കാട്ടി. ഇക്കാര്യം പ്രധാനമന്ത്രിയെ അറിയിച്ചു. ക്രൈസ്തവ സഭയിലെ പെൺകുട്ടികൾ ഐഎസ് സ്വാധീനത്തിൽപെടുന്നതിനെക്കുറിച്ചു കർദിനാൾ ആശങ്ക അറിയിച്ചെന്നും എന്നാൽ ഇക്കാര്യം കേരള സർക്കാർ വേണ്ടത്ര ഗൗരവത്തോടെ കാണുന്നില്ലെന്നും ശ്രീധരൻ പിള്ള നേരത്തെ കുറ്റപ്പെടുത്തിയിരുന്നു.
ലൗ ജിഹാദ് അടക്കമുള്ള വിഷയങ്ങളിലേക്ക് ചർച്ചകൾ എത്തിക്കുകയാണ് ശ്രീധരൻ പിള്ള. കഴിഞ്ഞ മാസം കർദിനാളുമായി ശ്രീധരൻ പിള്ള ചർച്ച നടത്തിയിരുന്നു. അന്ന് ചില ആശങ്കകൾ അവർ അറിയിച്ചിരുന്നു. ഇതാണ് പ്രധാനമന്ത്രിയുടെ ശ്രദ്ധയിൽ കൊണ്ടു വന്നുവെന്ന് പിള്ള പറയുന്നത്. കേന്ദ്രത്തിന്റെ ന്യൂനപക്ഷ സഹായ പദ്ധതികൾ കേരളത്തിൽ മറ്റൊരു സമുദായത്തിന് കിട്ടുന്നുവെന്നും തങ്ങൾക്ക് അർഹമായത് കിട്ടുന്നില്ലെന്നും ക്രൈസ്തവ സഭകൾക്ക് പരാതിയുണ്ടെന്ന് അന്ന് ശ്രീധരൻപിള്ള വ്യക്തമാക്കിയിരുന്നു. ഇക്കാര്യത്തിൽ കേരളത്തിലെ ക്രൈസ്തവ സമൂഹം കടുത്ത ആശങ്കയിലാണെന്നും പ്രധാനമന്ത്രിയുടെ ഇടപെടൽ തേടി സഭാമേധാവികൾ നിവേദനം ഏൽപ്പിച്ചെന്നും ശ്രീധരൻപിള്ള പറഞ്ഞിരുന്നു.
അന്ന് കർദിനാൾ ഉൾപ്പെടെ പ്രധാനപ്പെട്ട ക്രൈസ്തവ സഭാ മേധാവികളുമായി കൂടിക്കാഴ്ച നടത്തിയപ്പോൾ മാർ ആലഞ്ചേരി ഉൾപ്പെടെ നാല് ബിഷപ്പുമാർ ഇക്കാര്യം ശ്രദ്ധയിൽപ്പെടുത്തി. ജനസംഖ്യാ ആനുപാതികമായ വിഹിതം ലഭിക്കുന്നില്ലെന്നാണ് അവരുടെ പരാതി. ന്യൂനപക്ഷ സ്‌കീമുകളിലൂടെ ലഭിക്കുന്ന തുകയുടെ 20 ശതമാനംമാത്രമാണ് ക്രൈസ്തവ വിഭാഗങ്ങൾക്കു കിട്ടുന്നത്. ബാക്കി മറ്റ് ന്യൂനപക്ഷ സമൂഹത്തിന് നൽകുകയാണെന്നും ബിഷപ്പുമാർ പറഞ്ഞതായി ശ്രീധരൻപിള്ള വ്യക്തമാക്കിയിരുന്നു.
