ബെയ്ജിങ്: പാക്കിസ്ഥാനെതിരെ യു.എൻ പൊതുസഭയിൽ നർത്തിപ്പൊരിച്ച സുഷമ സ്വരാജിനെതിരെ രൂക്ഷ വിമർശനവുമായി ചൈന. സുഷമയുടെ പ്രസംഗം ധാർഷ്ട്യം നിറഞ്ഞതാണെന്ന് ചൈനയുടെ ഔദ്യോഗിക മാധ്യമം ഗ്ലോബൽ ടൈംസ് കുറ്റപ്പെടുത്തിയിരിക്കുന്നത്.

ഇന്ത്യ ആഗോള ഐടി മേഖലയിലെ വൻശക്തിയെന്നു വിശേഷിപ്പിക്കപ്പെടുമ്പോൾ പാക്കിസ്ഥാൻ ഭീകരരുടെ ഫാക്ടറിയെന്നാണ് അറിയപ്പെടുന്നതെന്നായിരുന്നു സുഷമയുടെ വിമർശനം.

പാക്കിസ്ഥാനിൽ ഭീകരവാദം പിടിമുറുക്കിയെന്ന് തുറന്നു സമ്മതിച്ച ചൈന, ഭീകരരെ പിന്തുണയ്ക്കുന്നത് രാജ്യത്തിന്റെ ദേശീയ നയമാണോ എന്നും ചോദിച്ചു. ഭീകരവാദത്തെ പ്രോത്സാഹിച്ചാൽ പാക്കിസ്ഥാന് എന്താണു ലഭിക്കുക. പണമോ അതോ ബഹുമാനമോ ഗ്ലോബൽ ടൈംസ് മുഖപ്രസംഗത്തിലൂടെ ചോദിക്കുന്നു.

കഴിഞ്ഞ കുറച്ചു വർഷങ്ങളായി വിദേശ, സാമ്പത്തിക രംഗത്തു വളർച്ചനേടിയ ഇന്ത്യ, പാക്കിസ്ഥാനെ താഴ്‌ത്തിക്കെട്ടുകയാണ്. ഒപ്പം ധിക്കാരപരമായ സമീപനമാണ് ചൈനയോട് കാണിക്കുന്നതെന്നും പറയുന്നു. 'ഇന്ത്യയുടെ മർക്കടമുഷ്ടി അവരുടെ അഭിലാഷത്തിനു ചേരുന്നില്ല' എന്ന തലക്കെട്ടിലാണ് മുഖപ്രസംഗം എഴുതിയിരിക്കുന്നത്. 73 ദിവസം ദോക് ലായിൽ നീണ്ടുനിന്ന ഇന്ത്യ ചൈന സംഘർഷത്തെക്കുറിച്ചും മുഖപ്രസംഗത്തിൽ പരാമർശമുണ്ട്.

ജൂൺ 16-ന് ദോക് ലായിൽ ചൈനീസ് സേനയുടെ റോഡ് നിർമ്മാണം ഇന്ത്യൻ സേന തടഞ്ഞതിനെ തുടർന്നാണ് ഇരുരാജ്യങ്ങളും തമ്മിൽ തർക്കമുണ്ടാകുന്നത്. ദോക് ലായുടെ നിയന്ത്രണം ചൈന കൈക്കലാക്കിയാൽ, സിലിഗുഡി ആക്രമിച്ച് ഇന്ത്യയെ വടക്കുകിഴക്കൻ സംസ്ഥാനങ്ങളിൽ നിന്നു പൂർണമായി വിച്ഛേദിക്കാൻ വരെ അവർക്കു സാധിക്കും.