വിശ്വാസത്തിന്റെ പ്രഖ്യാപനം! കൊപ്പേലില് സീറോ മലബാര് കണ്വെന്ഷന് കിക്കോഫ് വന്വിജയം; രജിസ്ട്രേഷന് തരംഗം
കൊപ്പേല് / ടെക്സാസ് : ഇന്ത്യയ്ക്ക് പുറത്തെ പ്രഥമ സീറോ മലബാര് രൂപതയായ ചിക്കാഗോ രൂപതയുടെ രജതജൂബിലി ആഘോഷങ്ങളോടനുബന്ധിച്ച് സംഘടിപ്പിക്കുന്ന സീറോ മലബാര് ദേശീയ കണ്വെന്ഷന്റെ ഔദ്യോഗിക കിക്കോഫ്, കോപ്പല് സെന്റ് അല്ഫോന്സാ ദേവാലയത്തില് നടന്നു. രൂപതാ അധ്യക്ഷന് മാര് ജോയ് ആലപ്പാട്ട് കിക്കോഫ് നിര്വഹിച്ചു.
ഇടവക വികാരി ഫാ. മാത്യൂസ് കുര്യന് മുഞ്ഞനാട്ട്, അസിസ്റ്റന്റ് വികാരി ഫാ. ജിമ്മി എടക്കുളത്തൂര് കുര്യന്, ഇടവകാംഗങ്ങളും ചേര്ന്ന് അഭിവന്ദ്യ പിതാവിനേ സ്നേഹോഷ്മളമായി സ്വീകരിച്ചു. ഇടവകയിലെ കണ്വെന്ഷന് പ്രതിനിധികളും ട്രസ്റ്റിമാരുമായ ജോഷി കുര്യാക്കോസ്, റോബിന് കുര്യന്, റോബിന് ജേക്കബ് ചിറയത്ത്, രഞ്ജിത്ത് മാത്യു തലക്കോട്ടൂര്, സെബാസ്റ്റ്യന് പോള് (സെക്രട്ടറി) എന്നിവര് കിക്കോഫ് വിജയകരമാക്കുന്നതില് നേതൃത്വം നല്കി. നിരവധിപേരാണ് ഇടവകയില് നിന്ന് കണ്വന്ഷനു പങ്കെടുക്കാന് തദവസരത്തില് രജിസ്റ്റര് ചെയ്തത്.
മാര്. ജോയ് ആലപ്പാട്ട് വിശ്വാസികളെ അഭിസംബോധന ചെയ്തു. രൂപത സ്ഥാപിതമായ ശേഷം 85 ഓളം ദേവാലയങ്ങളും 75 വൈദികരും ഉള്ള വലിയ സഭാസമൂഹമായി സീറോ മലബാര് സഭ അമേരിക്കയില് പടര്ന്നു പന്തലിച്ചു. അമേരിക്കയിലെ ഒരു വലിയ കുടുംബമായി അതിവേഗം വളര്ന്ന സഭക്കു കൂടുതല് ഉണര്വ് നേടാനുള്ള സമയമാണിതെന്നും മാര്. ജോയ് ആലപ്പാട്ട് വിശ്വാസികളോട് ആഹ്വാനം ചെയ്തു.
തലമുറകളുടെ സംഗമം, സൗഹൃദ കൂട്ടായ്മ, ശോഭനമായ സഭയുടെ ഭാവിക്കുവേണ്ടിയുള്ള ചര്ച്ചകള്, യുവജന പങ്കാളിത്തം എന്നിവയാണ് ഈ കണ്വെന്ഷനിലൂടെ ലക്ഷ്യമിടുന്നതെന്നും വിശ്വാസ പ്രഘോഷണത്തിന്റെ ഈ മഹാസമ്മേളനത്തിലേക്ക് രൂപതയിലെ എല്ലാ കുടുംബങ്ങളേയും സ്നേഹപൂര്വ്വം ക്ഷണിക്കുന്നതായും മാര് ജോയ് ആലപ്പാട്ട് പറഞ്ഞു.
