കേന്ദ്രമന്ത്രി ഗജേന്ദ്ര സിങ് ശേഖാവത്തിന് കോവിഡ്; താനുമായി സമ്പർക്കത്തിൽ വന്നവർ നിരീക്ഷണത്തിൽ പോകണമെന്ന് മന്ത്രി

ന്യൂഡൽഹി: കേന്ദ്രമന്ത്രി ഗജേന്ദ്ര സിങ് ശേഖാവത്തിന് കോവിഡ് ബാധ സ്ഥിരീകരിച്ചു. കേന്ദ്ര ജൽശക്തി മന്ത്രിയാണ് ഗജേന്ദ്ര സിങ് ശേഖാവത്ത്. ഇദ്ദേഹത്തെ ചികിത്സയ്ക്കായി ആശുപത്രിയിൽ പ്രവേശിപ്പിച്ചു. ട്വിറ്ററിലൂടെ കേന്ദ്രമന്ത്രി തന്നെയാണ് കോവിഡ് സ്ഥിരീകരിച്ച കാര്യം അറിയിച്ചത്. രോഗലക്ഷണങ്ങൾ കണ്ടതിനെ തുടർന്ന് പരിശോധനയ്ക്ക് വിധേയനാകാൻ തീരുമാനിച്ചു. പരിശോധനാ ഫലം പോസിറ്റീവാണെന്ന് മന്ത്രി ട്വിറ്ററിൽ കുറിച്ചു. കഴിഞ്ഞ ദിവസങ്ങളിൽ താനുമായി സമ്പർക്കത്തിലേർപ്പെട്ടവരോട് നിരീക്ഷണത്തിൽ പോകാൻ മന്ത്രി നിർദ്ദേശിച്ചു. പരിശോധനയ്ക്ക് വിധേയനാകാനും ആവശ്യപ്പെട്ടു.

തന്റെ ട്വീറ്റിൽ 52 കാരനായ മന്ത്രി താനുമായി ബന്ധപ്പെട്ട എല്ലാവരോടും കോവിഡ് -19 പരിശോധിക്കണമെന്ന് അഭ്യർത്ഥിച്ചു. "ചില ലക്ഷണങ്ങൾ ശ്രദ്ധിച്ചതിന് ശേഷം, ഞാൻ കോവിഡ് ടെസ്റ്റിന് വിധേയനായി. എന്റെ ഫലം പോസിറ്റീവ് ആയി. ഡോക്ടർമാരുടെ ഉപദേശപ്രകാരം ഞാൻ ഒരു ആശുപത്രിയിൽ പ്രവേശിപ്പിക്കപ്പെടുന്നു. കഴിഞ്ഞ കുറച്ച് ദിവസങ്ങളായി എന്നെ ബന്ധപ്പെടുന്ന എല്ലാവരോടും ഞാൻ അഭ്യർത്ഥിക്കുന്നു സ്വയം ക്വാറന്റൈനിൽ പോകുക, ടെസ്റ്റിന് വിധേയനാകുക. നിങ്ങൾ എല്ലാവരും ആരോഗ്യത്തോടെയിരിക്കാൻ ശ്രദ്ധിക്കുകയും ചെയ്യുക, "

തിങ്കളാഴ്ച സത്‌ലജ് യമുന ലിങ്കിനെക്കുറിച്ചുള്ള കൂടിക്കാഴ്ചയ്ക്ക് ശേഖാവത്ത് ഹരിയാന മുഖ്യമന്ത്രി എം എൽ ഖട്ടറിനെ സന്ദർശിച്ചിരുന്നു. ഡൽഹിക്ക് സമീപമുള്ള ഗുഡ്ഗാവിലെ മേദാന്ത ആശുപത്രിയിൽ അദ്ദേഹത്തെ പ്രവേശിപ്പിച്ചു.

ഈ മാസം ആദ്യം കേന്ദ്രമന്ത്രി അമിത് ഷാ കോവിഡ് ബാധിതനായിരുന്നു. ഇതുവരെ വൈറസ് ബാധിച്ച മറ്റ് മന്ത്രിമാരിൽ ആയുഷ് മന്ത്രി ഷിർപാദ് നായിക്, കേന്ദ്ര കൃഷി സഹമന്ത്രി കൈലാഷ് ചൗധരി, അർജുൻ റാം മേഘ്വാൾ, ധർമേന്ദ്ര പ്രധാൻ എന്നിവരുമുണ്ട്.