ന്യൂയോർക്ക്: 1961 മാർച്ച് 1 ന് പ്രസിഡന്റ് ജോൺ എഫ്. കെന്നഡിയുടെ എക്‌സിക്യൂട്ടീവ് ഉത്തരവിലൂടെ പീസ് കോർപ്‌സ് 141 രാജ്യങ്ങളിലേക്ക് 240,000 സന്നദ്ധ പ്രവർത്തകരെ അയച്ചു. ഈ സംഘടന 1960 കളിലെ ആദർശവാദികളുടെ ഒരു ഐക്കണായി മാറി.

വിദ്യാഭ്യാസം, ആരോഗ്യം, കമ്മ്യൂണിറ്റി സാമ്പത്തിക വികസനം, കൃഷി, പരിസ്ഥിതി, യുവജന വികസനം എന്നിവയിൽ സഹായിച്ചുകൊണ്ട് ചെറുപ്പക്കാരായ കോളേജ് വിദ്യാഭ്യാസമുള്ള, അല്ലെങ്കിൽ പരിചയസമ്പന്നരായ അമേരിക്കക്കാരെ വികസ്വര രാജ്യങ്ങളിലേക്ക് അയച്ചുകൊണ്ട് സമാധാനവും ധാരണയും വളർത്തുക എന്നതായിരുന്നു സംഘടനയുടെ ലക്ഷ്യം.

1960 ഒക്ടോബർ 14ന് തന്റെ പ്രസിഡന്റ് തിരഞ്ഞെടുപ്പ് പ്രചാരണ വേളയിൽ, മിഷിഗൺ സർവകലാശാലയിലെ സ്റ്റുഡന്റ്‌സ് യൂണിയനിൽ കെന്നഡി പ്രസംഗിച്ചപ്പോഴാണ് പീസ് കോർപ്‌സ് എന്ന ആശയം ഉടലെടുത്തത്. പ്രസംഗത്തിനിടെ അദ്ദേഹം വിദ്യാർത്ഥികളോട് തങ്ങളുടെ രാജ്യത്തെ സേവിക്കാൻ തയ്യാറാണോ എന്നും ചോദിച്ചു. വികസ്വര രാജ്യങ്ങളിൽ പ്രവർത്തിക്കാൻ സന്നദ്ധത പ്രകടിപ്പിക്കുന്നതിലൂടെ സമാധാനത്തിന്റെ സന്ദേശം പ്രചരിപ്പിക്കാൻ കഴിയുമോ എന്നും ചോദിച്ചു. ''ഡോക്ടർമാരാകാൻ പോകുന്ന നിങ്ങളിൽ എത്ര പേർ ഘാനയിൽ നിങ്ങളുടെ ജീവിതം ചെലവഴിക്കാൻ തയ്യാറാണ്? സാങ്കേതിക വിദഗ്ധരോ എഞ്ചിനീയർമാരോ, നിങ്ങളിൽ എത്രപേർ വിദേശ സേവനത്തിൽ ജോലി ചെയ്യാനും ലോകമെമ്പാടും നിങ്ങളുടെ ജീവിതം ചെലവഴിക്കാനും തയ്യാറാണ്?'' കെന്നഡി ചോദിച്ചു.

''കേവലം ഒന്നോ രണ്ടോ വർഷം സേവനമനുഷ്ഠിക്കുക മാത്രമല്ല, നിങ്ങളുടെ ജീവിതത്തിന്റെ ഒരു ഭാഗം ആ രാജ്യങ്ങളിലേക്ക് സംഭാവന ചെയ്യാനുള്ള നിങ്ങളുടെ സന്നദ്ധതയെ ആശ്രയിച്ചിരിക്കും ആ രാജ്യത്തിന്റെ പുരോഗതി. നിങ്ങളിൽ എത്ര പേർക്ക് അതിനു കഴിയുമെന്നാണ് എന്റെ ചോദ്യം. അമേരിക്കക്കാർ സംഭാവനകൾ നൽകാൻ തയ്യാറാണെന്ന് എനിക്കറിയാം. പക്ഷെ, ഈ ശ്രമം മുമ്പുണ്ടായിരുന്നതിനേക്കാൾ വളരെ വലുതായിരിക്കണം,'' അദ്ദേഹം പറഞ്ഞു.

ആദ്യത്തെ അഞ്ച് വർഷത്തിനുള്ളിൽ പീസ് കോർപ്‌സ് 55 രാജ്യങ്ങളിലേക്ക് 14,000 വോളന്റിയർമാരെ അയച്ചതായി വാഷിങ്ടൺ പോസ്റ്റ് റിപ്പോർട്ട് ചെയ്യുന്നു.

