തിരുവല്ല: പ്രതീക്ഷകൾ അസ്തമിക്കുന്നിടത്താണ് ജീവിതം തുടങ്ങുന്നത് എന്നൊരു സിനിമ സംഭാഷണമുണ്ട്.പശ്ചിമബംഗൾ സ്വദേശി സൗരവിന്റെ ജീവിതത്തിൽ ഈ സംഭാഷണം അക്ഷരംപ്രതി ശരിയാണ്. കാരണം 12 വർഷങ്ങൾക്ക് മുൻപ് കാണാതായ അമ്മയെ തിരയാൻ ഇനി സ്ഥലമൊന്നും ബാക്കിയില്ല.ഒടുവിൽ മരിച്ചുവെന്ന് ഉറപ്പിച്ച് എല്ലാ പ്രതീക്ഷകളും അവസാനിപ്പിച്ച് ഇരിക്കവെയാണ് സൗരവിനെത്തേടി അപ്രതീക്ഷിതമായ് ആ ഫോൺകോൾ വന്നത്.

ആ വിഡിയോകോളിന്റെ മറുതലയ്ക്കൽ 12 വർഷമായി സൗരവ് തേടി നടക്കുന്ന അയാളുടെ അമ്മയായിരുന്നു.അമ്മയും മകനും തമ്മിലുള്ള 12 വർഷത്തെ ഇടവേള മുറിച്ച് ഇരുവരുടേയും പുനസമാഗമത്തിന് വേദിയൊരുക്കിയത് തിരുവല്ല പുഷ്പഗിരി മെഡിക്കൽ കോളേജ് ആണ്. വീഡിയോകോളിൽ കണ്ട മകനെ ഒന്ന് പുണരാൻ, സ്നേഹം പങ്കുവെയ്ക്കാൻ കണ്ണുനട്ട് കാത്തിരിക്കുകയാണ് ലോകി സർക്കാർ എന്ന അമ്മ.മാനസിക നില തെറ്റിയ അവസ്ഥയിലുള്ള ലോകിയെ ഒരു വർഷം മുൻപാണ് തൃശൂർ റെയിൽവേ സ്റ്റേഷനിൽ നിന്ന് പൊലീസ് കണ്ടെത്തിയത്. തുടർന്ന് ബദനി സ്നേഹാലയത്തിലെത്തിച്ചു.മാനസികാരോഗ്യ ചികിത്സ നൽകി വരികയായിരുന്നു.

11 മാസമായി ലോകി സർക്കാർ പെരുമ്പാവൂരിലെ ബദനി സ്നേഹാലയത്തിലെ മാനസികാരോഗ്യ ചികിത്സയിലായിരുന്നു. ഇതിനിടെ മഞ്ഞപ്പിത്തം പിടിപെട്ടു, കൂടെ പിത്താശായക്കല്ലും. തുടർന്നാണ് പുഷ്പഗിരി മെഡിക്കൽ കോളേജിലെത്തിച്ചത്. ഡോ. മനോജ് ഗോപാലിന്റെ ചികിത്സയും പരിചരണവും ലോകിക്ക് ആശ്വാസമായി.ആരോഗ്യം വീണ്ടെടുത്ത ലോകി നാടിനെ കുറിച്ച്, കുടുംബത്തെ കുറിച്ച് തന്റെ ഭൂതകാലത്തെ കുറിച്ച് സംസാരിച്ചു. ലോകി പറഞ്ഞ സ്ഥലങ്ങൾ ഇന്റർനെറ്റിൽ അന്വേഷിച്ച് തപാൽ അഡ്രസ് കണ്ടെത്തി, ലോകിയുടെ കുടുംബത്തെ കണ്ടെത്തി. തുടർന്ന് നമ്പർ വാങ്ങി മകനെ വീഡിയോ കോളിൽ ബന്ധപ്പെടുകയായിരുന്നു.

ബംഗാളി മാത്രം സംസാരിക്കുന്ന ലോകിയുമായി കൊൽക്കത്തയിൽ മുൻപ് താമസിച്ചിരുന്ന ഡോക്ടറുടെ ബന്ധു സംസാരിച്ചു.മെഡിക്കൽ കോളേജിലെ ചികിത്സയ്ക്കിടെ ആശുപത്രി വാർഡിൽ നിന്ന് സിസ്റ്റർ ജോയലിന്റെ ഫോണിലൂടെയാണ് ലോകി തന്റെ മൂത്തമകൻ സൗരവിന്റെ മുഖം കണ്ടത്.അമ്മയെ കണ്ടെത്താനായി അലഞ്ഞുതിരിഞ്ഞ് ഒടുവിൽ സ്‌ക്രീനിൽ അമ്മയുടെ മുഖം തെളിഞ്ഞപ്പോൽ സൗരവിന്റെ കണ്ണുകൾ നിറഞ്ഞൊഴുകി, വാക്കുകൾ ഇടറി.അവന് നഷ്ടപ്പെട്ട സ്വന്തം അമ്മയുടെ മുഖം.

ഇപ്പോൾ മകനേയും നാടിനേയും കുറിച്ചുള്ള പുതിയ പ്രതീക്ഷകൾ ലോകിയുടെ രോഗമുക്തിക്ക് വേഗം കൂട്ടുമെന്നാണ് പ്രതീക്ഷിക്കുന്നത്.മെഡിക്കൽ കോളേജിലെ ചികിത്സ പൂർത്തിയായതിനാൽ ലോകിയെ ഞായറാഴ്ച ബദനി സ്നേഹാലയത്തിലേക്ക് തിരിച്ചെത്തിക്കും.
നിനച്ചിരിക്കാതെ തിരികെ ലഭിച്ച സൗഭാഗ്യത്തെ ഒപ്പം കൂട്ടാൻ പശ്ചിമ ബംഗാളിൽ നിന്ന് കേരളത്തിലേക്ക് വണ്ടി കയറുകയാണ് കൃഷ്ണനഗറിലുള്ള സൗരവ്.അടുത്തയാഴ്ച ലോകിയെ കൂട്ടാൻ സൗരവ് എത്തുമെന്ന് അറിയിച്ചിട്ടുള്ളതും അവിടെയാണ്.

മറുനാടന്‍ മലയാളി

    മറുനാടന്‍ മലയാളി ബ്യൂറോ