വാഷിംഗ്ടണ്‍ ഡി സി : അമേരിക്കയില്‍ വിമാനയാത്ര നടത്തുന്നവര്‍ക്ക് പുതിയ തിരിച്ചറിയല്‍ നിയമങ്ങളുമായി ഗതാഗത സുരക്ഷാ ഏജന്‍സിയായ TSA.2026 ഫെബ്രുവരി 1 മുതല്‍ നിലവില്‍ വരുന്ന ഈ മാറ്റം യാത്രക്കാര്‍ക്ക് വലിയ സാമ്പത്തിക ബാധ്യതയും സമയനഷ്ടവും ഉണ്ടാക്കിയേക്കാം.

റിയല്‍ ഐഡിയോ (REAL ID) മറ്റ് അംഗീകൃത രേഖകളോ ഇല്ലാത്ത യാത്രക്കാര്‍ വിമാനത്താവളത്തില്‍ തിരിച്ചറിയല്‍ പരിശോധനയ്ക്കായി $45 ഫീസ് നല്‍കേണ്ടി വരും.

ഐഡി ഇല്ലാത്തവര്‍ക്ക് യാത്ര തുടരണമെങ്കില്‍ 'TSA ConfirmID' എന്ന പ്രത്യേക സുരക്ഷാ പരിശോധനയിലൂടെ കടന്നുപോകണം. ഈ പരിശോധനയ്ക്ക് കൂടുതല്‍ സമയമെടുക്കുമെന്നതിനാല്‍ വിമാനത്താവളത്തില്‍ വലിയ തിരക്കിനും യാത്രാ തടസ്സത്തിനും സാധ്യതയുണ്ട്.2025 മേയ് 7 മുതല്‍ റിയല്‍ ഐഡി നിയമം കര്‍ശനമാക്കുമെങ്കിലും, പിഴയോടു കൂടിയുള്ള പരിശോധന 2026 ഫെബ്രുവരി മുതലാണ് ആരംഭിക്കുന്നത്.

റിയല്‍ ഐഡി ഡ്രൈവിംഗ് ലൈസന്‍സ്, യു.എസ്. പാസ്പോര്‍ട്ട്, ഗ്രീന്‍ കാര്‍ഡ്, വിദേശ പാസ്പോര്‍ട്ടുകള്‍ തുടങ്ങിയവ കൈവശമുള്ളവര്‍ക്ക് ഈ ഫീസ് ബാധകമല്ല. എന്നാല്‍ താല്‍ക്കാലിക ഡ്രൈവിംഗ് ലൈസന്‍സുകള്‍ സ്വീകരിക്കില്ല.അധിക സുരക്ഷാ പരിശോധനയ്ക്കുള്ള ചെലവ് സാധാരണ നികുതിദായകരില്‍ നിന്ന് മാറ്റി, നിയമം പാലിക്കാത്ത യാത്രക്കാരിലേക്ക് എത്തിക്കുക എന്നതാണ് ഇതിന്റെ ലക്ഷ്യം.

യാത്രക്കാര്‍ എത്രയും വേഗം തങ്ങളുടെ ഐഡികള്‍ പുതുക്കണമെന്നും യാത്രാ വൈകലുകള്‍ ഒഴിവാക്കാന്‍ റിയല്‍ ഐഡി സ്വന്തമാക്കണമെന്നും TSA അറിയിച്ചു.

സ്വന്തം ലേഖകൻ