രൂപതയുടെ പ്രഥമ മെത്രാനായ മാര്. ജേക്കബ് അങ്ങാടിയത്തിന്റെ മെത്രാഭിഷേക രജതജൂബിലി കൂടിയാണ് ഈ വേളയില് ആഘോഷിക്കുന്നത്. കഴിഞ്ഞ 25 വര്ഷങ്ങളിലായി രൂപത കൈവരിച്ച വളര്ച്ചയില് പങ്കാളികളായ ഏവരെയും മാര്. ആലപ്പാട്ട് ആദരപൂര്വ്വം ഓര്മ്മിച്ചു. ഇടവക വികാരി ഫാ. മാത്യു , ഇടവകാംഗങ്ങളുടെ പൂര്ണ്ണ സഹകരണവും പങ്കാളിത്തവും വാഗ്ദാനം ചെയ്തു.
കണ്വന്ഷന് ഫിനാന്സ് ചെയര്മാന് ആന്ഡ്രൂസ് തോമസ്, നാഷണല് ഫിനാന്സ് കോര്ഡിനേറ്റര് ജോണ്സണ് കണ്ണൂക്കാടന്, ടെക്നോളജി ചീഫ് കോര്ഡിനേറ്റര് ജോര്ജ് നെല്ലിക്കുന്നേല് എന്നിവര് സംസാരിച്ചു.
2026 ജൂലൈ 9 മുതല് 12 വരെയാണ് എട്ടാമത് ദേശീയ സീറോ മലബാര് കണ്വന്ഷന് നടക്കുന്നത്. ചിക്കാഗോ നഗരത്തിലെ പ്രശസ്തമായ മക്കോര്മിക് പ്ലേസും അതോട് ചേര്ന്നുള്ള പ്രമുഖ മൂന്ന് ഹോട്ടല് സമുച്ചയങ്ങളും കണ്വെന്ഷനു വേദിയാകും.
ബുക്കിങ് നിരക്കില് പ്രത്യേക ഇളവ് : കൂടുതല് പങ്കാളിത്തം ഉറപ്പാക്കാന് ഡിസംബര് 31 വരെ ഡിസ്കൗണ്ട് നിരക്കില് കണ്വന്ഷനു രജിസ്റ്റര് ചെയ്യാന് അവസരമുണ്ടാകും. എല്ലാവരും ഈ അവസരം ഉപയോഗിക്കണമെന്ന് ആന്ഡ്രൂസ് തോമ്സ് അഭ്യര്ഥിച്ചു. കണ്വെന്ഷന് നാഷണല് ഫണ്ട് റൈസിംഗ് കോര്ഡിനേറ്റര് ജോണ്സണ് കണ്ണൂക്കാടന് കണ്വെന്ഷനോട് അനുബന്ധിച്ച് നടത്തുന്ന പ്രോഗ്രാമുകളെപ്പറ്റി വിശദീകരിച്ചു.
ദിവസേനയുള്ള ദിവ്യബലി, ആരാധന എന്നിവയോടൊപ്പം, വിവിധ സെമിനാറുകള്, കുട്ടികള്ക്കും മുതിര്ന്നവര്ക്കും , യുവാക്കള്ക്കും വ്യത്യസ്ത ട്രാക്കുകളിലായാണ് പരിപാടികള് ക്രമീകരിച്ചിരിക്കുന്നത്. രിപാടികള് ഒരുക്കുന്നത്. സംഘടനാ കൂട്ടായ്മകള്, കലാപരിപാടികള്, വിധ മത്സരങ്ങള് എന്നിവയും ഉണ്ടായിരിക്കുന്നതാണ്. ഇടവകാംഗങ്ങളുടെയും ഹൃദ്യമായ സ്വീകരണത്തിനും സഹകരണത്തിനും കണ്വെന്ഷന് ടീം പ്രത്യേകം നന്ദി അറിയിച്ചു. കൂടുതല് വിവരങ്ങള്ക്കും രജിസ്ട്രേഷനും www.syroconvention.org എന്ന വെബ്സൈറ്റ് സന്ദര്ശിക്കാവുന്നതാണ്.
