കെ.എച്ച്.എന്‍.എ ട്രൈ-സ്റ്റേറ്റ് - ന്യൂ ജേഴ്സി ആര്‍ വി പി യായി മാലിനി നായര്‍ ചുമതലയേല്‍ക്കും
(കെ.എച്ച്.എന്‍.എ ന്യൂസ് മീഡിയ)
ന്യൂജേഴ്‌സി: കേരള ഹിന്ദൂസ് ഓഫ് നോര്‍ത്ത് അമേരിക്ക (കെ.എച്ച്.എന്‍.എ) യുടെ ട്രൈ-സ്റ്റേറ്റ് - ന്യൂജേഴ്‌സി റീജിയണല്‍ വൈസ് പ്രസിഡന്റായി (RVP) പ്രശസ്ത നര്‍ത്തകിയും സാമൂഹ്യ പ്രവര്‍ത്തകയുമായ ശ്രീമതി മാലിനി നായര്‍ ചുമതലയേല്‍ക്കും.
തിരുവനന്തപുരം സ്വദേശിനിയായ മാലിനി നായര്‍ നിലവില്‍ ന്യൂജേഴ്‌സിയിലാണ് താമസം. എന്‍ജിനീയറിങ് ബിരുദധാരിയായിരുന്ന അവര്‍, നൃത്തത്തോടുള്ള അടങ്ങാത്ത അഭിനിവേശം കാരണം പ്രൊഫഷണല്‍ ജീവിതമായി നൃത്തത്തെ തന്നെ തിരഞ്ഞെടുക്കുകയായിരുന്നു. പ്രശസ്ത ഭരതനാട്യം, മോഹിനിയാട്ടം നര്‍ത്തകിയായ അവര്‍ 2008-ല്‍ സൗപര്‍ണിക ഡാന്‍സ് അക്കാദമി സ്ഥാപിക്കുകയും നിരവധി വിദ്യാര്‍ത്ഥികളെ പരിശീലിപ്പിക്കുകയും ചെയ്തിട്ടുണ്ട്.
ട്രൈ-സ്റ്റേറ്റ് ഏരിയയിലെ സാമൂഹിക സാംസ്‌കാരിക രംഗത്തെ സജീവ നേതൃത്വമാണ് മാലിനി നായര്‍. കാഞ്ച് (Kerala Association of New Jersey), നാമം എന്നിവയുടെ പ്രസിഡന്റ് സ്ഥാനങ്ങള്‍ ഉള്‍പ്പെടെ പ്രാദേശിക, ദേശീയ തലങ്ങളിലെ വിവിധ സംഘടനകളില്‍ അവര്‍ നേതൃത്വപരമായ പങ്കുവഹിച്ചിട്ടുണ്ട്. ഏഷ്യാനെറ്റ് യു.എസ്.എയുടെ ആദ്യ അവതാരക കൂടിയായ അവര്‍ ദേശീയ തലത്തില്‍ രണ്ടുതവണ 'മലയാളി മങ്ക' പട്ടം നേടി. ഫോമാ മയൂഖം നാഷണല്‍സില്‍ 'മിസ്. വിവേഷ്യസ്' പട്ടവും സ്വന്തമാക്കി. ദുബായ് ഗ്ലോബല്‍ വില്ലേജ് ഉള്‍പ്പെടെ നോര്‍ത്ത് അമേരിക്കയിലും വിദേശത്തും നിരവധി വേദികളില്‍ അവര്‍ നൃത്തം അവതരിപ്പിച്ചിട്ടുണ്ട്.
മാലിനി നായരുടെ ഭര്‍ത്താവ് ജയകൃഷ്ണന്‍ മണിയില്‍ ആണ്. അര്‍ജുന്‍ നായര്‍, അജയ് നായര്‍ എന്നിവരാണ് മക്കള്‍.
പ്രൊഫഷണല്‍ മികവും, സംഘടനാ നേതൃത്വത്തിലെ വിപുലമായ അനുഭവപരിചയവും, കലാ സാംസ്‌കാരിക രംഗത്തെ ശ്രീമതി മാലിനി നായരുടെ പ്രാഗത്ഭ്യവും ട്രൈ-സ്റ്റേറ്റ് മേഖലയിലെ കെ.എച്ച്.എന്‍.എയുടെ പ്രവര്‍ത്തനങ്ങള്‍ക്ക് പുതിയ ദിശാബോധം നല്‍കും. നമ്മുടെ സാംസ്‌കാരിക മൂല്യങ്ങള്‍ പ്രോത്സാഹിപ്പിക്കുന്നതിലും സമുദായ ഐക്യം ശക്തിപ്പെടുത്തുന്നതിലും അവരുടെ നേതൃത്വം നിര്‍ണായകമാകും,' കെ.എച്ച്.എന്‍.എ പ്രസിഡന്റ് ടി. ഉണ്ണികൃഷ്ണന്‍ അഭിപ്രായപ്പെട്ടു.
ജനറല്‍ സെക്രട്ടറി സിനു നായര്‍, ട്രഷറര്‍ അശോക് മേനോന്‍, വൈസ് പ്രസിഡന്റ് സഞ്ജീവ് കുമാര്‍, ജോയിന്റ് സെക്രട്ടറി ശ്രീകുമാര്‍ ഹരിലാല്‍, ജോയിന്റ് ട്രഷറര്‍ അപ്പുക്കുട്ടന്‍ പിള്ള, ബോര്‍ഡ് ഓഫ് ഡയറക്ടേഴ്‌സ്, ട്രസ്റ്റീ ബോര്‍ഡ് എന്നിവരും ശ്രീമതി മാലിനി നായര്‍ക്ക് ആശംസകള്‍ നേര്‍ന്നു.
