ഫുഡ് ആന്‍ഡ് ഡ്രഗ് അഡ്മിനിസ്ട്രേഷന്‍ ഐസ്‌ക്രീം തിരിച്ചുവിളിച്ചു; അലര്‍ജിക്ക് സാധ്യത
ടെക്‌സാസ് :ഫുഡ് ആന്‍ഡ് ഡ്രഗ് അഡ്മിനിസ്ട്രേഷന്‍ (FDA) Blue Bell Moo-llennium Crunch ഐസ്‌ക്രീം അടിയന്തരമായി തിരിച്ചുവിളിച്ചു. അറിയാതെപോലും കഴിച്ചാല്‍ മാരകമായ അലര്‍ജിക്ക് സാധ്യതയുണ്ടെന്ന മുന്നറിയിപ്പിനെത്തുടര്‍ന്നാണ് നടപടി.അപകടകരമായ അളവില്‍
അലര്‍ജിയുണ്ടാക്കാന്‍ സാധ്യതയുള്ളതിനാല്‍, ഈ ഉല്‍പ്പന്നം വാങ്ങിയിട്ടുള്ളവര്‍ ഉടന്‍തന്നെ അത് ഉപയോഗിക്കുന്നത് നിര്‍ത്തിവെച്ച് തിരിച്ച് കടകളില്‍ ഏല്‍പ്പിക്കണമെന്ന് FDA അറിയിച്ചു. പതിനഞ്ചിലധികം സംസ്ഥാനങ്ങളില്‍ വിറ്റഴിച്ച 'ഉല്‍പ്പന്നമാണ് തിരിച്ചുവിളിച്ചത്. ഇതില്‍ ബദാം, വാള്‍നട്ട്, പെക്കന്‍ തുടങ്ങിയ അലര്‍ജിക്ക് കാരണമാകുന്ന ചേരുവകള്‍ ചേര്‍ത്തിട്ടുണ്ടെന്നാണ് വിവരം. എന്നാല്‍ ഈ വിവരം ഉല്‍പ്പന്നത്തിന്റെ ലേബലില്‍ രേഖപ്പെടുത്തിയിരുന്നില്ല.
ഇതുവരെ ആര്‍ക്കും അലര്‍ജി സംബന്ധമായ പ്രശ്‌നങ്ങള്‍ റിപ്പോര്‍ട്ട് ചെയ്തിട്ടില്ല. ടെക്‌സാസിലെ ബ്രെന്‍ഹാമിലുള്ള ഒരു സ്ഥാപനത്തില്‍ നിര്‍മ്മിച്ച ഈ ഐസ്‌ക്രീം തെറ്റായ പാക്കേജില്‍ വിതരണം ചെയ്യപ്പെട്ടതാണ് പ്രശ്‌നങ്ങള്‍ക്ക് കാരണം. 'Moo-llennium Crunch' ഐസ്‌ക്രീം 'Chocolate Chip Cookie Dough' എന്ന ഉല്‍പ്പന്നത്തിന്റെ പാക്കേജിലാണ് വിപണിയിലെത്തിച്ചത്.
കൂടുതല്‍ വിവരങ്ങള്‍ അറിയാനായി ഉപഭോക്താക്കള്‍ക്ക് 979-836-7977 എന്ന നമ്പറില്‍ വിളിക്കുകയോ അല്ലെങ്കില്‍ consumerrelations@bluebell.com എന്ന ഇമെയില്‍ വിലാസത്തില്‍ ബന്ധപ്പെടുകയോ ചെയ്യാവുന്നതാണ്.