പീസ് കോർപ്‌സ് പ്രവർത്തനത്തിന്റെ ഏറ്റവും പുതിയ ചില പ്രത്യേകതകൾ 1997 ൽ 32 വോളന്റിയർമാരെ ദക്ഷിണാഫ്രിക്കയിലേക്ക് അദ്ധ്യാപകരായി അയച്ചതാണ്. ആ രാജ്യത്തേക്ക് പോയ ആദ്യത്തെ സന്നദ്ധപ്രവർത്തകരാണവർ.

പ്രസിഡന്റ് നെൽസൺ മണ്ടേല 1994-ൽ അമേരിക്ക സന്ദർശിച്ചപ്പോഴാണ് അന്നത്തെ പ്രസിഡന്റ് ബിൽ ക്ലിന്റനോട് രാജ്യത്തെ സാമൂഹികവും സാമ്പത്തികവുമായ വെല്ലുവിളികളെ അഭിമുഖീകരിക്കാൻ സഹായം ആവശ്യപ്പെട്ടത്.

1995 ൽ, ലൂയിസ് ചുഴലിക്കാറ്റ് നാശനഷ്ടങ്ങളുണ്ടാക്കിയപ്പോൾ പീസ് കോർപ്‌സ് വീടുകൾ പുനർനിർമ്മിക്കാൻ സഹായിക്കാൻ സന്നദ്ധപ്രവർത്തകരെ അയച്ചു. ആ അനുഭവം പീസ് കോർപ്‌സ് റെസ്‌പോൺസ് പ്രോഗ്രാമിലേക്ക് നയിച്ചു, അത് ''ലോകമെമ്പാടുമുള്ള രാജ്യങ്ങൾക്ക് ഹ്രസ്വകാല, കേന്ദ്രീകൃത, മാനുഷിക സേവനം'' നൽകുന്നു.

അടുത്തിടെ, കൊറോണ വൈറസ് മഹാമാരി പീസ് കോർപ്‌സിനെ ശക്തമായി ബാധിച്ചു. കഴിഞ്ഞ മാർച്ചിൽ, വൈറസിനെക്കുറിച്ചുള്ള ആശങ്കകൾ കാരണം അത് പ്രവർത്തിച്ചിരുന്ന 60 ലധികം രാജ്യങ്ങളിലെ പ്രവർത്തനങ്ങൾ താൽക്കാലികമായി നിർത്തിവയ്ക്കുകയും അതിന്റെ 7,000 വോളന്റിയർമാരെ അമേരിക്കയിലേക്ക് തിരികെ കൊണ്ടുവരികയും ചെയ്തു.

പീസ് കോർപ്‌സിന്റെ 61-ാം വർഷം എങ്ങനെയായിരിക്കുമെന്ന് വ്യക്തമല്ല. പക്ഷേ ഒരു വക്താവ് പറയുന്നതനുസരിച്ച്, ഈ വർഷം അവസാനമോ അടുത്ത വർഷത്തിന്റെ തുടക്കത്തിലോ താൽക്കാലിക സന്നദ്ധ പ്രവർത്തനങ്ങൾക്കായി അവർ അപേക്ഷകൾ സ്വീകരിക്കുന്നുണ്ട്.

''പീസ് കോർപ്‌സ് ഞങ്ങളുടെ അറുപതാം വാർഷികം ആഘോഷിക്കുമ്പോൾ, ഞങ്ങൾ എത്ര ദൂരം പിന്നിട്ടിരിക്കുന്നുവെന്നും ഞങ്ങളെ സംബന്ധിച്ച് ഇത് അഭൂതപൂർവമായ സമയമാണെന്നും എന്നെ ഓർമ്മപ്പെടുത്തുന്നു,'' ആക്ടിങ് പീസ് കോർപ്‌സ് ഡയറക്ടർ കരോൾ സ്പാൻ പറയുന്നു. ''കഴിഞ്ഞ 60 വർഷങ്ങൾ ഈ ചരിത്ര നിമിഷത്തിനായി ഞങ്ങളെ ശരിക്കും ഒരുക്കുകയായിരുന്നു. ലോകത്തിന്റെ എല്ലാ കോണുകളിലും സ്പർശിച്ച ഒരു മഹാമാരിയുടെ സമയത്ത്, നാമെല്ലാവരും ഒന്നാണെന്ന് വ്യക്തമാക്കുന്നു. അടുത്ത 60 വർഷത്തേക്ക് എത്തിനോക്കുമ്പോൾ, സമാധാനവും സൗഹൃദവും വളർത്തുന്നതിനുള്ള, കഠിനാധ്വാനം ചെയ്യാൻ സന്നദ്ധരായ, ലോകമെമ്പാടുമുള്ള സുമനസ്സുകളുടെ ഒരു സമൂഹമായി പീസ് കോർപ്‌സ് തുടരുമെന്ന് എനിക്കുറപ്പാണ്,'' കരോൾ പറഞ്ഞു.

 

പീസ് കോർപ്‌സ്